ءىس-شارادا ءسوز العان مينيستر تابيعاتتى ايالاۋ, قۇرمەتتەۋ فيلوسوفياسى ءبىز ءۇشىن جات ۇعىم ەمەس ەكەنىن اتاپ ءوتتى.
– حالقىمىز ءۇشىن «تازالىق» دەگەن – كيەلى ۇعىم. تابيعاتتى ايالاۋ مەن قۇرمەتتەۋ – حالقىمىزدىڭ قانىندا بار قاسيەت. اتا-بابالارىمىز جاس ۇرپاقتى «بۇلاق كورسەڭ, كوزىن اش», «كوك شىبىقتى سىندىرما», «وزەندى لاستاما» دەپ وسىرگەن. الدىڭعى بۋىن ۇلكەندەرىمىز ءبىزدى ۇنەمى وسىلاي تازالىققا تاربيەلەدى. ەندى وسى جاقسى ءداستۇر ساباقتاستىعىن ءۇزىپ الماي, ءبىز دە ءارى قاراي جالعاۋىمىز قاجەت دەپ سانايمىن, – دەدى ايدا بالاەۆا.
ءمينيستردىڭ ايتۋىنشا, ەكولوگيالىق ساۋات اشۋ – جاڭا ۇرپاق تاربيەسىنىڭ ماڭىزدى بولىگى. سوندىقتان بۇل اكتسيا ەلىمىزدىڭ بارلىق ەلدى مەكەنىندە باستالىپ وتىر.
ايدا بالاەۆا قازاقستان پرەزيدەنتى ەكولوگيالىق ءبىلىم مەن تاربيەگە ەرەكشە نازار اۋداراتىنىن, سوعان وراي بىرقاتار مەملەكەتتىك ورگانعا ناقتى تاپسىرما بەرگەنىن اتاپ ءوتتى.
– بۇل وسى سەكىلدى اكتسيالاردىڭ ستراتەگيالىق ماڭىزى زور ەكەنىن كورسەتەدى جانە الداعى ۋاقىتتا قاتارىمىز تولىعا تۇسەرىنە سەنىمدىمىن. ەلىمىزدىڭ جاستار ۇيىمدارىن بىزگە قوسىلۋعا جانە قولداۋعا شاقىرامىن. اكتسيا اياسىندا ۇلكەن اقپاراتتىق جۇمىس تا جۇرگىزىلمەك. Youtube-تا «كيەلى تابيعات» دەپ اتالاتىن ارنانى ىسكە قوسامىز جانە ول ءبىز جۇزەگە اسىراتىن ۇلكەن اعارتۋشىلىق جوبالاردىڭ ءتيىمدى بولۋىنا سەپتىگىن تيگىزەتىن بولادى, – دەدى مينيستر.
وسىدان كەيىن ايدا بالاەۆا اكتسياعا قاتىسىپ, بوتانيكالىق باق اۋماعىنا جاستارمەن بىرگە بىرنەشە ءتۇپ اعاش وتىرعىزدى. ەكولوگيالىق ايلىق 25 ءساۋىر مەن 25 مامىر ارالىعىندا بۇكىل ەل اۋماعىندا جالعاساتىن بولادى. بارلىق ءوڭىردىڭ جاستارى وزەن ارنالارىن تازارتىپ, اۋلالاردى تازالايدى, اعاش ەگىپ, گۇل وتىرعىزادى.
اكتسيانى باستاعان «جاس ۇلان» ۇيىمىنىڭ توراعاسى دينارا سادۋاقاسوۆا بۇل جۇمىسقا وزگە دە جاستار ۇيىمدارىنىڭ جۇمىلاتىنىن ايتتى.
– ءبىر ايدا ساياباقتار مەن سكۆەرلەردى تازالاپ, وزەن-بۇلاقتاردىڭ اينالاسىن قوقىستان تازارتامىز. اعاش ەگىپ, وسىلايشا جاستار اراسىندا قورشاعان ورتانى قورعاۋدى, تابيعاتتى ايالاۋدى دارىپتەيمىز. سەنبىلىكتەردەن بولەك, جاستارعا ارناپ سەمينارلار مەن ترەنينگتەر وتكىزىلەدى. جالپى, بۇل ءىس-شارالار الداعى ءبىر ايمەن شەكتەلىپ قالمايدى. جوبا جىل سوڭىنا دەيىن جالعاسپاق. سونداي-اق مامىردا بالالار مەن جاسوسپىرىمدەرگە ارناپ ەكوتەاتر اشامىز. وندا بىلتىر ەكولوگيالىق تاقىرىپتا جارىق كورگەن «گرينەيكتەر حيكاياسى» ەرتەگىلەر جەلىسىمەن سپەكتاكل قويىلادى. وعان قوسا, بيىل وقيعانىڭ جالعاسىمەن تاعى بەس كىتاپ شىعارامىز. ەلوردالىق جاستار جازدا كەستە بويىنشا تەاترعا كەلىپ, قويىلىمدى تاماشالاي الادى, – دەدى د.سادۋاقاسوۆا.
ءىس-شاراعا قاتىسقان بەلسەندىلەر ەكولوگيا ماسەلەسىنىڭ جاستار اراسىندا وتە وزەكتى ەكەنىن اتاپ ءوتتى. قازىر سۋدى ۇنەمدەۋ, قوقىستى قايتا وڭدەۋگە سۇرىپتاپ سالۋ, تابيعاتقا زيان پلاستيكالىق پاكەتتەن باس تارتۋ نەمەسە قولدانۋدى ازايتۋدى سەكىلدى نارسەلەردى جاستار سانالى تۇردە جاساپ جۇرگەن كورىنەدى.
«الەمدىك ەكولوگيالىق ماسەلەلەردى شەشۋگە ءبىز سەكىلدى جاسوسپىرىمدەر دە قول ۇشىن بەرە الادى. ول قالاي دەسەڭىز, بار بولعانى – قوقىستى كونتەينەرلەرگە سۇرىپتاپ سالۋ. ارينە, وعان قوسا جەردە قوقىس كورگەن جاعدايدا ونى ۇيالماي كوتەرىپ, قوقىس جاشىگىنە تاستاعان دا دۇرىس. «كيەلى تابيعات» رەسپۋبليكالىق جاستار ەكولوگيالىق اكتسياسىنا كەلەر بولساق, بۇل جوبانىڭ جاستار ءۇشىن ماڭىزى وتە زور. سەبەبى ءبىز, جاستار, ءوز جەرىمىزدى, تابيعات-انامىزدى ايالاپ, ساقتاي ءبىلۋىمىز كەرەك. بۇل جوبا قاتىسۋشىلار, ەرىكتىلەر سانى جاعىنان اۋقىمدى بولادى دەگەن ويدامىن. ويتكەنى قازىر جاستار ەكولوگيالىق ماسەلەلەردى, ونىڭ سالدارىن جاقسى بىلەدى. ءبىز وسىلايشا كۇيبەڭ تىرشىلىكپەن قورشاعان ورتانى قورعاۋ, تابيعاتقا دەگەن كۇتىمدى ۇمىتقان جاندارعا وي تاستاعىمىز كەلەدى. كوپ اعاش ەگىپ, تۇرىپ جاتقان جەرىمىزدى كوركەيتۋدى كوزدەيمىز», دەدى «جاس ۇلان» ۇيىمىنىڭ بەلسەندىسى قانات كاناەۆ.
