ەلوردا • 27 ءساۋىر، 2021

نۇر-سۇلتان مەكتەپتەرىندە ماسكانىڭ بولۋىن انىقتايتىن تەحنولوگيا ىسكە قوسىلدى

27 ساۋىردە ەكى ەلوردالىق مەكتەپتە بەت-الپەتتى تانۋ جۇيەسى ىسكە قوسىلدى، ول بىردەن تەمپەراتۋرانى ولشەپ، ماسكانىڭ بولۋىن تەكسەرەدى، دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.

Marzhan Tileubekova

قازاقستاندىق ازىرلەمە دەرەكتەر بازاسىندا تىركەلمەگەن ادامداردىڭ مەكتەپكە كىرۋىن شەكتەيدى، سول سياقتى وقۋشىلاردىڭ، وقىتۋشىلاردىڭ جانە بارلىق قىزمەتكەرلەردىڭ كەلىپ-كەتۋ ۋاقىتىن قاداعالاۋىنا مۇمكىندىك بەرەدى.

«بۇل ازىرلەمە بىردەن بىرنەشە ماسەلەنى شەشۋگە مۇمكىندىك بەرەدى: قاۋىپسىزدىكتى دە، كەلگەن جۇرتتى باقىلاۋدى دا قامتاماسىز ەتەدى. قازىرگى ۋاقىتتا وتاندىق ازىرلەۋشىلەردىڭ 200-دەن استام كليەنتى بار، ولاردىڭ 80%-ى قازاقستان اۋماعىندا، قالعاندارى رەسەي، ۋكراينا، وزبەكستان، فيليپپين، سينگاپۋر، يندونەزيا جانە ءۇندىستاننان كەلگەن»، دەيدى Clockster وكىلى ارمان ەرنازاروۆ.

قازاقستاندىق Clockster ازىرلەمەسى — جۇمىس ۋاقىتىن ەسەپكە الۋعا ارنالعان HR-جۇيە. بۇل ىڭعايلى، ويتكەنى ول ءار ءتۇرلى بيومەتريالىق قۇرىلعىلارمەن بىرىكتىرىلۋى مۇمكىن. ازىرلەۋشىلەردىڭ ايتۋىنشا، Clockster جۇيەسى ەرەكشە، ويتكەنى كومپانيا بازاسىندا مالىمەتتەر بولماعان كەزدە جۇيە ادامنىڭ بەت بيومەترياسىن تانىمايدى جانە ونى عيماراتقا كىرگىزبەيدى. ازىرلەمە پيلوتتىق جوبا اياسىندا ەلوردانىڭ №22 جانە №59 مەكتەپتەرىندە ىسكە قوسىلدى.

«بالالاردىڭ قاۋىپسىزدىگىن قامتاماسىز ەتۋ – بۇل ءبىرىنشى كەزەكتەگى مىندەت. مەكتەپكە كىرگىزەتىن كارتالار ۇنەمى جوعالادى نەمەسە بوتەن ادامنىڭ قولىنا ءتۇسىپ قالۋى مۇمكىن. ال Clockster جۇيەسى ەشقانداي كارتانى كەرەك ەتپەيدى، تەك بازادا ءسىز تۋرالى اقپارات بولۋى قاجەت. جۇيەنىڭ تاعى ءبىر ەرەكشەلىگى - بالانىڭ ساباققا قاتىسۋى تۋرالى حابارلاما مەكتەپ باسشىلىعى مەن اتا-انالارىنا بىردەن كەلەدى. دەرەكتەردىڭ ساقتالۋىنا Clockster جانە دەرەكتەردىڭ يەلەرى بولىپ سانالاتىن پايدالانۋشىلاردىڭ وزدەرى جاۋاپتى بولادى»، دەدى «Astana Innovations» اق باسقارما توراعاسى ادىلەت نۇرعوجين.

ء«بىزدىڭ جوبا 2020 جىلى «كيبەر شابۋىلداردى تالداۋ جانە تەرگەۋ ورتالىعىندا» وسالدىقتاردى تابۋعا تەستىلەۋدەن ءوتتى، ولاردىڭ ۇسىنىستارى بويىنشا بارلىق ىقتيمال وسالدىقتار جويىلدى»، دەيدى ارمان ەرنازاروۆ.

ايتا كەتەيىك، Astana Innovations نۇر-سۇلتان قالاسىنىڭ اكىمدىگىمەن بىرلەسىپ، ەلوردا تۇرعىندارى مەن قوناقتارىنىڭ تۇرۋى ءۇشىن قولايلى جانە جايلى جاعداي جاسايدى. وسىلايشا، «اقىلدى اۋدان» جوباسى اياسىندا Astana Innovations ەنگىزۋگە دايىن شەشىمدەرى بار كومپانيالاردى تابادى. ناتيجەلەر ءساتتى بولعان جاعدايدا جۇيەنى ەلوردانىڭ باسقا مەكتەپتەرىندە دە ورناتۋ ۇسىنىلادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز