اقتوبە وبلىسىندا بۇگىندە 90-نان استام ەتنوس وكىلدەرى تۇرادى. ءار كەزەڭدە قازاق جەرىنە كەلىپ, وسى جەردە ءوسىپ-ونگەن ەتنوستاردىڭ ۇرپاقتارى قوعامدىق كەلىسىم مەن تاتۋلىقتىڭ شىنايى ۇلگىسىن كورسەتىپ ءجۇر. قازاقستان حالقى وبلىستىق اسسامبلەياسىنىڭ جانىندا 17 ەتنومادەني بىرلەستىك تىركەلگەن. سولاردىڭ ىشىندە قازىرگى ۋاقىتتا تاتار-باشقۇرتتاردىڭ – «شاتلىق», نەمىستەردىڭ – «ۆوزروجدەنيە», ۋكراينداردىڭ – «وكسانا», پولياكتاردىڭ – «سۆەتلو», گرەكتەردىڭ – «ەللادو», چەشەندەردىڭ «ۆايناح» ەتنومادەني بىرلەستىكتەرى ماڭىزدى دا اۋقىمدى شارالارعا بەلسەنە اتسالىسىپ ءجۇر.
قازاقستاننىڭ دامۋىنا شىن تىلەكتەستىكپەن قاراپ, وسى جولدا ايانباي ەڭبەك ەتىپ جۇرگەن ازاماتتار قاتارى دا كوپ. بۇل رەتتە وبلىستىق ءماسليحات دەپۋتاتى سەرگەي ۆيشنياك تۋرالى ەرەكشە ايتۋعا بولادى. ول اۋىل شارۋاشىلىعىنداعى تۇيتكىلدى ماسەلەلەردى كوتەرىپ, جايىلىمدىق جەرلەردى ساقتاۋ, جۇمىسسىز ازاماتتاردىڭ كاسىپكەرلىكپەن اينالىسۋىنا جاردەمدەسىپ, جاقسى ۇسىنىستار كوتەرىپ جۇرگەن پاتريوت ازامات.
سونداي-اق بالا تاربيەسى مەن وتباسى بىرلىگىن ساقتاۋ ماسەلەسىندە اقتوبەلىك انالارعا شىن مانىندە اقىل-كەڭەسىمەن دە, اقىل-پاراساتىمەن دە ونەگە كورسەتىپ جۇرگەن وبلىستىق اسسامبلەيا مۇشەلەرى از ەمەس. وسى جۇمىستى ۇيىمداستىرۋ وبلىستىق اسسامبلەيا جانىنداعى انالار كەڭەسىنە جۇكتەلگەن. بۇگىنگى كۇنى اتالعان كەڭەس قۇرامىنا 12 وزگە ەتنوس وكىلدەرى كىرگەن. ولار قازىرگى ۋاقىتتا انا مەن بالانىڭ قارىم-قاتىناسى, وتباسىنداعى زورلىقتى توقتاتۋ ماسەلەسىمەن تۇراقتى تۇردە اينالىسىپ كەلەدى. ماسەلەن, مارتوك اۋدانىنان –امانتۇرليەۆتەر, تەمىر اۋدانىنان – ۋكراين شەتيحيندەر, اقتوبە قالاسىنان – چەشەن بايساەۆتار بالا تاربيەسى مەن وتباسى اۋىزبىرشىلىگى جونىندە كوپبالالى انالارمەن مازمۇندى اڭگىمەلەر وتكىزىپ تۇرادى. قيىن جاعدايدا قالعان ايەلدەرگە شىن مانىندە پسيحولوگيالىق كومەك كورسەتىپ, كوبىن اجىراسۋدان قۇتقارىپ قالدى. جەرگىلىكتى تەلەۆيزيادا كوپبالالى وتباسىلاردىڭ كۇندەلىكتى تىنىس-تىرشىلىگى تۋرالى حابار ۇيىمداستىرىلىپ, بالا تاربيەسىندەگى تاجىريبەلەرى جۇرتشىلىققا كەڭىنەن ناسيحاتتالدى.
اقتوبە وڭىرىندە تۇراتىن ءتۇرلى ەتنوس وكىلدەرى جاستارىنىڭ اراسىندا قازاق ءتىلىن ۇيرەنۋگە دەگەن قۇلشىنىس جوعارى ەكەندىگىن ايتا كەتكەن ءجون. سونىڭ ىشىندە مەكتەپ, كوللەدج وقۋشىلارى قازاق تىلىندە وتەتىن ادەبي سايىستاردان قالمايدى. اسىرەسە, اقپان ايىندا وبلىستىق اسسامبلەيا مۇشەلەرى اراسىندا اباي ولەڭدەرىن جاتقا وقۋدان سايىس ۇيىمداستىرىلعاندا وعان وزگە ەتنوستاردىڭ 37 جاس وكىلى قاتىسۋعا ءوتىنىش ءبىلدىردى. باس جۇلدەنى يەلەنگەن «ۆايناح» چەشەندەر ەتنومادەني بىرلەستىگىنىڭ مۇشەسى ماككا ماجيدوۆا ابايدىڭ بىرنەشە ولەڭى مەن قارا ءسوزىن جاتقا وقىپ قانا قويماي, دانالىق عيبراتتارىن قازاق تىلىندە جاتىق تىلمەن ءتۇسىندىرىپ بەردى. ودان ازەربايجان ەتنومادەني بىرلەستىگىنىڭ مۇشەسى ازيزوۆ يسپار, «وكسانا» كلۋبىنىڭ مۇشەسى ەلەنا زاپار, كورەي ەتنومادەني بىرلەستىگىنىڭ مۇشەسى انگەلينا كيم, «ۆيارا» بولگار ەتنومادەني بىرلەستىگىنىڭ مۇشەسى كسەنيا مارينوۆا, «داعىستاندىقتار» بىرلەستىگىنىڭ مۇشەسى تامارا دايكوۆا دا قالىسقان جوق. ال مۇقاعالي ماقاتاەۆتىڭ 90 جىلدىعىنا وراي وتكىزىلگەن جىر سايىسىنا «ۆيارا» بولگار ەتنومادەني بىرلەستىگىنىڭ مۇشەلەرى ەرەكشە دايىندىقپەن كەلدى. ولار مۇقاعالي جىرلارىنان قويىلىم كورسەتىپ, اقىن ولەڭدەرىن مانەرلەپ وقىدى. ايتا كەتكەن ابزال, وبلىسىمىزدا تۇراتىن ءتۇرلى ەتنوس وكىلدەرىنىڭ بالالارى ءوز بولاشاعىن قازاقستانمەن بايلانىستىراتىندارىن جاسىرمايدى. سول ءۇشىن دە وزگە ەتنوس جاستارى مەملەكەتتىك ءتىلدى مەڭگەرىپ قانا قويماي, قازاق پوەزياسى مەن تاريحىن تەرەڭدەپ وقۋ ارقىلى تانىم-تۇسىنىكتەرىن مولايتۋدى كوزدەيدى. ويتكەنى ەلىمىزدەگى ەتنوسارالىق قارىم-قاتىناستاردىڭ دايەكتىلىگى, كاسىپكەرلىكتىڭ دامۋىنا جاسالىپ جاتقان قولايلى مۇمكىندىكتەر, ءبىلىم سالاسىنداعى يننوۆاتسيالار ءوزارا سىيلاستىق پەن ىنتىماقتاستىققا نەگىزدەلگەن قازاقستان قوعامىنىڭ بولاشاعىنىڭ زور ەكەندىگىن دالەلدەيدى. تەك ول ءۇشىن ەڭبەك ەتىپ, زاماناۋي ءبىلىم الىپ, ابايشا ايتقاندا, «كەتىگىن تاپ تا, بار قالان» ومىرلىك قاعيداسىن تەمىرقازىق ەتىپ ۇستانعان ءجون.
مارجان قورعانباەۆا,
اقتوبە وبلىستىق قازاقستان حالقى اسسامبلەياسى حاتشىلىعىنىڭ مەڭگەرۋشىسى
