تاۋارلىق گازدىڭ شەكتى كوتەرمە ساۋدا باعاسى جەر قويناۋىن پايدالانۋشىلاردان ساتىپ الىناتىن گاز باعالارىنان, گازدى تاسىمالداۋ جانە گازدى جەراستى قويماسىندا ساقتاۋ شىعىستارىنان, سونىمەن قاتار رەنتابەلدىلىك نورماسىنان تۇرادى.
سىعىمدالعان جانە سۇيىتىلعان تابيعي گاز ءوندىرۋ ءۇشىن تاۋارلىق گازدى ساتىپ الاتىن ونەركاسىپتىك تۇتىنۋشى-ينۆەستورلارعا تاۋارلىق گازدىڭ شەكتى باعالارى گازدىڭ وزىندىك قۇنىنان تۇرادى.
قازىرگى ۋاقىتتا ىشكى نارىقتا تاۋارلىق گازعا بەكىتىلگەن شەكتى كوتەرمە ساۋدا باعالارى جەتكىزىلەتىن گازدىڭ وزىندىك قۇنىنان تومەن ەكەندىگىن اتاپ وتكەن ءجون. 2019 جىلعى 1 قاڭتاردان باستاپ مينيسترلىك تاۋارلىق گازدىڭ شەكتى كوتەرمە ساۋدا باعالارىن وڭىرگە بايلانىستى 3,8-دەن 17,5%-عا دەيىن تومەندەتتى جانە وسى ۋاقىتقا دەيىن كوتەرگەن جوق.
بەكىتىلگەن شەكتى كوتەرمە ساۋدا باعالارى گاز جانە گازبەن جابدىقتاۋ سالاسىنداعى ۇلتتىق وپەراتور «قازترانسگاز» اق ءۇشىن شىعىندى بولىپ تابىلادى. 2015-2020 جىلدار ارالىعىندا ۇلتتىق وپەراتوردىڭ ىشكى نارىقتى سۋبسيديالاۋ شىعىندارى شامامەن 425 ملرد تەڭگەنى, ونىڭ ىشىندە تەك سوڭعى ەكى جىل ىشىندەگى (2019-2020جج.) شىعىندار سوماسى 225,6 ملرد تەڭگەنى قۇرادى. وسىلايشا, تاۋارلىق گازدىڭ اعىمداعى باعالارىن ۇلتتىق وپەراتور سۋبسيديالايدى.
وسى ءماجبۇرلى قولداۋ شاراسى گاز سالاسىن تۇراقتى دامىتۋدىڭ تەجەۋشى فاكتورى بولىپ تابىلادى.
رەسپۋبليكانى ىشكى گازبەن جابدىقتاۋ جۇزەگە اسىرىلاتىن نەگىزگى ماگيسترالدار كەڭەس ۋاقىتىندا سالىندى, بەلگىلەنگەن رەسۋرستارىن وتەدى جانە وتە توزعان.
ۇلتتىق وپەراتوردىڭ اقپاراتى بويىنشا, تەك سوڭعى بەس جىلدىڭ ىشىندە قازاقستان رەسپۋبليكاسىنىڭ گاز تاسىمالداۋ جۇيەسىندە شامامەن 67 مىڭ اقاۋ انىقتالىپ, بۇگىنگى كۇنى ونىڭ تەك 9 مىڭى جويىلدى.
اتالعان جاعداي ەلدىڭ گاز تاسىمالداۋ جۇيەسىن قالپىنا كەلتىرۋ جانە دامىتۋعا قاجەت تاريفتەردى وسىرۋگە جول بەرمەي ۇستاپ تۇرۋ سالدارىنان قالىپتاستى. بۇل ناتيجەسىندە شەكتىك اقاۋلار سانىنىڭ ۇلعايۋىنا جانە گاز تاسىمالداۋ ينفراقۇرىلىمى اپاتتىلىعىنىڭ جوعارى تاۋەكەلىنىڭ ساقتالۋىنا اكەپ سوعادى.
وسىلايشا, گاز تاريفتەرىن ۇستاپ تۇرۋ نەمەسە تومەندەتۋ كەلەشەكتە ەلىمىزدەگى ءتۇرلى زالالعا اكەپ سوعۋى مۇمكىن.
ەنەرگەتيكا مينيسترلىگى قازاقستان رەسپۋبليكاسىنىڭ ىشكى نارىعىندا تاۋارلىق گازدىڭ شەكتى كوتەرمە ساۋدا باعالارىن, ونىڭ ىشىندە تاۋارلىق گازدى سىعىمدالعان جانە (نەمەسە) سۇيىتىلعان تابيعي گاز ءوندىرۋ ءۇشىن ساتىپ الاتىن ونەركاسىپتىك تۇتىنۋشى-ينۆەستورلار ءۇشىن 2021 جىلعى 1 شىلدەدەن باستاپ 2022 جىلعى 30 ماۋسىمدى قوسا العان كەزەڭگە ارنالعان شەكتى باعالارىن بەكىتۋدى جوسپارلايدى. جوعارىدا جازىلعاننىڭ نەگىزىندە, تاۋارلىق گازدىڭ شەكتى كوتەرمە ساۋدا باعاسىن 15%-عا دەيىن ۇلعايتۋدى كوزدەيتىن بۇيرىق جوباسى دايىندالدى. بۇيرىق «اتامەكەن» ۇلتتىق پالاتاسى مەن مەملەكەتتىك ورگانداردا جاريا تالقىلاۋدا.
