دەگەنمەن, ءوزى تۋعان جەردى ايگىلى كەنەن ازىرباەۆتىڭ «قوردايدىڭ تاۋى دا التىن, تاسى دا التىن» دەپ جىرعا قوسۋى تەگىن ەمەس. قازاقتىڭ قاراپايىم ءاربىر جەرى قوينىنا قازىنا ساقتاعان قاسيەتتى القاپ. سول قاسيەت تاۋەلسىزدىك زامانىندا ەل يگىلىگىنە باستاپ وتىر.
جۋىردا عانا نوعايباي اۋىلدىق وكرۋگىندە التىن وندىرەتىن كاسىپورىن قۇرىلىسى رەسمي تۇردە ىسكە قوسىلدى. ءوندىرىس ءبىر جاعىنان باسەكەلەستىك ءباسى بولسا, ەكىنشى جاعىنان قىرۋار تابىستىڭ كوزى دە. اتالعان باستاماعا «MONTERRA QAZAQSTAN» جشس قولداۋ كورسەتۋدە. اۋەلى نوعايباي اۋىلىندا اتالعان سەرىكتەستىكتىڭ جاڭا تاۋ-كەن مەتاللۋرگيا كومبيناتىنىڭ قۇرىلىسى باستالىپ, ونىڭ ىشىنە ۋاقىت كاپسۋلاسى سالىنعان بولاتىن. سونىمەن قاتار تاريحي شاراعا وبلىس اكىمى بەردىبەك ساپارباەۆپەن بىرگە ەلىمىزدىڭ يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, «MONTERRA GROUP AG» باسقارما توراعاسى كريستيان گراف فون ستراحۆيتس جانە گەرمانيا فەدەراتيۆتىك رەسپۋبليكاسىنىڭ ەلىمىزدەگى توتەنشە جانە وكىلەتتى ەلشىسى تيلو كليننەر قاتىسقانىن دا ايتا كەتۋ كەرەك.
بۇگىندە التىن شىققان ايماقتى ۋاقىت تالابىنا ساي دامىتۋ جۇمىستارى جۇرگىزىلۋدە. قازىرگى كەزدە ءوندىرىس ورنىنان 6,4 توننا تازا التىن قورى انىقتالدى. بىراق ينۆەستورلار مەن مامانداردىڭ ايتۋىنشا, قورشاعان ورتاعا ەداۋىر زيان كەلتىرۋىنە بايلانىستى ولار ءتسيانيدتى قولدانۋ ارقىلى باعالى مەتالداردى وندىرۋدەن باس تارتقان. ەندى ۋاقىت تالابىنا ساي تەحنولوگيالاردى انىقتاۋ جانە سونىمەن جۇمىس ىستەۋ ماڭىزدى بولىپ تۇر. كريستيان گراف فون ءستراحۆيتستىڭ ايتۋىنشا, بەس جىلدان بەرى ينۆەستورلار اتالعان جوبانى جۇزەگە اسىرۋ جولىندا جۇمىس ىستەپ كەلەدى ەكەن. سونداي-اق ول دايىن قۇندى مەتالدى اۋەلى قازاقستان ۇلتتىق بانكى ساتىپ الۋعا قۇقىلى ەكەنىن ايتتى. مۇندا ەندى 585 سىنامالى التىن ەمەس, تازا التىن وندىرىلەدى دەپ كۇتىلۋدە. قورداي اۋدانىندا التىن ءوندىرۋ جوباسى تولىعىمەن ىسكە اسقان جاعدايدا, بۇل وبلىس ەكونوميكاسىنىڭ وسۋىنە دە سەرپىن بەرەدى دەۋگە بولادى. سونىمەن قاتار جارقىن جوبا تولىعىمەن جۇزەگە اسقان جاعدايدا 2 800 جۇمىس ورنى قۇرىلادى دەپ كۇتىلۋدە. بۇل جوبانىڭ جالپى قۇنى 1,6 ملرد ەۋروعا تەڭ. جالپى, اتالعان جوبا ءۇش كەزەڭ بويىنشا جۇزەگە اسىرىلادى. العاشىندا 295 ملرد تەڭگە ينۆەستيتسيالانىپ, ناتيجەسىندە جوسپار بويىنشا ءبىر توننا التىن ءوندىرىلۋى ءتيىس. بۇدان كەيىن 235 جانە 310 ملرد تەڭگەنىڭ جۇمىستارى اتقارىلاتىن بولادى. ال التىن ءوندىرۋ كومبيناتى تولىق قۋاتىندا جۇمىس ىستەگەندە بارىپ 10 مىڭ كيلوگرامعا دەيىن قۇندى مەتالل وندىرىلەدى. وسى ۋاقىتقا دەيىن ينۆەستورلار بۇل ماقساتقا 6 ملرد تەڭگە سالىپتى. ەندى گەولوگيالىق بارلاۋ جۇمىستارىنا دا ءجىتى ءمان بەرىلۋدە. بۇگىندە جەتى ۋچاسكەدە گەولوگيالىق-بارلاۋ جۇمىستارى اياقتالدى. سونىمەن قاتار ءتورت بولىمشەدە جۇمىس قارقىندى جۇرگىزىلۋدە. كەن ءوندىرۋ تەرەڭدىگى شامامەن 350 مەترگە دەيىن جەتەدى.
«MONTERRA QAZAQSTAN» جشس باس ديرەكتورى مەرۋەرت دانباەۆا الداعى ۋاقىتتا مۇندا ۆاحتالىق قالاشىقتىڭ دا سالىناتىنىن ايتتى. جالپى, ءبىر سوزبەن ايتقاندا, قورداي اۋدانى اۋماعىندا التىن ءوندىرۋ ءۇشىن بارلىق مۇمكىندىك قاراستىرىلادى.
بولاشاقتا قورداي اۋدانى كەن ءوندىرۋ ىسىمەن دە ەلگە تانىلاتىن بولادى. الايدا, التىن ءوندىرۋ ىسىندە مامان دايىنداۋ كۇردەلى ماسەلەنىڭ ءبىرى. قازىرگى كەزدە جەرگىلىكتى جاستاردى گەرمانياداعى جوعارى وقۋ ورىندارىنا ينجەنەر ماماندىعىن يگەرۋ ءۇشىن وقۋعا جىبەرۋ كەرەكتىگى ايتىلۋدا. سونىمەن قاتار ءتيىستى مامانداردى جەرگىلىكتى كوللەدجدەردىڭ بازاسىندا دايىنداۋ دا ماڭىزدى بولىپ وتىر. جەرگىلىكتى جەردە مامان دايىنداۋ ءىسىنىڭ دە قالاي جۇزەگە اساتىنىن ۋاقىت كورسەتەدى.
جامبىل وبلىسى,
قورداي اۋدانى
