ب.ەسىركەپوۆ سۋۆوروۆ پولكىنىڭ 127-ءشى گۆارديالىق بومبالاۋشى اۆياتسياسىنىڭ بوريسوۆ وردەندى ەسكادريليا كومانديرىنىڭ ورىنباسارى مىندەتىن اتقارىپ جۇرگەن تۇستا, ياعني ول 1945 جىلى 7 ماۋسىمدا كەڭەس وداعىنىڭ باتىرى اتاعىنا ۇسىنىلادى. رەسمي قۇجاتتا: گۆارديا كاپيتانى ەسىركەپوۆ 1941 جىلدىڭ شىلدە ايىمەن 1945 جىلدىڭ مامىر ايى ارالىعىندا 174 دۇركىن جاۋ شەبىنە ۇشىپ شىعىپ, جاۋىنگەرلىك مىندەتىن ويداعىداي اتقارسا, تاپسىرمانىڭ 25 ۇشۋ مىندەتىن «سب» ۇشاعىمەن, 149 ۇشۋدى «پە-2» ۇشاعىمەن جۇزەگە اسىرعانى تۋرالى مالىمەت بار. وسىنداعى ۇشۋ مىندەتىنىڭ 76-سىن ۇشۋ توبىنىڭ جەتەكشىسى رەتىندە اتقارسا, 52 دۇركىن توعىزدىق قۇرامىندا, 46 دۇركىن ءوز ەكيپاجىمەن تەك جاۋ اسكەرىن بارلاۋ ماقساتىندا ۇشىپ شىققان ەكەن.
وسى ورايدا, ەسىركەپوۆ بىرنەشە رەت ءوز ەكيپاجىمەن ءولىم قاۋپىنە تاپ بولسا دا, العان بەتىنەن قايتپاي, جاۋىنگەرلىك مىندەتىن ورىنداپ شىقتى. ول ءوزىنىڭ وجەتتىگى مەن تاپقىرلىعىنىڭ ارقاسىندا ءاردايىم جەڭىسكە جەتىپ, بولىمشەگە قايتا ورالىپ, جاۋىنگەرلىك جۇمىسىن جالعاستىردى. ەرجۇرەك ۇشقىش جاۋ تىلىن بارلاۋ كەزىندە اسكەري قۇندى مالىمەتتەر الىپ كەلدى. وعان قاقاعان اياز بەن اپتاپ ىستىق وتان الدىنداعى بورىشىن اتقارۋعا بوگەت بولا العان جوق.
داڭقتى ۇشقىش 1941-1942 جىلدارى مينسك, گومەل, بريانسك ءۇشىن بولعان اۋە شايقاستارىندا كۇنىنە 5-6 دۇركىن جاۋىنگەرلىك مىندەت جۇكتەپ, ونىڭ ءبارىن تىڭعىلىقتى اتقارىپ شىقتى. 1943 جىلى ستالينگراد تۇبىندە نەمىس اسكەرلەرىن تالقانداۋ كەزىندە جانە كۋباندا, متسەنسك, سپاس-دەمەنسك, ەلنيۋ, سمولەنسك قالالارى ءۇشىن بولعان شايقاستاردا گۆارديا كاپيتانى ايرىقشا ەرلىك پەن باتىلدىق تانىتتى.
1944-1945 جىلدارى ورشا, ۆيتەۆسك تۇبەگىندە نەمىس اسكەرلەرىن تالقانداۋ كەزىندە جانە بوريس, شاۋلياي, ميتاۆا, مەمەل, كەنيگسبەرگ, زەملاند تۇبەگىندە بولعان شايقاستاردا ب.ەسىركەپوۆ الدىنا قويىلعان جاۋىنگەرلىك مىندەتتەردى جوعارى دەڭگەيدە ورىنداپ, شىنايى باتىلدىق تانىتتى.
اسىرەسە ورشا قالاسىن ازات ەتۋ كەزىندە پە-2 ۇشاقتارى كولونناسىنىڭ قۇرامىنداعى جەتەكشى بۋىن بولىپ, 1944 جىلدىڭ 25 ماۋسىمىندا نەمىس جاياۋ اسكەر ديۆيزياسىنىڭ شتابىن, جانار-جاعارماي قويماسىن جويدى, تەمىر جولدى ىستەن شىعاردى. 1944 جىلدىڭ 26 شىلدەسىندە پە-2 ۇشاقتارى توعىزدىعى قۇرامىندا ءبولىم جەتەكشىسى مىندەتىن اتقارىپ, ەلەيا پۋنكتىندە تەمىر جول جانە تاس جول قيىلىسىن بومبىلادى. 1944 جىلدىڭ 15 قىركۇيەگىندە پە-2 ۇشاقتارىنىڭ توعىزدىق قۇرامىندا يەتساۆا تەمىر جول ستانساسىندا ورنالاسقان جاۋدىڭ تانكتەرىن 1300 مەتر بيىكتىكتەن بومبىلاپ, وق-ءدارى بازاسىن جاردى. 1944 جىلى 16 قىركۇيەكتە ەسىركەپوۆ باسقارعان ۇشۋ ەكيپاجى تۋكۋمس تەمىر جول ستانساسىن بومبىلادى. ناتيجەسىندە, بۇل ستانسا ۇزاق ۋاقىت بويى تولىعىمەن ىستەن شىعارىلىپ, تەمىر جول قاتىناسى توقتاتىلدى. 1945 جىلدىڭ 6-8 ءساۋىرى كۇندەرى كەنيگسبەرگ قالاسىندا پە-2 ۇشاقتارىنىڭ توعىزدىعىنا جەتەكشىسى بولىپ 4 رەت تابىستى ۇشۋلار جاساسا, 1945 جىلعى 13 ساۋىردە زەملاند تۇبەگىندەگى ۆاشينەن تىرەك پۋنكتىن شابۋىلدادى. 1945 جىلدىڭ 15 ساۋىرىندە نەمىس ديۆيزياسىنىڭ شتاب-پاتەرى ورنالاسقان فولۆاروح برۋحتى بومبىلاۋعا قاتىستى. 1945 جىلى 24 ساۋىردە پيللاۋ قالاسىنىڭ شەت جاعىندا ورنالاسقان جاۋدىڭ تىرەك نۇكتەسىن شابۋىلدادى. 1945 جىلى 8 مامىردا كۋرلاند تۇبەگىندەگى يلمايا تەمىر جول ستانساسىنا شابۋىل جاسادى.
ءسويتىپ, دون, 3-ءشى بەلارۋس, 1-ءشى بالتىق جاعالاۋى جانە لەنينگراد مايداندارىندا كورسەتكەن ەرلىگى ءۇشىن گۆارديا كاپيتانى ەسىركەپوۆكە كەڭەس وداعىنىڭ مارشالى, جوعارعى باس قولباسشىسى جولداس ءستاليننىڭ بۇيرىقتارىندا 12 رەت جانە مايدان مەن ارميا بۇيرىقتارىندا 4 رەت العىس جاريالاندى. وتان سوعىسىندا نەمىس باسقىنشىلارىمەن شايقاستاعى تاپسىرمالاردى ۇلگىلى ورىنداپ, ەرلىگىمەن كوزگە تۇسكەن ەسىركەپوۆ ەڭ جوعارى مەملەكەتتىك ماراپات كەڭەس وداعىنىڭ باتىرى اتاعىنا لايىق دەلىنگەنىمەن, بۇل اتاق بۇيىرماي «قىزىل تۋ» وردەنىمەن ماراپاتتالدى.
بەرىك ابدىعالي ۇلى,
تاريحشى, پارلامەنت ءماجىلىسىنىڭ دەپۋتاتى
