«قىزىل ايماققا» قايتا ورالدى

سانيتارلىق-ەپيدەميولوگيا­لىق باقىلاۋ دەپارتامەنتىنىڭ مالىمە­تىنشە، ىندەت جۇقتىرۋشىلار كو­بەي­گەن. ءساۋىردىڭ سوڭىندا 308 جاع­داي تىركەلسە، سوڭعى اپتادا 394 جاع­داي انىقتالدى. وڭىردە وسى ۋا­قىتقا دەيىن 20 225 ادامنىڭ ىندەت جۇق­تىرعانى انىق­تالعان.

قازىر وبلىسارالىق، وب­لىس­ىشىلىك، قالاارالىق جولاۋشىلار تاسى­مالى توقتاتىلدى. ويىن-ساۋىق ور­تالىقتارى، ساۋدا ۇي­لەرى سەنبى جانە جەكسەنبى كۇندەرى جۇ­مىس ىستە­مەيدى. سونىمەن قاتار قو­عام­دىق تاماقتانۋ ورىندارى، مونشالار، سپورتتىق-ساۋىقتىرۋ ورتالىقتارى، بازارلار قىزمەتىنە تىيىم سالىندى.

ال قالالىق جانە اۋىلدىق مەكتەپتەر سىنىپتاعى بالالار سانىن 25 وقۋشىدان اسىرماي ءداستۇرلى فور­ماتتا وقىتادى. كەزەكشى توپتاردى قوسپاعاندا، مەكتەپكە دەيىن­گى مەكەمەلەردىڭ قىزمەتىنە تىيىم سالىندى. جىل باسىنان بەرى 1 573 وقۋشى دەرت جۇقتىرعان. قارت­تار مەن مۇمكىندىگى شەكتەۋلى تۇل­عالارعا ار­نال­عان مەديتسينالىق-الەۋمەتتىك مەكەمەلەر، بالالار، سابيلەر ۇيلەرى جابىق فورماتتا قامقورشىلىقتاعى ادامدار مەن قىزمەتكەرلەردىڭ سىرت­قى بايلانىسىن شەكتەۋ ارقىلى جۇ­مىس ىستەۋدە.

وبلىس اكىمدىگى قالالار مەن اۋدانداردا ەكپە ەگىلەتىن جەرلەردىڭ ءتىزىمىن تۇرعىندارعا حابارلاپ، اق­­پاراتتىق جۇمىستاردى جال­عاستىرۋدا. قازىر 135 ەگۋ ورنى دا­يىن­دالعان. ارنايى ورىندارعا بارىپ ەكپە جاسايتىن 37 توپ تا بار.

وبلىس ورتالىعىندا ءموبيلدى ۆاكتسينالاۋ پۋنكتتەرى ىسكە قو­سىل­دى. ەندى قالا تۇرعىندارى ءمو­بيلدى، شاتىرلى نەمەسە ستاتسيو­نارلى پۋنكتتە، كوشەدە ساۋدا ۇيلەرىندە، مادەنيەت ۇيلەرىندە ەكپە الۋلارىنا بولادى.

الداعى كۇندەرى وڭىردەگى ۇجىمداردا قىز­مەتكەرلەردىڭ تۇ­راقتى يم­مۋنيتەتىن قالىپ­تاستىرۋ ءۇشىن 450 مىڭ ادامعا ۆاك­تسينا سالىنادى. ۇجىم قىز­مەتكەرلەرىنىڭ 80 پايىزى قاشىقتان جۇمىس ىستەۋگە كوشىرىلدى.

– بۇگىندە وبلىستا رەسەيلىك سپۋت­نيك-V ۆاكتسيناسىنىڭ ءبىرىن­شى كومپونەنتىن 53 956 ادام، ەكىنشى كومپونەنتىن 16 723 ادام قابىلدادى. ال وتاندىق QazVac ۆاكتسيناسى 908 ادامعا ەگىلدى. جالپى، كۇنىنە 5 مىڭ، ەڭ از دەگەندە 1 مىڭ ادام ۆاكتسينا قابىلداۋدا. سوڭعى تاۋلىكتە
3 600 ادام ەكپە الدى. ال QazVac ۆاكتسيناسىنىڭ 2 مىڭ داناسى جەتكىزىلدى. ونى قابىلداعاندار ينفو­جۇيەگە ەنگىزىلەدى، – دەيدى وبلى­س­تىق دەنساۋلىق ساقتاۋ باس­قار­ماسىنىڭ باسشىسى ايدار سەيىتقازينوۆ.

وڭىرگە دەنساۋلىق ساقتاۋ مي­نيسترلىگى ارقىلى مامىر ايىندا 45 مىڭ مولشەرىندە سپۋتنيك-V، QazVac ۆاكتسيناسىنىڭ 2 مىڭ داناسى جەتكىزىلەدى. قازاقستاندىق ۆاك­تسينانىڭ ەكىنشى كومپونەنتى 21 كۇندىك ارالىقپەن سالىنادى. سون­داي-اق Sinopharm ۆاكتسيناسىنىڭ 14 مىڭ داناسى جەتكىزىلگەن.

وبلىس تۇرعىندارى وتاندىق QazVac ۆاكتسيناسىنىڭ ءبىرىنشى كوم­پونەنتىن قابىلداي باستادى. ەكىنشى كومپونەنتى 21 كۇننەن سوڭ سالىنادى. شالعايداعى اۋىل تۇر­عىندارىنىڭ دا ەكپە الۋىنا جاعداي جاسالدى. تۇرعىندار وتاندىق جانە قىتايلىق ۆاك­تسينانىڭ ايىرماشىلىقتارى جايلى ءجيى سۇراق بەرەتىنى بەلگىلى. ماماندار ۆاكتسينالاردىڭ قۇرامى دا، بەلسەندى زاتتارىنىڭ بولۋى دا، تيىمدىلىگى دە بىردەي دەگەن پىكىردە. ايىرماشىلىعىنا كەلسەك، وتاندىق ۆاكتسينانىڭ ساقتاۋ مەرزىمى 6 ايعا جەتسە، قىتاي ۆاكتسيناسىن 12 اي ساقتاۋعا بولادى ەكەن.

سوندىقتان تۇرعىندار اراسىندا دۇربەلەڭ تۋىنداماس ءۇشىن ولار ەكپەنى قايدان الاتىنى تۋرالى اقپاراتتان حاباردار بولۋى ءتيىس. قالالار مەن اۋدانداردىڭ اكىمدەرىنە بارلىق ەگۋ پۋنكتتەرىن ارالاپ، ولاردىڭ جۇ­مىسىن ۇزدىك­سىز باقىلايتىن تۇ­راقتى توپتار قۇرۋ تاپسىرىلدى. ال ايدار سەيىت­قازينوۆتىڭ ايتۋىنشا، قا­زىر­گى ۋاقىتتا ينفەكتسيالىق ستا­­تسيو­نارلاردىڭ جۇكتەمەسى 30 پا­يىز نەمەسە 630 توسەكتىك ورىندى قۇرايدى. جان­ساقتاۋ بولىمىندە 29 ناۋقاس بار، ونىڭ 11-ءى وكپەنى جاساندى جەلدەتۋ اپ­پاراتىنا قوسىلعان. جىل باسىنان بەرى وڭىردە ىندەتتەن 72 ناۋقاس قايتىس بولعان. ولاردىڭ كوبى – ەگدە جاس­تاعى، بۇرىنعى اۋرۋلارى بار ادام­­دار. سونداي-اق جىل باسىنان بەرى پنەۆمونيادان 13 ادام كوز جۇم­دى.

باسقارمانىڭ مالىمەتىنشە، قا­زىرگى كەزدە ەمحانالار جانىندا 175 ءموبيلدى بريگادا جۇمىس ىستەيدى. ستا­تسيونارلاردا 45 كۇنگە جەتەتىن دارىلىك زاتتار قورى بار، پتر تەستىلەۋ جۇرگىزەتىن 6 زەرتحانا جۇمىس ىستەۋدە.

وبلىس ورتالىعىنداعى 35، ەكى­باس­­تۇزداعى 5 جانە اقسۋ قا­لاسىنداعى 1 قىزمەت كورسەتۋ ورنى Ashyq جۇيەسىنە قوسىلدى.

ماقالا جازۋ بارىسىندا وڭىرى­مىز­دەگى «قوساق» باقىلاۋ-وتكىزۋ پۋنك­­­تىندەگى اۆتو-وت­كەلدەن ىندەت جۇق­تىرۋدىڭ ءۇش راس­تالعان جاعدايى انىق­تال­عانى جايلى حابار كەلىپ ءتۇستى. ەپيدەميالىق باقىلاۋ دەپارتامەنتىنىڭ ما­لىمەتىنشە، ولار­دىڭ ءبىرى تاسىمالداۋ جاسايتىن اق­توبە قا­لاسىنىڭ، ەكەۋى پاۆلودار قالا­سىنىڭ تۇرعىندارى ەكەن.

– وتكەن تاۋلىكتە 726 ازامات شەكارادان ءوتتى، ونىڭ 266-سى جاياۋ وتكەن جانە 460-ءى جۇك كولىگىنىڭ جۇرگىزۋشىسى، 9 ادام كارانتيندىك اۋرۋحاناعا ورنالاستىرىلدى. وبلىس اۋماعىنداعى مەملەكەتتىك شەكارانىڭ ءتورت باقىلاۋ بە­كەتىندە جولاۋشىلاردىڭ ءجۇ­رۋىن باقىلاۋ جالعاسۋدا، – دەيدى دەپارتامەنتتەگىلەر.

پاۆلودار وبلىسى