ەلىمىزدە 1 اقپاننان باستاپ ۆاكتسينالاۋ باستالعانى بەلگىلى. 23 ساۋىردەگى جاعداي بويىنشا 823 498 ادام ءبىرىنشى كومپونەنتپەن, 132 603 ادام ەكىنشى كومپونەنتپەن ەگىلدى. يممۋنداۋ كۋرسى 21 كۇندىك ينتەرۆالمەن ەكى كەزەڭنەن تۇرادى.
ۆاكتسينا العان ادامداردىڭ 0,4 پايىزىندا بولۋى مۇمكىن رەاكتسيالار تىركەلدى. بۇل تۋرالى دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ ۇلتتىق ورتالىعىنىڭ «سانيتاريالىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعى» فيليالى ديرەكتورىنىڭ ورىنباسارى مانار سماعۇل ءمالىم ەتتى.
«ۆاكتسينانىڭ ءبىرىنشى كومپونەنتىن سالدىرعان سوزىلمالى اۋرۋى بار ادامدار سانى 32 314-كە جەتتى. ۆاكتسينالاۋدىڭ تولىق كۋرسىن (ەكىنشى كومپونەنتىن) العان وسى ساناتتاعى سوزىلمالى اۋرۋى بار ادامداردىڭ سانى 8 397-ءنى قۇرادى», دەدى م. سماعۇل. ونىڭ ايتۋىنشا, 60 جاستان اسقان ادامداردىڭ اراسىندا يممۋنداۋ كۋرسىن 121 مىڭنان استام ادام باستادى جانە ونىڭ تولىق كومپونەنتىن 8 مىڭى اياقتادى.
«قازىرگى كەزدە يممۋنداۋدان كەيىن كۇردەلى قولايسىز بەلگىلەر تىركەلمەدى. سونىمەن بىرگە ۆاكتسينا العان ادامداردىڭ 0,4 پايىزىندا بولۋى مۇمكىن رەاكتسيالار تىركەلدى, ياعني تەمپەراتۋرا, ەكپە جاساعان جەردىڭ قىزارۋى مەن اۋىرسىنۋى سەكىلدى جالپى بەلگىلەر بايقالدى», دەدى م.سماعۇل.
قوعامدىق دەنساۋلىق ساقتاۋ ۇلتتىق ورتالىعى باسقارما توراعاسىنىڭ ورىنباسارى ايناگۇل قۋاتباەۆا مەديتسينا قىزمەتكەرلەرى QazVac ۆاكتسيناسىن ەگۋ تارتىبىمەن جانە نۇسقاۋلىقتارمەن تانىستىرىلعانىن تىلگە تيەك ەتتى.
«مەديتسينالىق ۇيىمدارعا جەتكىزۋ جاعدايىنا قاراي 26 ساۋىردەن باستاۋ جوسپارلانىپ وتىر. قازىرگى كەزدە مەديتسينا قىزمەتكەرلەرىن نۇسقاۋلىقپەن تانىستىرۋ ءجۇرىپ جاتىر. ياعني ەكپەنى سالقىنداتۋ رەجىمى, ونى ەگۋ ءتارتىبى ءتۇسىندىرىلىپ وتىر», دەدى ا.قۋاتباەۆا.
ءوز كەزەگىندە م.سماعۇل قازىرگى ۋاقىتتا مينيسترلىك وڭىرلەر بويىنشا ءتيىستى جۇمىستاردى پىسىقتاعانىن اتاپ ءوتتى.
«حالىقتىڭ ورنالاسۋ تىعىزدىعىنا بايلانىستى 1 مىڭنان 3 مىڭعا دەيىنگى دوزا ۆاكتسينا تاراتىلادى. ياعني بۇل ۆاكتسينا بارلىق وڭىردە بولۋى كەرەك. ەرتەڭنەن باستاپ كەيبىر وڭىرلەردىڭ مەديتسينالىق ۇيىمدارى وسى ۆاكتسينانى الۋى مۇمكىن. جالپى, دۇيسەنبىدەن باستاپ ۆاكتسينا ءتيىستى مەديتسينالىق ۇيىمدارعا تاراتىلادى», دەدى م.سماعۇل.
بۇدان بۇرىن حابارلانعانداي, جاقىندا قازاقستاندىق QazVac ۆاكتسيناسىنىڭ العاشقى پارتياسى جونەلتىلدى. QazVac ۆاكتسيناسىنىڭ العاشقى 50 مىڭ دوزاسى «سق-فارماتسيانىڭ» حابتارىنا تاراتىلىپ, ودان ءارى ەلىمىزدىڭ بارلىق وڭىرىندەگى دەنساۋلىق ساقتاۋ باسقارمالارىنىڭ قويمالارىنا جەتكىزىلەتىن بولادى. مامىر ايىندا 50 مىڭ دوزا كولەمىندەگى ۆاكتسينانىڭ كەزەكتى پارتياسىن شىعارۋ جوسپارلانۋدا. بۇدان ءارى ۆاكتسينا ءوندىرىسى كەزەڭ-كەزەڭمەن ايىنا 500-600 مىڭ دوزاعا دەيىن ۇلعايتىلادى.
جيىن بارىسىندا ماماندار جۇكتىلىكتى ۆاكتسينالاۋدان كەيىن 2 اي وتكەن سوڭ جوسپارلاۋعا بولاتىنىن جەتكىزدى.
«بۇل تاقىرىپ كوپتى ويلاندىرىپ جۇرگەنى بەلگىلى. قازىرگى كەزدە ۆاكتسينانى الۋدى نەمەسە جۇكتىلىكتى جوسپارلاپ وتىرعان ايەلدەردىڭ ساۋالىنا توقتالساق, جۇكتىلىكتى ۆاكتسينادان كەيىن 2 اي وتكەن سوڭ جوسپارلاۋعا بولادى. سەبەبى اعزادا تولىق يممۋنيتەت قالىپتاسادى. ەرىكتىلەردىڭ اراسىندا جۇكتى ايەلدەردىڭ بولماۋىنا بايلانىستى بۇل ۆاكتسينانىڭ جۇكتى ايەلدەردىڭ اعزاسىندا قالاي جۇرەتىنى تۋرالى عىلىمي مالىمەتىمىز جوق. سوعان بايلانىستى وسىنداي شەشىم قابىلدانىپ وتىر», دەدى ا.قۋاتباەۆا.
ونىڭ ايتۋىنشا, ۋاقىت وتە كەلە عىلىمي جۇمىستاردىڭ ناتيجەسىنە بايلانىستى بۇل باعىتتاعى تاسىلدەر وزگەرۋى مۇمكىن.
