جاڭا قۇرىلىم العاشقى قادامىن ەلوردا مەن وزگە وڭىرلەردە مەديتسينا قىزمەتكەرلەرىنىڭ ەڭبەگىن باعالاپ, العىس رەتىندە ازىق-ت ۇلىك سالىنعان سەبەتتەر تاراتۋمەن باستادى. وندا كەز كەلگەن تاعام ەمەس, دارىگەرلەردىڭ كەڭەسىمەن تاڭدالعان پايدالى, ۆيتامينگە باي جەمىستەر بار.
Jas Otan جاستار قاناتىنىڭ توراعاسى نۇرجان جەتپىسباەۆ بۇل قوزعالىس ەلىمىزدىڭ بارلىق بەلسەندى جانە جاناشىر جاستارىن بىرىكتىرەتىنىنە سەنىمدى.
– بۇگىن ءبىز Jas Otan جانىندا قۇرىلىپ جاتقان Biz Birgemiz! ۆولونتەرلەر قوزعالىسىنىڭ ىسكە قوسىلعانىن مالىمدەيمىز. Nur Otan پارتياسىنىڭ كوشباسشىسى, ەلباسى نۇرسۇلتان نازارباەۆ ۆولونتەرلىك قىزمەتپەن اينالىساتىن جاستاردى قولداۋدى تاپسىرعان ەدى. ماسەلەن, ستيپەنديانى ۇلعايتۋ نەمەسە ەرىكتىلىكتى ەڭبەك وتىلىندە ەسەپكە الۋ سەكىلدى شەشىمدەردى اتاپ وتۋگە بولادى. بۇل قوزعالىس وسى جۇمىستى جۇيەلەۋگە جانە باقىلاۋعا مۇمكىندىك بەرەدى,– دەيدى ۇيىم جەتەكشىسى.
سونىمەن قاتار پاندەميا كەزىندە قايىرىمدى جانداردىڭ يگى ىستەرى ۆولونتەرلىك قىزمەتتىڭ قانشالىقتى ماڭىزدى ەكەنىن كورسەتكەندەي. Jas Otan توراعاسى ۇيىمنىڭ 2025 جىلعا دەيىنگى «جاستار – وتانعا!» باعدارلاماسىندا ۆولونتەرلىك قىزمەتكە ەرەكشە كوڭىل بولىنگەنىن اتاپ ءوتتى. قۇجاتتا كورسەتىلگەن مىندەتتەرگە سايكەس, 2025 جىلعا دەيىن ۆولونتەرلىكپەن تۇراقتى تۇردە اينالىساتىن جاستاردىڭ 3,5 پايىزىن قامتۋ جوسپارلانعان ەكەن. بۇل – بۇكىل ەل بويىنشا شامامەن 100 مىڭ ادام.
Biz Birgemiz! قوزعالىسىنىڭ اتاۋى ەلباسىنىڭ باستاماسىمەن باستاۋ العان وتكەن جىلعى رەسپۋبليكالىق اكتسيانىڭ جالعاسى ەكەنىن ايتا كەتكەن ءجون. وتكەن جىلى بۇل اكتسياعا بۇكىل ەل بويىنشا 5 مىڭنان استام ۆولونتەر تارتىلعان. نۇرجان جەتپىسباەۆتىڭ ايتۋىنشا, وسى ەرىكتىلەرمەن جۇيەلى جۇمىستى ودان ءارى جالعاستىرۋ جوسپاردا بار.
العاشقى ءىس-شارا كەزىندە جاسوتاندىقتار مەن Biz Birgemiz! ۆولونتەرلەرى نۇر-سۇلتان قالاسى اكىمدىگىنىڭ كوپسالالى مەديتسينالىق ورتالىعىنا بارىپ, دارىگەرلەردىڭ ەرەن ەڭبەگى ءۇشىن «العىس سەبەتتەرىن» ۇسىندى. ۆولونتەر اقەركە ەسكەندىروۆا پاندەميامەن العى شەپتە كۇرەسكەن مەديتسينا قىزمەتكەرلەرىنە قولداۋ ارتىق ەتپەيتىنىن العا تارتتى.
– ءبىز بۇل ارەكەتىمىزبەن قىزمەتىنە ادال دارىگەرلەرگە شەكسىز العىسىمىزدى بىلدىرگىمىز كەلدى. سەبەبى ولاردىڭ كۇردەلى جاعدايدا الەمدى جاۋلاعان ىندەتپەن كۇرەسىپ جاتقاندارىنا ءبىر جىلدان استى. بۇل كىمدى بولسىن قاجىتاتىنى تۇسىنىكتى. الايدا سەرتىنە بەرىك ابزال جانداردىڭ ناۋقاستاردى تالماي ەمدەپ جاتقانىن كورىپ وتىرمىز, – دەيدى ۆولونتەر.
الداعى كۇندەرى ەلىمىزدىڭ بارلىق وڭىرىندە 500-دەن استام ەرىكتى ءوز وتباسىلارىنان وقشاۋلانۋعا ءماجبۇر بولعان 1700 مەديتسينا قىزمەتكەرىنە «العىس سەبەتتەرىن» سىيعا تارتادى.
ايتا كەتۋ كەرەك, وتكەن جىلى مەديتسينا قىزمەتكەرلەرىن قولداۋعا باعىتتالعان «دارىگەرلەرگە مىڭ العىس» رەسپۋبليكالىق اكتسياسىنا 600-دەن استام جاسوتاندىق بەلسەندى قاتىسىپ, 6 500-دەن استام ازىق-ت ۇلىك سەبەتى ۇلەستىرىلگەن ەدى. ونىڭ ىشىندە 1,5 توننادان استام قىمىز, 150 ليتر شۇبات جانە 11,5 توننادان استام سۋ بولدى. جالپى, بىلتىر 7 مىڭعا جۋىق مەديتسينا قىزمەتكەرى مەن 100-دەن استام اۋرۋحانا قامتىلعان-دى.
