قۇجاتتار 2021 جىلعى 4 مامىردان باستاپ 28 قازانعا دەيىن eGov.kz مەملەكەتتىك قىزمەتتەر پورتالى ارقىلى قابىلدانادى. ستيپەنديا ءۇش كەزەڭدە – ماۋسىم, تامىز جانە قاراشا ايلارىندا تاعايىندالادى.
بيىل «بولاشاق» باعدارلاماسى بويىنشا وقۋ ءۇشىن 1 055 ستيپەنديا ءبولىندى. ولاردىڭ ىشىنەن 555 ستيپەنديا ماگيستراتۋرا, رەزيدەنتۋرا, دوكتورانتۋرا جانە تاعىلىمداما باعدارلاماسى بويىنشا ال 500 ستيپەنديا تاعىلىمدامالاردىڭ جاڭا «عالىمدار» ساناتى بويىنشا ءبولىندى. بۇل ساناتتى شەتەلدە كادرلار دايارلاۋ جونىندەگى رەسپۋبليكالىق كوميسسياسى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تاپسىرماسىنا سايكەس الەمنىڭ جەتەكشى عىلىمي ورتالىقتارىندا جىل سايىن 500 عالىمنىڭ تاعىلىمدامادان ءوتۋىن قامتاماسىز ەتۋ ماقساتىندا بەكىتتى.
2021 جىلى ستيپەنديانىڭ اشىقتىعىن ارتتىرۋعا باعىتتالعان بىرقاتار جاڭاشىلدىقتار ەنگىزىلدى. وسىلايشا, «بولاشاق» باعدارلاماسى بويىنشا وقۋعا ۇسىنىلاتىن جوعارى وقۋ ورىندارىنىڭ ءتىزىمى العاش رەت 3 جىلعا بەكىتىلدى. بۇل فورمات ۇمىتكەرلەرگە «بولاشاق» ستيپەندياسىن تاعايىنداۋعا ارنالعان كونكۋرستىق ىرىكتەۋگە قاتىسۋدى جوسپارلاۋ مەن دايىندالۋدا قولايلى جاعداي جاساۋ ماقساتىندا ەنگىزىلدى.
2021-2023 جىلدارعا ارنالعان «بولاشاق» باعدارلاماسى شەڭبەرىندە وقۋ ءۇشىن ۇسىنىلاتىن شەتەلدىك جوعارى وقۋ ورىندارىنىڭ تىزىمىنە ەكى جانە ودان دا كوپ اكادەميالىق رەيتينگتەردىڭ (QS World University Rankings, Academic Ranking of World Universities, Times Higher Education) توپ-25 پوزيتسياسىنا كىرەتىن 27 ەلدەن 207 جوعارى وقۋ ورنى كىردى.
بيىل «بولاشاق» باعدارلاماسى بويىنشا باسىم ماماندىقتار تىزبەسى اكادەميالىق وقۋ ءۇشىن 80 ماماندىقتى جانە تاعىلىمدامادان ءوتۋ ءۇشىن 137 ماماندىقتى كوزدەيدى. وسى جىلى باسىم ماماندىقتار ء«بىلىم بەرۋ», «مەديتسينا», «يننوۆاتسيالار مەن جاڭا تەحنولوگيالار», «يندۋستريالدىق ينجەنەريا», «جاراتىلىستانۋ عىلىمدارى», «الەۋمەتتىك عىلىمدار» جانە «كرەاتيۆتى يندۋستريا» سياقتى باعىتتار بويىنشا ءبولىندى.
2021 جىلى تىزبەگە «ينكليۋزيۆتى ءبىلىم بەرۋ», «قاشىقتان ءبىلىم بەرۋ ادىستەمەسى مەن ءادىسناماسى», «ەپيدەميولوگيا», «يممۋنولوگيا», «ۆيرۋسولوگيا», «ۋربانيستيكا», «ۇلكەن دەرەكتەردى تالداۋ», «جاڭا ماتەريالدار تەحنولوگياسى», «روبوت تەحنيكاسى», «ونەركاسىپتىك اۆتوماتتانلىرۋ» سەكىلدى وزەكتى ماماندىقتار ەنگىزىلدى.
سونىمەن قاتار بيىلعى باسىم ماماندىقتار تىزبەسىندە ەكونوميكانىڭ دامۋىنا ىقپال ەتەتىن يننوۆاتسيالىق ماماندىقتاردى بىرىكتىرەتىن «يننوۆاتسيالار مەن جاڭا تەحنولوگيالار», «كرەاتيۆتى يندۋستريا» جاڭا باعىتتارىنىڭ پايدا بولۋى ماڭىزدى ەرەكشەلىك بولىپ تۇر. بۇل تىزبە ەلدەگى ەڭبەك نارىعى قاجەتتىلىكتەرىنىڭ ورتا مەرزىمدى بولجامىن ەسكەرە وتىرىپ, مەملەكەتتىك ورگاندار مەن ءتۇرلى ۇيىمداردىڭ وتىنىمدەرى نەگىزىندە ازىرلەندى.
