ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ كوميتەتى دەپارتامەنتىنىڭ ءتيىستى بۇيرىعى 1 مامىردا كۇشىنە ەنەدى. ەسكە سالا كەتەيىك, ەكولوگيا, گەولوگيا جانە تابيعي رەسۋرستار مينيسترلىگى سۋ رەسۋرستارى كوميتەتىنىڭ «قازسۋشار» رمك ارنالار ارقىلى سۋ بەرۋگە ارنالعان ءتاريفتىڭ ءادىل دەڭگەيىن بەلگىلەۋ تۋرالى ۇسىنىسقا باستاما جاساعان بولاتىن.
قازاقستانداعى جەرۇستى كوزدەرىنەن ارنالار ارقىلى سۋ بەرۋ تاريفتەرى (سۋ تاريفتەرى) يرريگاتسيا ءۇشىن سۋمەن جابدىقتاۋ جۇيەلەرىن پايدالانۋعا جانە ولارعا تەحنيكالىق قىزمەت كورسەتۋگە جۇمسالاتىن بارلىق شىعىنداردى جابۋ ءۇشىن جەتكىلىكسىز جانە اۋىل شارۋاشىلىعىنداعى وندىرىستىك شىعىنداردىڭ ەلەۋسىز بولىگىن عانا قۇرايدى. ماسەلەن, سۋدىڭ ورتاشا اعىمداعى قۇنى نەگىزگى اۋىل شارۋاشىلىعى داقىلدارىن وندىرۋگە جۇمسالاتىن شىعىنداردىڭ 1%-دان كەمىن قۇرايدى. سونىمەن قاتار قاراجاتتىڭ جەتىسپەۋشىلىگىنەن ينفراقۇرىلىمنىڭ ناشارلاۋى سۋدىڭ كوپ مولشەردە جوعالۋىنا اكەلۋدە. اۋىل شارۋاشىلىعىندا شىعىندار 45%-عا جەتەدى. سونداي-اق تاريف بەلگىلەۋدىڭ قازىرگى قۇرىلىمى, اسىرەسە اۋىل شارۋاشىلىعىندا, سۋ رەسۋرستارىن ءتيىمدى پايدالانۋدى ىنتالاندىرمايدى. تاريف سوڭعى تۇتىنۋشىعا سۋدىڭ ەكونوميكالىق قۇندىلىعى بار ەكەنىن جانە ونى ۇتىمدى ءبولۋ جانە پايدالانۋ كەرەكتىگىن كورسەتۋى كەرەك. وسىلايشا, سۋدى پايدالانۋدىڭ تيىمدىلىگىن ارتتىرۋ, ونى ۇنەمدەۋگە ىنتالاندىرۋ جانە ءتيىستى پايدالانۋ, تەحنيكالىق قىزمەت كورسەتۋ جانە اۋىل شارۋاشىلىعىنداعى ينفراقۇرىلىمدى بولاشاقتا دامىتۋ ءۇشىن جەتكىلىكتى تۇسىمدەردى قامتاماسىز ەتۋ ماقساتىندا ۇكىمەتتىڭ 2018 جىلعى 28 جەلتوقسانداعى №904 قاۋلىسىمەن بەكىتىلگەن سۋارمالى جەرلەردى دامىتۋ جونىندەگى ءىس-شارالار جوسپارىندا سۋارمالى سۋدى بەرۋ ءتاريفىن 10 جىل ىشىندە اۋىل شارۋاشىلىعى تاۋارىن وندىرۋشىلەر شىعىندارىنىڭ ۇلەسىن 4% - عا دەيىن بىرتىندەپ جەتكىزۋ ايقىندالعان.
