وسىلايشا, نەمپومنياششي ءبىرىنشى ورىن السا, ودان كەيىنگى ساتىلارعا ماكسيم ۆاشە-لاگراۆ (فرانتسيا. 8 ۇپاي), انيش گيري (نيدەرلاند, 7,5 ۇپاي), فابيانو كارۋانا (اقش. 7,5 ۇپاي), الەكساندر گريشۋك (رەسەي. 7 ۇپاي), دين ليجەن (قىتاي. 7 ۇپاي), كيريلل الەكسەەنكو (رەسەي. 5,5 ۇپاي) جانە ۆان حاو (قىتاي. 5 ۇپاي) سىندى ويىنشىلار جايعاستى.
يان نەمپومنياششيدىڭ 1990 جىلدىڭ 14 شىلدەسىندە دەسنا وزەنىنىڭ جاعالاۋىندا ورنالاسقان بريانسك قالاسىندا دۇنيەگە كەلدى. بەس جاسقا قاراعان شاعىندا شاحماتقا مىقتاپ دەن قويىپ, ەكى-ءۇش جىل ارالىعىندا سپورت شەبەرلىگىنە ۇمىتكەر دارەجەسىنە دەيىن جەتتى. ودان كەيىنگى جىلدارى دا جاس دارىننىڭ ءجۇرىپ وتكەن جولى جارقىن جەڭىستەرگە تولى بولدى. يان ءوز قۇرداستارى اراسىندا الەم جانە ەۋروپا بىرىنشىلىكتەرىندە توپ جارىپ ەرەسەكتەر دۋىنا دا ەركىن قوسىلدى. 14 جاسىندا حالىقارالىق شەبەر جانە 17 جاسىندا گروسسمەيستەر اتاندى. ءار جىلدارى رەسەيدىڭ جانە كوماندالىق الەم بىرىنشىلىگىنىڭ باس جۇلدەسىن ەكى رەتتەن ولجالاسا, ەۋروپا چەمپيوناتىندا ءبىر مارتە تەڭدەسسسىز دەپ تانىلدى. باسقا دا حالىقارالىق دودالاردا دارا تالانتىمەن وقشاۋلانىپ, ولجاعا كەنەلدى.
2020 جىلدىڭ كوكتەمىندە نەپومنياششي «ۇمىتكەرلەر تۋرنيرىنە» قاتىستى. سول جارىستا ول فرانتسيالىق ماكسيم ۆاشە-لاگراۆمەن بىرگە جارىس كەستەسىندە كوش باستاپ تۇرعان ەدى. الايدا كۇللى الەمدى دۇرلىكتىرگەن كوروناۆيرۋستىڭ كەسىرىنەن ايتۋلى دودا كەيىنگە شەگەرىلىپ, ول تەك بيىلعى جىلدىڭ كوكتەمىندە عانا ءوز جالعاسىن تاپتى. بۇل جولى رەسەيلىك شاحماتشى قارسىلاس شىداتپاي, «ۇمىتكەرلەر تۋرنيرىندە» باس جۇلدەنى ولجالادى.
الەم چەمپيونى اتاعى ءۇشىن تارتىس اعىمداعى جىلدىڭ 24 قاراشاسى مەن 16 جەلتوقسان ارالىعىندا بىرىككەن ارابتار امىرلىگىنىڭ دۋباي قالاسىندا وتەدى. بۇل باسەكەدە داڭقتى ماگنۋس كارلسەندى قاپى قالدىرۋ ءۇشىن يان نەمپومنياششيگە كوپ تەر توگۋگە تۋرا كەلەدى. ويتكەنى, 30 جاستاعى نورۆەگيالىق شاحماتشى قازىر ناعىز بابىندا. 2013 جىلى العاش رەت چەمپيوندىق ءتاجدى يەلەنگەن كارلسەن كۇنى بۇگىنگە دەيىن سول تۇعىرىنان ەش تومەندەگەن ەمەس. قانداي جارىسقا قاتىسسا دا, ول ۇنەمى الدىڭعى لەكتەن كورىنۋدە. ال 2020 جىلدىڭ قاڭتارىندا ماگنۋس رەكوردتىق ناتيجەگە يەك ارتتى. سكانديناۆيانىڭ ساڭلاعى قاتارىنان 111 پارتيادا ەشكىمنەن جەڭىلگەن جوق. اقىرى ءوزىنىڭ بۇل كورسەتكىشىن 125-كە دەيىن جەتكىزدى. بىلتىرعى جىلدىڭ قازان ايىندا وتكەن «Altibox Norway Chess» تۋرنيرىندە كارلسەننىڭ جەڭىسپەن ورىلگەن سەرياسى ءۇزىلدى. ءوز ەلىندە ول پولشالىق يان-كشيشتوف دۋداعا ەسە جىبەردى.
