فوتو: Matthew Linguist
COVID-19-دى ءساتتى بەيتاراپتاندىرۋ ءۇشىن جىلۋدى قولدانۋ تيىمدىلىگى بۇرىن دا ءسوز بولعان, بىراق الدىڭعى زەرتتەۋلەردە تەمپەراتۋرانىڭ اسەر ەتۋى ءبىر مينۋتتان 20 مينۋتقا دەيىن سوزىلعان ەكەن.
ساراپشىلار توت باسپايتىن بولاتتان جاسالعان قۇبىر بولىگىنەن تۇراتىن جاڭا ەكسپەريمەنتتىك قوندىرعى جاسادى, ول ارقىلى كوروناۆيرۋس بار ەرىتىندى وتەدى. قۇبىر جوعارى تەمپەراتۋراعا دەيىن قىزادى, بىراق ۆيرۋس بىرنەشە سەكۋند ىشىندە ىستىقتىڭ اسەرىنەن جوق بولىپ كەتەدى.
ولار تاجىريبە بارىسىندا ۆيرۋستى وزدەرى ويلاعاننان دا الدەقايدا قىسقا مەرزىمدە زالالسىزداندىرۋعا بولاتىنىنا كوز جەتكىزگەن. ەگەر ەرىتىندى شامامەن جارتى سەكۋندتا 72 گرادۋس تسەلسيعا دەيىن قىزدىرىلسا, وندا ۆيرۋستىڭ ءتيترى ءجۇز مىڭ ەسە تومەندەيدى, بۇل ۆيرۋستى بەيتاراپتاندىرۋعا جانە ادامدارعا تارالۋىن بولدىرماۋ ءۇشىن جەتكىلىكتى-مىس.
بۇل ءادىستى قولدانىستاعى كونديتسيونەر, جەلدەتۋ جانە جىلىتۋ جۇيەلەرىندە قولدانۋعا بولادى دەيدى اۆتورلار.
الايدا «مەديتسينا 24/7» ەكسپەرتتىك مەديتسينا كلينيكاسىنداعى رەسەيلىك دارىگەر كوروناۆيرۋستى جوعارى تەمپەراتۋرا ارقىلى سەكۋند ىشىندە ءولتىرۋدىڭ مۇنداي ءتاسىلى پراكتيكالىق قولدانىستا جارامايتىنىن ايتادى.
عىلىمي زەرتتەۋ جايلى ماقالانىڭ تۇپنۇقاسىمەن مىنا سىلتەمە ارقىلى تانىسا الاسىزدار.
