ءتىپتى جاۋىن-شاشىن, قاتتى جەل تۇرعان كۇندەرى جارىق ءجيى سونەدى. ەلەكتر جەلىلەرى ەسكىرگەن. ول ازداي اۋدانداعى التاي, سارىجايلاۋ, اقجەلكەن, بولاشاق كوشەلەرىندە كوشە شامدارى اتىمەن جوق. سونىڭ سالدارىنان اتالعان اۋداندا ۇرلىق-قارلىق, توناۋشىلىق تىيىلماۋدا. بىلتىر ۇيىمداسقان قىلمىستىق توپ ءبىر تاۋلىك ىشىندە وسى اۋدانداعى جاماۋوۆ, اقباەۆ, اقجەلكەن كوشەلەرىندەگى جەكە تۇرعىن ۇيلەردى توناپ, تۇرعىنداردىڭ دۇنيە-مۇلكىنە زيان كەلتىرگەن.
«كوشە شامدارىنىڭ جوقتىعىنان جول بويىنداعى دۇكەن الدىندا ماسكۇنەمدەردىڭ دە قاراسى كوبەيە تۇسكەن. كىشكەنتاي بالالارىمىزدى دۇكەنگە نە سىرتقا شىعارۋعا قورقاتىن بولدىق», دەيدى اۋدان تۇرعىنى ايىمگۇل اپا.
ءيا, شىنىمەن دە اتالعان اۋدان مەگاپوليس اكىمدىگى ورنالاسقان ءنۇرسات شاعىن اۋدانىنا ءتيىپ تۇرعانىمەن مۇنداعى ينفراقۇرىلىم مەن كوممۋنالدىق قىزمەت ساپاسى سىن كوتەرمەيدى. تۇرعىنداردىڭ سوزىنە سۇيەنسەك, اۋدانداعى قوعامدىق كولىك قىزمەتىنىڭ ساپاسى دا وتە تومەن. تاڭعى جانە كەشكى ۋاقىتتاردا ەسكى قىتاي اۆتوبۋستارىنىڭ قاتىناۋ جيىلىگى 30-40 مينۋت, ءتىپتى ساعاتقا سوزىلادى ەكەن. جۇمىسىنان كەشىگىپ قالماۋعا تىرىسقان جۇرتشىلىق كوبىنە تاكسي قىزمەتىنە جۇگىنۋگە ءماجبۇر.
اۋدان تۇرعىندارى ارىز-شاعىمىن جەرگىلىكتى اۋدان اكىمدىگىنە جەتكىزگەن. الايدا ءالى ناقتى شەشىم جوق.
بىلتىر ءساۋىر ايىندا شاھار باسشىسى مۇرات ايتەنوۆ قايتپاس 1 شاعىن اۋدانىن ارالاۋ بارىسىندا تۇرعىندار ساپاسى تومەن جەكەمەنشىك جارىق جۇيەسىنە شاعىمدانعان ەدى. بۇدان بولەك قايتپاستىقتار جول, اۋىز سۋ, گاز, قوعامدىق كولىك ماسەلەسى دە وزەكتى ەكەنىن ايتقان. ءوز كەزەگىندە مۇرات دۇيسەنبەك ۇلى تۇرعىندار كوتەرگەن ماسەلەلەر كەزەڭ-كەزەڭىمەن شەشىلەتىنىن جەتكىزگەن.
«سىزدەردىڭ قۋاتى ءالسىز جەكەمەنشىك ەلەكتر ەنەرگياسىن تۇتىنىپ وتىرعاندارىڭىزدان حاباردارمىن. كەزىندە وسىنداعى 416 ۇيگە جارىق جۇيەسى جەتپەي قالعان ەكەن. سونى ەسكەرىپ, قۋات جۇيەسىن جۇرگىزۋگە بايقاۋ وتكىزىپ, مەردىگەر مەكەمەنى انىقتادىق. جۋىردا ولار جۇمىسىن باستايدى. قۇرىلىس جۇمىستارىن كۇزگە دەيىن بىتىرۋگە ارەكەت جاسايمىز. سوندا سىزدەردە ساپالى ەنەرگيا بولادى. ال سۋ, گاز تارتۋ ماسەلەسىنە كەلسەك, جۋىردا جوبالىق-سمەتاسىن جاسايمىز. بيىل جۇمىستاردى باستاۋعا تىرىسامىز», دەگەن ەدى قالا اكىمى.
الايدا جىل وتسە دە اۋدانداعى جارىقتاندىرۋ جۇمىستارى جابۋلى قازان كۇيىندە قالىپ وتىر. امالى تاۋسىلعان تۇرعىندار ءوز ۇيلەرىنىڭ تۇسىنا ءوز كۇشتەرىمەن جارىق شامدار ورناتۋعا كوشكەن...
شىمكەنت
