اتالعان تۋرنيردە باق سىناعان قازاقستان قۇراماسىنىڭ بىلعارى قولعاپ شەبەرلەرى ەكى التىن, ەكى كۇمىس جانە ءۇش قولا مەدال جەڭىپ الدى.
ەل قورجىنىنا العاشقى التىندى وليمپيا ويىندارىندا «قازاقتىڭ سالماعى» اتانىپ كەتكەن 69 كيلوعا دەيىنگى سالماق دارەجەسىندە جۇدىرىقتاسقان اسلانبەك شىمبەرگەنوۆ سالدى. ىرىكتەۋ كەزەڭدەرىندە قارسىلاستارىن ايقىن جەڭگەن جەرلەسىمىز جارتىلاي فينالدا 2018 جىلى دجاكارتادا وتكەن ازيا ويىندارىنىڭ فينالىندا ەسە جىبەرگەن وزبەكستاندىق بوكسشى بوبو-ۋسمون باتۋروۆپەن كەزدەستى. ەسە قايتارۋدى ءۇش جىل كۇتكەن جەرلەسىمىز جەكپە-جەكتە ايانىپ قالعان جوق. گونگ ءۇنى ەستىلگەننەن باستاپ ءبىرىنشى نومىرمەن جۇدىرىقتاسقان شىمبەرگەنوۆ قارسىلاسىن بۇرىش-بۇرىشقا تىقسىرىپ, ءوزىنىڭ سوققىلارىن دىتتەگەن جەرىنە ءدوپ تيگىزىپ جاتتى. شابۋىلدا دا, قورعانىستا دا ساۋاتتى ونەر كورسەتكەن اسلانبەك تورەشىلەردىڭ ءبىراۋىز شەشىمىمەن جەڭىسكە جەتىپ, وزبەك بوكسشىسىنان ازيا ويىندارىندا كەتكەن ەسەسىن قايتاردى.
فينالدىق سايىستا اسلانبەكتى ايگىلى رەسەيلىك بوكسشى اندرەي زامكوۆوي كۇتىپ تۇرعان ەدى. 2012 جىلعى لوندون وليمپياداسىنىڭ جارتىلاي فينالىندا وتانداسىمىز سەرىك ساپيەۆتەن جەڭىلگەن زامكوۆوي قازاقستاندىق جانكۇيەرلەرگە جاقسى تانىس. 2018 جىلدان باستاپ كارەراسىن قايتا جالعاستىرعان ول سول جىلى رەسەي بىرىنشىلىگىندە توپ جارسا, اراعا جىل سالىپ ءوز ەلىندە وتكەن الەم چەمپيوناتىندا جاسىنداي جارقىلدادى. بيىل 34 جاسقا تولاتىن رەسەيلىك بوكسشى الەم بىرىنشىلىگىنىڭ جارتىلاي فينالىندا ەلىمىزدىڭ ءبىرىنشى ءنومىرلى بوكسشىسى ابىلايحان ءجۇسىپوۆتى 5:0 ەسەبىمەن قاپى قالدىرعان ەدى. «گۋبەرناتور كۋبوگىنا» ناعىز بابىندا كەلگەن اسلانبەك شىمبەرگەنوۆ فينالدا رەسەي بوكسشىسىن ءوز ەلىندەگى جارىستا تورەشىلەردىڭ ءبىراۋىز شەشىمىمەن جەڭىپ, تۋرنير جەڭىمپازى اتاندى.
ەل قورجىنىنا ەكىنشى التىندى 81 كيلوعا دەيىنگى سالماق دارەجەسىندە شارشى الاڭعا شىققان بەكزات نۇرداۋلەتوۆ سالدى. 2019 جىلى رەسەيدەگى الەم چەمپيوناتىندا التىن مەدال ولجالاعان وتانداسىمىز بۇل جولى دا رەسەي تورىندەگى جارىستا قارسىلاس شاق كەلتىرمەدى. قازاقستان چەمپيونى جارتىلاي فينالدا الەم بىرىنشىلىگىنىڭ فينالىندا كەزدەسكەن وزبەكستاندىق ديلشودبەك رۋزمەتوۆتى جەڭسە, فينالدا شارشى الاڭ يەسى – يمام حاتاەۆتى نوكداۋنعا ءتۇسىرىپ, قارسىلاسىن ءوز جانكۇيەرلەرى الدىندا كۇمانسىز جەڭدى. دەگەنمەن رەسەيلىك بوكسشىمەن وتكەن جەكپە-جەكتىڭ ءبىرىنشى راۋندىندا وتانداسىمىزدىڭ ءوزى دە كۇتپەگەن جەردە سوققى وتكىزىپ الىپ, نوكداۋنعا ءتۇسىپ قالعان-تىن. بىراق قالعان ەكى راۋندتا نۇرداۋلەتوۆ تورەشىلەردىڭ بۇرا تارتۋىنا جول بەرمەدى.
وكىنىشكە قاراي, 52 كيلو سالماقتا باق سىناعان بىلتىرعى قازاقستان چەمپيونى, 2019 جىلعى جاستار اراسىنداعى الەم چەمپيوناتىنىڭ قولا جۇلدەگەرى, جاس ءارى دارىندى بوكسشىمىز ماحمۇد سابىرحان فينالدىق سايىستا ريو وليمپياداسىنىڭ چەمپيونى وزبەكستاندىق شوحوبيددين زويروۆپەن جۇدىرىقتاستى. تەڭ دارەجەدە وتكەن جەكپە-جەكتە تورەشىلەر جەڭىستى وزبەك بوكسشىسىنا بەردى. فينالدا جەڭىلگەن ماحمۇد سابىرحان جارىستىڭ كۇمىس جۇلدەسىنە يە بولدى. سونداي-اق 75 كيلوداعى وتانداسىمىز ءابىلحان امانقۇل دەنساۋلىعىنا بايلانىستى شەشۋشى جەكپە-جەككە شىققان جوق. ناتيجەسىندە, بۇل سالماقتا جەڭىس اۆتوماتتى تۇردە رەسەيلىك گلەب باكشيگە بەرىلدى. سونىمەن قاتار بۇل جارىستا قازاقستاندىق بوكسشىلار ءۇش قولا جۇلدەنى جەڭىپ الدى. اتاپ ايتقاندا, دانيال ءسابيت (49 كگ), بەكنۇر وجانوۆ (60 كگ) جانە ايبەك ورالباي (91 كگ) قولانى قاناعات تۇتتى.
وسىلايشا, بوكستان قازاقستان ەرلەر قۇراماسى «گۋبەرناتور كۋبوگىندا» ەكى التىن, ەكى كۇمىس جانە ءۇش قولا جۇلدەمەن جالپىكوماندالىق ەسەپتە ءۇشىنشى ورىن الدى. ءبىرىنشى ورىن 18 مەدال (4 التىن, 6 كۇمىس, 8 قولا) جەڭىپ العان رەسەي بوكسشىلارىنا بۇيىرسا, ەكىنشى ورىنعا 4 التىن, 1 كۇمىس جانە 1 قولا مەدال يەلەنگەن وزبەكستان قۇراماسى جايعاستى.
