شقو پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى شقو بويىنشا ۇقكد-مەن بىرلەسىپ جەتى ادامنان تۇراتىن قىلمىستىق توپتى اشكەرەلەدى. ولاردىڭ ۇشەۋى ەلىمىزدىڭ وڭتۇستىك ءوڭىرىنىڭ اۋماعىندا تۇرعان.
بىرلەسكەن ارنايى وپەراتسيا ناتيجەسىندە ءبىر ايدان از ۋاقىت ىشىندە ەسىرتكى قۇرىلىمىنىڭ بارلىق قاتىسۋشىلارى بەلگىلى بولدى. ولاردىڭ بارلىعى باسقا قالالاردان كەلگەن, قىلمىسكەرلەر قاۋىپسىزدىك شارالارىن مۇقيات ساقتاپ, جالدامالى پاتەرلەردى ۇنەمى اۋىستىرىپ وتىرعان.
الماتى وبلىسىندا بولىپ, قىلمىستىق توپتىڭ بارلىق ءىس-ارەكەتتەرىن باسقارىپ وتىرعان وسى ەسىرتكى جەلىسىنىڭ جەتەكشىسى دە انىقتالدى.
ەسىرتكى ساۋداسىمەن اينالىساتىن ءار قاتىسۋشىنىڭ ءوز ءرولى بولعان. بەلگىلى ءبىر توپ ەسىرتكىنى جەتكىزۋگە جاۋاپتى بولسا, ەندى بىرەۋلەرى ونى دوزاسى بويىنشا ولشەپ, كەيىننەن قالا بويىنشا ارنايى ورىندارعا قويىپ كەتىپ وتىرعان. ءتىنتۋ بارىسىندا شامامەن 10 كەلى ساتۋعا دايىن سينتەتيكالىق ەسىرتكى تاركىلەندى, بۇل شامامەن 100 000 رەتتىك دوزاعا تەڭ.
– ەسىرتكى تاسمالداۋشىلارعا تاۋار كولىك-لوگيستيكالىق كومپانيالار ارقىلى جاسىرىن قوسالقى بولشەكتەر تۇرىندە جونەلتىلگەن. ەسىرتكىسى جاسىرىلعان بارلىق اۆتوبولشەكتەردى قىزمەتتىك-ىزدەستىرۋ يتتەرى تابا المايدى دەگەن ۇمىتپەن, لاك-بوياۋ ماتەريالدارىمەن مۇقيات بوياعان, - دەدى شقو پد باستىعى ساعات ماديەۆ.
ەسىرتكىنى العاننان كەيىن, ەسىرتكى قوياتىن ادامدى ەشكىم كورمەۋ ءۇشىن ونى ارنايى ورىندارعا قويۋ تۇنگى ۋاقىتتا عانا جۇزەگە اسىرىلعان.
2021 جىلدىڭ ءساۋىر ايىنىڭ باسىندا اۋقىمدى ىزدەستىرۋ جۇمىستارى باستالدى. ءبىر اپتا ىشىندە قالا اۋماعىندا ارەكەت ەتكەن بارلىق ەسىرتكى تاسىمالداۋشىلار قاماۋعا الىندى. ءوز ۇيلەرىن جالعا بەرگەن پاتەر يەلەرى جالداۋشىلاردىڭ پاتەردى ەسىرتكىنى ولشەپ-دايىنداۋ تسەحىنا اينالدىرعاندارىن كورىپ, جاعالارىن ۇستاعان. ءارى قاراي, كەزەك ەسىرتكى جەلىسى جەتەكشىلەرىنە دە كەلىپ جەتتى.
الماتى وبلىسى, تالعار اۋدانى, قىزىلقايرات اۋىلىنداعى جالدامالى ۇيدە سينتەتيكالىق ەسىرتكىنى دايىنداپ, ولشەپ-ورايتىن ەسىرتكى زەرتحاناسىن ۇيىمداستىرۋعا تۇتاستاي ءبىر وتباسىنىڭ قاتىستىلىعى انىقتالدى. ولاردىڭ پسيحوتروپتىق زاتتاردى جارتىلاي دايىن كۇيىدە قويىپ كەتۋ جولىمەن الىپ, ونى تۇتىنۋعا دايىن كۇيگە دەيىن جەتكىزىپ وترىعانى بەلگىلى بولدى.
تەرگەۋ بارىسىندا كۇدىكتىلەر «Telegram» مەسسەندجەرى ارقىلى ەسىرتكىنى بايلانىسسىز تاراتۋمەن اينالىسقانى, ال الەۋەتتى كليەنتتەردەن تولەمدى ەلەكتروندىق تولەم جۇيەلەرىنىڭ كومەگىمەن قابىلداعانى انىقتالدى.
اۋقىمدى ارنايى وپەراتسيا ناتيجەسىندە 21-49 جاس ارالىعىنداعى 7 ادام قاماۋعا الىندى. تاركىلەنگەن زاتتاردىڭ «قارا بازارداعى» قۇنى شامامەن 167 ملن تەڭگەگە باعالانادى.
كۇدىكتىلەردىڭ ءىس-ارەكەتى قر قك-ءنىڭ 297-بابى بويىنشا سارالاندى. كۇدىكتىلەر 15 جىلعا دەيىن باس بوستاندىعىنان ايىرىلۋلارى مۇمكىن.
