ءحىح عاسىردا قولدانىلعان مىلتىقتى پوليتسياعا ريددەر قالاسىنىڭ تۇرعىنى الىپ كەلگەن. سوت-بالليستيكالىق ساراپتاما ناتيجەسى كورسەتكەندەي, بۇل قارۋ تۋلا قارۋ-جاراق زاۋىتىندا شىعارىلىپتى. شەبەر ن.كۋراكوۆتىڭ 1889 جىلى جاساعان قوس ۇڭعىلى, شۇرىپپەلى قارۋى – اڭشى مىلتىعى ەكەن. ءبىر قىزىعى, 130 جىل بولعان مىلتىق ەكى ۇڭعىدان دا اتۋعا جارامدى.
قارۋدى تاپسىرعان ەر ادامنىڭ ايتۋىنشا, سيرەك كەزدەسەتىن مىلتىقتى مارقۇم اناسىنىڭ قويماسىنداعى ەسكى زاتتاردى جيناستىرىپ ءجۇرىپ تاۋىپ العان. كريميناليستەر ايتقانداي, عاسىر وتسە دە مىلتىق ءباز-باياعى قالپىندا. بۇل قۇندى قارۋ ءۇشىن ريددەرلىك تۇرعىنعا كوميسسيا قۇرامى 60 مىڭ تەڭگەدەن استام قارجى تولەيدى.
ال التاي اۋدانىنىڭ تۇرعىنى پوليتسياعا ەكىنشى دۇنيەجۇزىلىك سوعىسى كەزىندە پايدالانىلعان تاپانشانى تاپسىرعان. ماگازينىندە ءۇش پاترونى دا بار. ساراپتاما جۇمىستارى كورسەتكەندەي, بۇل قارۋ 1900 جىلى جاسالعان. 7,65 مم كاليبرلى, زاۋىتتىق ءنومىرى «166710», ياعني «براۋنينگ» جۇيەسىنە جاتاتىن ويىق اتىس قارۋ. ءبىر ەرەكشەلىگى, وزدىگىنەن وقتالادى. بۇل قارۋ دا اتۋعا جارامدى.
ايتا كەتسەك, تاپانشا ەكىنشى دۇنيەجۇزىلىك سوعىسى كەزىندە اقش پەن بەلگيا ارمياسىنىڭ قولىندا بولعان ەكەن. اۋدان تۇرعىنى ونى ارداگەر اتاسىنىڭ جەرتولەسىنەن تاپقان.
– حالىقتان زاڭسىز ساقتالعان اتىس قارۋى مەن وق-دارىلەردى ساتىپ الۋ جونىندەگى كوميسسيا قۇرامى ەر ادامعا قارۋ ءۇشىن
120 000 تەڭگەدەن استام قاراجات تولەيدى. وسىلايشا, ءۇش كۇن ىشىندە تىركەلمەگەن قارۋ مەن وق-دارىلەردى ەرىكتى تۇردە تاپسىرۋ اكتسياسى كەزىندە حالىقتان 7 ملن تەڭگەگە 110 بىرلىك قارۋ قابىلداندى, – دەدى پوليتسيا دەپارتامەنتىنىڭ باستىعى ساعات ماديەۆ.
ەستەرىڭىزگە سالا كەتسەك, 20 ساۋىردەن باستاپ وبلىس اۋماعىندا حالىقتان اتىس قارۋلارىن, وق-دارىلەردى جانە جارىلعىش زاتتاردى ساتىپ الۋ بويىنشا رەسپۋبليكالىق اكتسيا ءوتىپ جاتىر.
شىعىس قازاقستان وبلىسى
