ۇلى وتان سوعىسى جىلدارىندا قازا تاپقان ساربازداردىڭ ەسىمى جەرلەۋ ورنىنان تابىلعان مەدالوندار كومەگىمەن انىقتالدى. قازىرگى تاڭدا ىزدەستىرۋ توبى قازاقستاندىق جاۋىنگەرلەردىڭ تۋىستارىنا حابارلاسىپ, مالىمەتتەردى جەتكىزۋدە.
رەسەيلىك ىزدەستىرۋ توبىنىڭ اقپاراتى بويىنشا, حولمداعى «دولينا» ەكسپەديتسياسىنىڭ قۇرامىنا كىرەتىن «پيراميدا» جاساعى جاۋىنگەرلەر جەرلەنگەن بەلگىسىز قابىردى تاپقان. ۇلى وتان سوعىسىنا قاتىسقان ساربازدار جەكەمەنشىك ۇيلەردىڭ ءبىرىنىڭ اۋماعىندا ۇلكەن شۇڭقىردا كومىلگەن. پاۆلودارلىق «مايدان جولى» ىزدەستىرۋ جاساعىنىڭ كومانديرى الەكساندر شيتوۆ قازا تاپقان ساربازداردىڭ اراسىندا قازاقستاندىقتار دا بولعانىن ايتتى.
«رەسەيلىك ارىپتەستەردىڭ ايتۋىنشا, 29 ساۋىردە ولار ەكسگۋماتسيا جۇمىستارىن اياقتادى. 52 اسكەري قىزمەتكەردىڭ سۇيەگى شىعارىلعان. 16 مەدالون تابىلدى. ولاردىڭ التاۋى بوس, ۇشەۋى سول جەردە وقىلدى. جەتەۋى ساراپتاماعا جىبەرىلدى. وكىنىشكە قاراي, ءۇش مەدالدى وقۋ مۇمكىن بولمادى. بىرەۋىن وقۋ جۇمىستارى ءالى جالعاسىپ جاتىر. ال قالعان ۇشەۋى وقىلدى. ۇشەۋى دە ءبىزدىڭ جەرلەستەرىمىز ەكەندىگى انىقتالدى», دەدى شيتوۆ.
