پاندەميا اۋىرتپالىعىنىڭ ءبىرشاما جۇمسارۋى جانە ۆاكتسينالاۋدىڭ قارقىندى ءجۇرۋى ەكونوميكانىڭ دامۋىنا سەرپىن بەرمەك. «ازيانىڭ دامۋ بولجامى» (OPA) 2021» جىل سايىنعى ەكونوميكالىق جاريالانىمدا 2021 جىلى قازاقستاننىڭ ىشكى جالپى ءونىمى 3,2 پايىز دەڭگەيىندە بولادى دەلىنەدى. ءىجو-ءنىڭ مۇنداي دەڭگەيدە بولۋىنا كوپتەگەن قىزمەتتىڭ قايتادان جۇمىسىن باستاۋى جانە شيكىزات تاۋارلار ءوندىرىسى مەن باعاسىنىڭ قايتا قالپىنا كەلۋى اسەر ەتپەك. بانك 2022 جىلى كومىرسۋتەك ءوندىرىسى مەن ينۆەستيتسيا كولەمىنىڭ ارتۋى ەكونوميكانىڭ 3,5 پايىز دەڭگەيىندە وسۋىنە ىقپال ەتەدى دەپ بولجايدى.
– عىلىمي-زەرتتەۋلەر مەن ونەرتابىستارعا ينۆەستيتسيانى كوبەيتۋ, قارجى جۇيەسىن, اسىرەسە كاپيتال نارىعىن نىعايتۋ, سونداي-اق ءبىلىم سالاسىنا مەملەكەتتىك شىعىنداردى ۇلعايتۋ يننوۆاتسيانىڭ العا جىلجۋىنا تۇرتكى بولماق. بۇل ءوز كەزەگىندە مىقتى ەكونوميكالىق ءوسىمدى قولداۋعا سەپتىگىن تيگىزەدى, – دەيدى ادب قازاقستانداعى وكىلدىگىنىڭ ديرەكتورى ناريمان ماناپبەكوۆ.
«ەلدە يننوۆاتسيالىق قىزمەتتەردىڭ شەكتەۋلى بولۋى جانە شيكىزاتتىق تاۋارلار ەكسپورتىنا دەگەن تاۋەلدىلىك ەكونوميكانى وسال ەتتى. بۇل داعدارىس قازاقستانعا يننوۆاتسيانى مەيلىنشە ىنتالاندىرىپ, سول ارقىلى ەكونوميكالىق بەرىكتىلىگىن مىعىم ەتە تۇسۋگە, COVID-19-دان سوڭ قالپىنا كەلتىرۋگە بولاتىنىن كورسەتتى. 2008-2009 جىلدارداعى دۇنيەجۇزىلىك قارجى داعدارىسىنان سوڭ جانە 2015 جىلى مۇناي باعاسىنىڭ كۇرت قۇلدىراۋىنان كەيىن قازاقستان ەكونوميكاسى قايتا قالپىنا كەلدى, بىراق ءوسىم پروتسەسى باياۋ ءجۇردى.
2021 جىلى وڭدەۋشى سەكتورعا كورسەتىلگەن مەملەكەتتىك قولداۋدىڭ ناتيجەسىندە ونەركاسىپ كولەمى 2 پايىزعا ءوسىم كورسەتەدى. سونىمەن قاتار شيكىزاتتىق تاۋارلارعا دەگەن قايتا قالپىنا كەلە باستاعان الەمدىك سۇرانىستى قامتاماسىز ەتۋ ءۇشىن پايدالى قازبالار ءوندىرۋ كورسەتكىشىنىڭ جوعارىلاۋى 2,8 پايىزعا وسپەك. كارانتين شەكتەۋلەرىنىڭ السىرەۋى ترانسپورت, ساۋدا جانە قوعامدىق تاماقتانۋ سەكتورلارىنىڭ قايتادان قالپىنا كەلۋىنە اسەر ەتەدى. 2021 جىلى قىزمەت كورسەتۋ سەكتورى 3,8, ال 2022 جىلى 3,4 پايىزعا ءوسىم كورسەتەدى» دەلىنگەن بانك زەرتتەۋىندە.
زەرتتەۋدەگى بولجامعا سۇيەنسەك, بيىل قۇرىلىس سەكتورى 9,4 پايىزعا ءوسىم كورسەتىپ, مەملەكەتتىك تۇرعىن ءۇي جانە ينفراقۇرىلىمدىق دامۋ قولداۋ باعدارلامالارى ارقىلى 2022 جىلى 6 پايىزعا دەيىن وسەدى. ال ينفلياتسيا ءوسىمى بيىل 6,5 پايىزعا دەيىن باياۋلايدى. ەگەر كەلەر جىلى ۆاليۋتا تۇراقتىلىق تانىتسا 6,2 پايىزعا دەيىن تومەندەۋى مۇمكىن. نەگىزگى تاۋارلار باعاسىنىڭ باقىلاۋعا الىنۋى جانە ۇلتتىق بانكتىڭ ينفلياتسيالىق تارگەتتەۋگە بەلسەنە ارالاسۋى تاماق ونىمدەرى باعاسىنىڭ ءوسۋىن تەجەپ, باعانى تۇراقتاندىرۋعا كومەگىن تيگىزەدى دەپ جازىلادى بانك بولجامىندا.
