ساۋدا جانە ينتەگراتسيا مينيسترلىگى ءباسپاسوز قىزمەتىنىڭ وكىلى تۇماباەۆ قۋات مۇحيت ۇلى ەكسپورتتى قولداۋ دەپارتامەنتىنىڭ ديرەكتورى بولىپ تاعايىندالعانىن راستادى. ول جۇمىسقا مەملەكەتتىك قىزمەت تۋرالى زاڭعا سايكەس, كونكۋرستىق پروتسەدۋرالار نەگىزىندە الىنعان.
«كونكۋرسقا قاتىستىرۋ نەمەسە قاتىستىرماۋ تالاپتارى زاڭدا جازىلعان. كونكۋرستىق كوميسسيا مۇشەلەرىنىڭ بارلىق پروتسەدۋراسى ادگس سايتىندا اشىق كورسەتىلدى. بارلىعى جاريالاندى. ونىڭ (قۋات تۇماباەۆتىڭ – رەد) كونكۋرسقا قاتىسۋعا ەشقانداي شەكتەۋلەرى بولعان جوق», دەدى ءباسپاسوز قىزمەتىنىڭ وكىلى.
ەسكە سالا كەتەيىك, 2018 جىلدىڭ 15 ساۋىرىندە ريددەر قالاسىندا 18 جاسار جاياۋ جۇرگىنشىنىڭ ولىمىنە الىپ كەلگەن جول-كولىك وقيعاسىنا قۋات تۇماباەۆتىڭ قاتىسى بار ەكەنى ايتىلعان. ياعني ول بوزبالانى قاققان جۇرگىزۋشىنىڭ جانىندا وتىرىپ, كەيىن باسقا كولىكپەن كەتىپ قالعان.
سول كەزدە شىعىس قازاقستان وبلىسىنىڭ اكىمى دانيال احمەتوۆ ونىڭ مۇنداي جوعارى لاۋازىمعا لايىق ەمەستىگىن ايتىپ, قىزمەتىنەن بوساتقان ەدى. قۋات تۇماباەۆتىڭ بۇگىنگە دەيىن نەمەن اينالىسقانى بەلگىسىز. بىراق جاڭا قىزمەتكە مەملەكەتتىك قىزمەت تۋرالى زاڭعا ساي كونكۋرس ارقىلى كەلگەن.
