تاۋەلسىزدىكتىڭ 30 جىلدىعى • 23 ءساۋىر، 2021

Nur Otan-دا ەل تاۋەلسىزدىگىنىڭ 30 جىلدىعى مەرەيتويىنا دايىندىق بارىسى تالقىلاندى

92 رەت كورسەتىلدى

«Nur Otan» پارتياسى جانىنداعى «Miras» رەسپۋبليكالىق قوعامدىق كەڭەسىنىڭ جاڭا قۇرامداعى بيىلعى العاشقى وتىرىسى ءوتتى. پارلامەنت دەپۋتاتتارى، ۋاكىلەتتى مينيسترلىكتەر مەن مەكەمەلەردىڭ باسشىلارى، كينو سالاسىنىڭ ماماندارى، ساراپشىلار، كەڭەس مۇشەلەرى قاتىسقان باسقوسۋدا وتاندىق كينەماتوگرافيا سالاسىنداعى وزەكتى ماسەلەلەر مەن ەل تاۋەلسىزدىگىنىڭ 30 جىلدىعى مەرەيتويىن وتكىزۋ جونىندەگى ءىس-شارالار جوسپارىنىڭ اتقارىلۋ بارىسى اڭگىمە ارقاۋىنا اينالدى، دەپ حابارلايدى Egemen.kz.

كەڭەس توراعاسى، ءماجىلىس دەپۋتاتى جاناربەك ءاشىمجاننىڭ ايتۋىنشا، 2019 جىلعى 3 قاڭتاردا «كينەماتوگرافيا تۋرالى» زاڭ قابىلدانىپ، العاش رەت كينو ءوندىرىسىن قولداۋ شارالارى قاراستىرىلعانىمەن، وسى سالادا ءالى دە وزەكتى ماسەلەلەر بار.

«اتالعان زاڭ اياسىندا ۇلكەن جۇمىستار جۇرگىزىلىپ جاتىر. دەگەنمەن، ءالى دە شيكىلىكتەر بار، كوپ ماسەلەلەر ءتيىستى دەڭگەيدە ىسكە اسپاي جاتقانداي. اتاپ ايتساق، ۇلتتىق كينونىڭ قازىرگى دامۋ جاعدايىنداعى كوركەمدىك ساپاسى; كينوتەاترلاردا فيلمدەردىڭ مەملەكەتتىك تىلدە كورسەتىلۋىنىڭ ازدىعى; شەتەلدىك جانە وتاندىق فيلمدەرگە سۇرانىستىڭ اراسىنداعى ايتارلىقتاي الشاقتىق; فيلمدەردىڭ قازاق تىلىنە اۋدارىلۋىنىڭ ساپاسى; قازاق تىلىنە دۋبلياجدالعان فيلمدەردىڭ ازدىعى; كينوكورسەتىلىم مەن كورەرمەندەر سانىنىڭ مونيتورينگىسىنىڭ جوقتىعى ماسەلەلەرى»، - دەدى جاناربەك ءاشىمجان.

كەڭەس وتىرىسىنا قاتىسقان مادەنيەتتانۋشى، پۋبليتسيست سەرىك ەرعالي ءوز بايانداماسىندا «ۇلتتىق كينونى قولداۋ مەملەكەتتىك ورتالىعى» جانىنان قوعام جانە ونەر قايراتكەرلەرىن قاتىستىرىپ، قامقورلىق كەڭەسىن قۇرۋ كەرەكتىگىن تىلگە تيەك ەتتى. ەلدە قازاق ءتىلدى بىلىكتى، تالعامپاز ستسەناريستەر تاپشى ەكەنىن ايتا كەلە، كينو-كوركەم سىندى، كينو-دراماتۋرگيانى دامىتۋعا ارنالعان شارالاردى قولعا الۋ، «قازاقفيلم» جانىنان ىرگەلى دۋبلياج ستۋدياسىن جاساقتاۋ تۋرالى ۇسىنىس ءبىلدىردى.

مادەنيەت جانە سپورت ءمينيسترى اقتوتى رايىمقۇلوۆانىڭ ايتۋىنشا، قابىلدانعان «كينەماتوگرافيا تۋرالى» زاڭدا قازاقستاندىق جانە شەتەلدىك بيزنەس-قۇرىلىمدار ءۇشىن كينوبيزنەستى تارتىمدى ەتەتىن، قازاقستان رەسپۋبليكاسىنىڭ اۋماعىندا فيلمدەر شىعارۋ مەن ۇلتتىق فيلمدەردى پروكاتتاۋ كەزەڭىندە سالىقتىق جەڭىلدىكتەر مەن باسقا دا پرەفەرەنتسيالار كوزدەلگەن. سونىمەن بىرگە، فيلمدەر مونيتورينگىنىڭ بىرىڭعاي اۆتوماتتاندىرىلعان اقپاراتتىق جۇيەسىن قۇرۋ بويىنشا دا جۇمىستار جۇرگىزىلىپ جاتىر.

پارتيانىڭ سايلاۋالدى باعدارلاماسىنداعى مادەنيەت، رۋحانيات سالاسىنا قاتىستى بىرقاتار مىندەتتەردى ۋاقىتىلى اتقارۋدا مادەنيەت جانە سپورت مينيسترلىگى تاراپىنان كىدىرىستەر بولىپ قالۋى مۇمكىن ەكەندىگىنە توقتالعان «Nur Otan» پارتياسىنىڭ حاتشىسى الىبەك الدەنەي اتالعان ماسەلەگە ايرىقشا نازار اۋدارۋ قاجەتتىگىنە توقتالدى.

«وزدەرىڭىز بىلەسىزدەر، سايلاۋدان كەيىن ەلباسىنىڭ، ۇكىمەت باسشىسىنىڭ قاتىسۋىمەن فراكتسيانىڭ وتىرىسىندا جول كارتاسى بەكىتىلگەن. جول كارتاسىندا ۇكىمەت مۇشەلەرىنىڭ ارقايسىسى پارتيا مۇشەسى رەتىندە قول قويىپ، وندا كوزدەلگەن مىندەتتەردى ورىنداۋ مەرزىمدەرىن بەلگىلەدى. سول مەرزىمدەرگە سايكەس ءار تارماعىن ۋاقىتىلى جانە ساپالى ورىنداۋدى قاداعالاۋ – فراكتسيا دەپۋتاتتارىنىڭ جانە جالپى ءار پارتيا مۇشەسىنىڭ باستى ماقسات، مىندەتى. سوندىقتان، اقتوتى راحمەتوللاقىزى، ءدال قازىرگى ۋاقىتتا زاڭعا ءتيىستى وزگەرىستەر ۋاقىتىلى قابىلدانباسا، سوعان بايلانىستى جول كارتاسىنىڭ تارماقتارىن ورىنداۋ مەرزىمى كەيىنگە ىعىستىرىلۋى مۇمكىن. بۇعان جول بەرۋگە بولمايدى. سوندىقتان وسى ماسەلەنى تىكەلەي باقىلاۋدا ۇستاعان ءجون» - دەدى الىبەك الدەنەي.

كۇن تارتىبىندەگى ەكىنشى ماسەلە بويىنشا اقپارات جانە قوعامدىق دامۋ ءمينيسترى ايدا بالاەۆا ءسوز سويلەپ، ەل تاۋەلسىزدىگىنىڭ 30 جىلدىعى مەرەيتويىن دايىنداۋ جانە وتكىزۋ جونىندەگى ءىس-شارالار كەشەنىمەن تانىستىرىپ، ونىڭ نەگىزگى بلوك بويىنشا جۇرگىزىلىپ وتىرعانىنا توقتالدى. جوسپار اياسىندا نەگىزىنەن رەسپۋبليكا اۋقىمىندا وتەتىن ءىرى مەرەكەلىك وقيعالار قامتىلعان.

«تۇلپار ءمىنىپ، تۋ العان» رەسپۋبليكالىق بايقاۋىنىڭ جەتەكشىسى ارمان ابدوللاەۆتىڭ تاۋەلسىزدىكتىڭ 30 جىلدىعى مەرەيتويى قارساڭىندا وسكەلەڭ ۇرپاقتى ۇلتتىق رۋحتا تاربيەلەۋگە باعىتتالعان «Qazaq Epos» رەسپۋبليكالىق اعارتۋ جوباسىن بۇكىل وڭىردە وتكىزۋگە «Nur Otan» پارتياسى تاراپىنان قولداۋ سۇراعان ۇسىنىسى وتىرىسقا قاتىسۋشىلار تاراپىنان قولداۋ تاپتى.

«اتالعان ۇسىنىس قولداۋعا لايىقتى دۇنيە دەپ ويلايمىز. جالپى، قازىرگى كۇنى ءوزى دومبىرا تارتپاق تۇگىلى، اۋزىنان دۇرىس قازاقى ءسوز الا المايتىن كەزەڭ بولىپ تۇر عوي. سوندىقتان ۇرپاقتارىمىز دومبىرانى ۇيرەنىپ جاتسا قۇبا قۇپ ارينە. ناسيحاتتى بارلىق جاقتان ارتتىرۋىمىز كەرەك دەپ ويلايمىن»، - دەدى كەڭەس توراعاسى جاناربەك ءاشىمجان.

«استانا» تەلەارناسىنىڭ جەتەكشىسى قۇرمانبەك جۇماعالي تاۋەلسىزدىكتىڭ 30 جىلدىعى مەرەيتويى قارساڭىندا تاۋەلسىزدىكتىڭ تاريحي كەزەڭدەرى قامتىلعان، قازاقستاننىڭ تۇڭعىش پرەزيدەنتى، ەلباسى ن.نازارباەۆتىڭ ەڭبەگى تۋرالى دەرەكتى فيلم، سيۋجەت، رەپورتاج، سۇقبات فورماتىندا جيناقتالعان بارلىق ماتەريالدارىن ورتاق رەسۋرسقا قۇيىپ، جۇيەلى تۇردە رەتتەپ، اركىم كەز-كەلگەن ۋاقىتتا پايدالانا الاتىنداي ءبىر ورتاق پلاتفورما جاساۋ جونىندەگى ۇسىنىسى كەڭەس مۇشەلەرىنىڭ كوڭىلدەرىنەن شىقتى.

سونىمەن قاتار كەڭەس بارىسىندا «Nur Otan»-نىڭ ۇلتتىق قۇندىلىقتاردى دامىتۋ باعىتىندا وتكىزىلەتىن پارتيالىق ءىس-شارالاردى جۇيەلەۋ جانە بىرىزدەندىرۋ ماقساتىندا «ۇلتتىق مۇرا» پارتيالىق جوباسىن بەكىتۋ جونىندە ۇسىنىس ورتاعا سالىنىپ، ماقۇلداندى. بۇل جوبا «رۋحاني جاڭعىرۋ» باعدارلاماسىنىڭ باعىتتارىن جۇيەلى ىسكە اسىرۋعا ىقپال ەتىپ، وزەكتى ماسەلەلەردى وسى «Miras» كەڭەسىنىڭ الاڭىندا تۇراقتى تالقىلاۋعا مۇمكىندىك بەرمەك.

وتىرىس قورىتىندىسى بويىنشا ۇكىمەتكە جولداۋ ءۇشىن بىرقاتار ۇسىنىستار تۇجىرىمدالدى. اتاپ ايتقاندا، «كينەماتوگرافيا تۋرالى» زاڭعا قازاقستان اۋماعىنا تارالۋىنا پروكاتتاۋ كۋالىگىن بەرۋ ءۇشىن ءفيلمنىڭ قازاق تىلىندەگى مىندەتتى دۋبلياجىن نە قازاق تىلىندەگى تۇپنۇسقا نۇسقاسىن تالاپ ەتۋ; قازاق تىلىندە كورسەتىلەتىن نە دىبىستالعان ۇلتتىق فيلم ساناتىنا جاتاتىن كينولاردى كينوتەاترلاردا پرايم تايم ۋاقىتىندا كورسەتۋ تۋرالى وزگەرىستەر مەن تولىقتىرۋلار ەنگىزۋ; «ۇلتتىق كينونى قولداۋ مەملەكەتتىك ورتالىعى» ىرىكتەيتىن جانە قارجىلاندىراتىن فيلمدەردە «كينەماتوگرافيا تۋرالى» زاڭدا انىقتاماسى بەرىلگەن الەۋمەتتىك ماڭىزى بار فيلمدەرگە باسىمدىق بەرۋ.

سوڭعى جاڭالىقتار

ىندەت قايتا ءورشىدى

الەم • بۇگىن، 20:44

ليسيچانسك كىمنىڭ قولىندا؟

الەم • بۇگىن، 20:41

وڭىردە دامۋ ءۇردىسى بار

ايماقتار • بۇگىن، 20:27

تاڭدايدىڭ تارلانى

تاريح • بۇگىن، 20:24

جوعالعان سولدات

تاريح • بۇگىن، 20:22

ساناداعى سىلكىنىس نەمەسە كۇرەسكەردىڭ قالىپتاسۋى

احمەت بايتۇرسىن ۇلى • بۇگىن، 20:18

دومبىرانى دارىپتەدى

رۋحانيات • بۇگىن، 20:00

الماتىدا 36 گرادۋس ىستىق بولادى

اۋا رايى • بۇگىن، 16:40

بۇگىن - ۇلتتىق دومبىرا كۇنى

قازاقستان • بۇگىن، 08:50

ۇقساس جاڭالىقتار