ءتۇرلى سالادا ەڭبەك ەتىپ جۇرگەن تۇلەكتەردىڭ تابىستى ءومىر جولىن جاس ۇرپاققا ناسيحاتتاۋ, ولاردى الەۋمەتتىك ماڭىزى بار جوبالارعا تارتۋ ماقساتىندا ۇيىمداستىرىلعان شارا جامبىل وبلىسىنىڭ اكىمى بەردىبەك ساپارباەۆتىڭ باستاماسىمەن وتكەن تۇلەكتەر فورۋمىنا ءۇن قوسۋ. اتالعان جيىندا تاراز قالاسىنىڭ اكىمى ەرجان جىلقىباەۆ اۋەلى يگى شارانىڭ ءمانى مەن ماڭىزىنا توقتالدى.
سونىمەن قاتار, ول ينۆەستيتسيا قۇيۋعا ءارى الەۋمەتتىك جوبالاردى ىسكە اسىرۋعا نيەتتى تاراز قالاسىنان تۇلەپ ۇشقان ازاماتتارعا اكىمدىك تاراپىنان قولداۋ كورسەتىلەتىندىگىن جەتكىزدى. جەتىستىككە جەتكەن ءاربىر تۇلەك التىن ۇيا مەكتەبىمەن تىعىز بايلانىس ورناتىپ, كەيىنگى جاستارمەن ومىرلىك تاجىريبەسىمەن ءبولىسىپ, ۇرپاقتار ساباقتاستىعىن جالعاۋ كەرەكتىگىن ايتتى.
تاراز قالاسىندا مەتسەناتتاردىڭ باستاماسىمەن يگى ىستەر اتقارىلىپ كەلەدى. بيىل دا جومارت تۇلەكتەردىڭ باستاماسىمەن «وقۋشىلار سارايى», «اناعا تاعزىم», «ۇستەل تەننيسى ورتالىعى», «ونەر ءۇيى» سياقتى اۋقىمدى جۇمىستار باستالىپ كەتتى. جوبانىڭ جالپى قۇنى 5,4 ميلليارد تەڭگەنى قۇرايدى.
سونداي-اق, «اسارلاتىپ ءۇي سالۋ» جوباسى اياسىندا 15 ءۇي سالىنادى. وسىلايشا, تۋعان توپىراقتان قۋات الىپ وسكەن ءاربىر اۋليەاتالىق تۇلەك ەگەمەن ەلىمىزدىڭ دامۋىنا ءوز ۇلەسىن قوسۋدا.
جيىندا تاراز قالالىق ءماسليحاتىنىڭ حاتشىسى باتىربەك قۇلەكەەۆ پەن ەڭبەك ارداگەرى قايرات شوتباقوۆ جانە وزگە دە تانىمال تۇلەكتەر ءسوز الىپ, قاناتقاقتى جوبانىڭ جاستارعا ۇلگى بولارلىق ءمان-ماعىناسى تۋرالى ايتتى. قازاقستان رەسپۋبليكاسى پارلامەنتى ءماجىلىسىنىڭ دەپۋتاتى گۇلدارا نۇرىموۆا, الماتى قالاسىنداعى پرەزيدەنتتىك ءىس-باسقارۋ ورتالىق كلينيكالىق اۋرۋحاناسى نەيروحيرۋرگيا ءبولىمىنىڭ مەڭگەرۋشىسى مارات سارشاەۆ شاراعا ونلاين رەجيمدە قاتىسىپ, قۇتتىقتاۋ سوزدەرىن جەتكىزدى. ال جەكە كاسىپكەر الىمبەك جۇماباەۆ, بوكستان وليمپيادا ويىندارىنىڭ جەڭىمپازى, ۆەل باركەر كۋبوگىنىڭ يەگەرى (افينا-2004) باقتيار ارتاەۆ, اقىن عايني الىمبەكقىزى, ءانشى الىشەر كاريموۆ, فرانتسيانىڭ ۆيلجۋيف قالاسى گۋستاۆا رۋسي ينستيتۋتىنىڭ دوكتورانتى كارينا ماتاەۆا, بلوگەر ەلدوس قادىرحانوۆ, ازىلكەش ارمان جاناليەۆتەر تۇلەكتەردى ءوزى ءبىلىم العان مەكتەبىنە دەمەۋشىلىك ەتىپ, ءوڭىردىڭ دامۋىنا مەيلىنشە قولداۋ كورسەتۋگە شاقىردى.
سان سالادا ەل دامۋىنا سۇبەلى ۇلەس قوسىپ جۇرگەن تانىمال تارازدىقتار مۇنداي كەزدەسۋگە شاقىرتۋ العاندارىنا قۋانىپ, تۇلەكتەردىڭ باسىن قوسقانى ءۇشىن العىس ءبىلدىردى. كەزدەسۋ بارىسىندا يدەيالارى مەن ۇسىنىستارىن ايتتى.
تاربيەلىك ماڭىزى بار جيىنعا 500-دەن اسا وقۋشى ونلاين رەجيمدە قوسىلدى. كەزدەسۋ سوڭىندا بەلسەندى تۇلەكتەر قالا اكىمىنىڭ العىس حاتىمەن ماراپاتتالدى. ەندى مۇنداي باس قوسۋ كەمىندە جىلىنا ءبىر رەت وتەتىن بولادى.
ايتا كەتەرلىك جايت, تاۋەلسىزدىك جىلدارى تاراز قالاسىندا 70 مىڭنان استام تۇلەك مەكتەپ بىتىرگەن. بۇگىندە تۇلەكتەردىڭ باسىن قوسۋ ماقساتىندا jambyl-tylek.kz سايتى ىسكە قوسىلىپ, وعان 14 مىڭنان استام تارازدىق تۇلەك تىركەلگەن.
