«مەدەۋ اۋداندىق سوتىنىڭ سۋدياسى سۆەتلانا جولمانوۆانى ءتىنتۋ كەزىندە كابينەتىنەن 4 500 دوللار, ءۇيىن ءتىنتۋ بارىسىندا 2 800 000 دوللار, جەكە كولىگىنەن 600 000 دوللار اقشا تابىلعان. زاسترويششيكتەن - 1 180 000 دوللار پارا العان», دەپ جازدى قۇقىق قورعاۋشى, ۇلتتىق قوعامدىق سەنىم كەڭەسىنىڭ مۇشەسى ايگۇل ورىنبەك فەيسبۋكتەگى پاراقشاسىندا.
28 ساۋىردە الماتى قالالىق سوتىنىڭ ىشكى قاۋىپسىزدىك ءبولىمى مەن ۇقك دەپارتامەنتى مەدەۋ اۋداندىق سوتىنىڭ سۋدياسىنا قاتىستى تەكسەرۋ جۇمىستارىن جۇرگىزەتىنىن حابارلادى. ۇستالعان سۋدياعا قاتىستى ۇقك دەپارتامەنتى قىلمىستىق كودەكستىڭ 190-بابى 4-ءبولىمى 2-تارماعى بويىنشا سوتقا دەيىنگى تەرگەۋ جۇمىستارىن باستادى.
الماتى قالالىق سوتىنىڭ ءباسپاسوز قىزمەتى جوعارىداعى اقپاراتتى جوققا شىعاردى. قالالىق سوتتىڭ مالىمدەۋىنشە, سۋديانىڭ قىزمەتتىك كابينەتىنەن 10 000 دوللار تابىلعان, ال ۇيىنەن ەشتەڭە تابىلماعان.
قر جوعارعى سوت توراعاسىنىڭ بۇيرىعىمەن سۋديانىڭ وكىلەتتىگى توقتاتىلدى. الماتى قالالىق سوتى جالعان اقپارات تاراتقان ادامداردى جاۋاپقا تارتۋ تۋرالى الماتى قالاسىنىڭ پروكۋراتۋراسىنا شاعىمداندى.
ەسكە سالا كەتەيىك, الماتى قالالىق سوتىنىڭ ىشكى قاۋىپسىزدىك ءبولىمى مەن ۇقك دەپارتامەنتى مەدەۋ اۋداندىق سوتىنىڭ سۋدياسىنا قاتىستى تەكسەرۋ جۇمىستارىن جۇرگىزدى.
