«تۇركىستان وبلىسىندا سوتتالعان 6 ازامات بارشانىڭ كوزىنشە ءوز دەنەلەرىن كەسكىلەدى. مۇنىڭ سەبەبىن ولار ءتىنتۋ جۇمىستارىمەن جانە قاۋىپسىزدىك مەكەمەسىنىڭ ىشكى تارتىبىمەن كەلىسپەگەندىكتەن جاساعانىن تۇسىندىرگەن. ءتىنتۋ شارالارى ۇلتتىق ۇلاننىڭ, وزىندىك قاۋىپسىزدىك قىزمەتىنىڭ, پروكۋراتۋرا وكىلدەرىنىڭ جانە وبلىستىق قىلمىستىق-اتقارۋ جۇيەسى دەپارتامەنتى باسشىلىعىنىڭ قاتىسۋىمەن وتكەن بولاتىن», دەپ جازادى كوميتەتتىڭ ءباسپاسوز قىزمەتى.
ءتىنتۋ قورىتىندىسىندا پايدالانۋعا تىيىم سالىنعان زاتتار تابىلىپ, تاركىلەنگەن.
«قاتاڭ تارتىپتە جازاسىن وتەپ جاتقان بىرنەشە سوتتالعان ادام قىلمىستىق-اتقارۋ جۇيەسى قىزمەتكەرلەرىنىڭ زاڭدى تالاپتارىنا بەيادەپ سوزبەن نارازىلىق ءبىلدىرىپ, وزدەرىنە قاساقانا دەنە جاراقاتىن سالدى. ولارعا دەرەۋ مەديتسينالىق كومەك كورسەتىلدى. قازىر جاعدايلارى قاناعاتتانارلىق, اۋرۋحاناعا جاتقىزۋدى قاجەت ەتپەيدى», دەيدى تۇركىستان وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ باستىعى تالعات ابدىرانباەۆ.
سونداي-اق دەپارتامەنت باستىعى وزدەرىنە قول سالعانداردىڭ كىسى ءولتىرۋ, قاراقشىلىق جانە ەسىرتكى ساۋداسى ءۇشىن جازاسىن وتەپ جاتقانىن اتاپ ءوتتى.
قارسىلىق شاراسىنىڭ باستاماشىسى قىلمىستىق كودەكستىڭ 297-بابى 3-بولىگى 1, 3-تارماعى (ەسىرتكى قۇرالدارىن زاڭسىز ساقتاۋ, دايىنداۋ جانە وتكىزۋ) بويىنشا 10 جىلعا سوتتالعان 28 جاستاعى ازامات ەكەنى بەلگىلى بولدى.
ء«مان-جايدى انىقتاۋ ءۇشىن وقيعا ورنىنا جەدەل-تەرگەۋ توبى كەلدى. اتالعان فاكتى تىركەلىپ, قىزمەتتىك تەرگەۋ جۇرگىزىلۋدە. قازىر يچ-167/9 قاۋىپسىزدىگى بارىنشا جوعارى مەكەمەدە اۋىر جانە اسا اۋىر قىلمىستار جاساعانى ءۇشىن 485 ادام قاماۋدا», دەپ جازىلعان دەپارتامەنتتىڭ دەرەگىندە.
