– قاسيەتتى رامازان ايىندا قايىرىمدىلىق ءىس-شاراسىن ۇزدىكسىز وتكىزۋدى جوسپارلاپ, وسى باعىت بويىنشا جۇيەلى شارالار ۇيىمداستىرىپ جاتىرمىز. بۇل يگى ىسكە اۋدان, قالا مەشىتتەرى, ەرىكتى جاستار, جاماعات وكىلدەرى, جالپى ءدىن قىزمەتكەرلەرى اسا بەلسەندى قاتىسۋدا, – دەيدى وسكەمەن ايماعى «زەكەت جانە قايىرىمدىلىق قورىنىڭ» جاۋاپتى وكىلى بەرىك كادىر ۇلى.
رامازاننىڭ العاشقى اپتاسىندا وڭىردەگى قايىرىمدىلىقتى تالداپ قارايتىن بولساق, ءبىر شاكىرتتىڭ وقۋ اقىسى تولەندى جانە «قولدان قولعا» جوباسىمەن 15 ادامعا زەكەت تاراتىلدى. سونىمەن قاتار ۇلان اۋداندىق «مۇسا بابا» مەشىتى قارتتار ۇيىنە ۇلكەن كومەك كورسەتتى. شىعىس قازاقستان وبلىسى كوكپەكتى اۋدانىندا ەكى ءىرى قارا, ءۇش قوي قۇربان شالىنىپ, ەتى تاراتىلدى. يگى شارا الداعى ۋاقىتتا دا جۇيەلى تۇردە جالعاسىن تابادى.
