ماريانىڭ قيىندىققا تولى ءومىرى التى جىل بۇرىن, ەكى اياعىنان ايىرىلعان كەزدەن باستالدى. مۇنداي كۇيگە كونە الماعانىمەن قيىندىققا بەرىلمەدى. الدىمەن بۋرابايدىڭ شىڭىنا شىقتى. ال قازىر ەۆەرەستكە جەتىپ, 5364 م بيىكتىككە قول جەتكىزدى.
«ەگەر ءبىر ادامعا جىگەر بەرىپ, العا قاراي ۇمتىلۋىنا اسەر ەتسەم مەنىڭ ۇلكەن جەڭىسىم سول بولماق. مەن سونداي قۋانىشتىمىن! ۇيىمە ورالعانىما قۋانامىن. مەن شىنىمەن باقىتتىمىن», دەدى ماريا.
سپورتشى التى اي بويى تاۋ شىڭىن باعىندىرۋعا دايىندالىپ, ءتىپتى ارتىق سالماق تاستاعانىن ايتتى.
«بۋرابايدى باعىندىرعاننان كەيىن توقتاپ قالماسىمدى ءبىلدىم. ارى قاراي ۇمتىلىپ, سينيۋحاداعى تاز تاۋىنا شىقتىق. ەندى ودان دا بيىككە شىعۋىمىز كەرەك دەگەن شەشىم قابىلدادىق. ءبىر جارىم جىل ۋاقىتىمىز دايىندىققا كەتتى. تۋىستارىم مەن دوستارىم مەن ءۇشىن قاتتى ۋايىمدادى. دەگەنمەن بيىككە شىعۋ, قوزعالۋ مەنىڭ جاعدايىمداعى ادام ءۇشىن قيىن. جولىمىزدا تاس تا, قۇم دا كەزدەسەدى. ءبىر جەردەن اربامەن ءجۇرىپ وتەتىن مۇمكىندىك بولسا, ەندى ءبىر تۇستا كەرىسىنشە. ءوز كۇشىممەن وتە الاتىن جەردەن ءوزىم وتسەم, قيىنداۋ تۇستارىندا بىرگە شىققان دوستارىم كومەكتەستى. كوماندالىق جۇمىس ءوز ناتيجەسىن بەردى. جالپى, 10 كۇندە جوسپارىمىزدى جاقسى ورىندادىق. 5 مىڭ مەترگە جاقىنداعاندا, تاۋ اۋرۋى ازداپ سەزىلە باستادى. بىراق جىلدام ءوتتى. بارلىعى كاسىبيلىك پەن كوماندالىق جۇمىستىڭ ارقاسىندا. مەنى كورگەن نەپالدىقتار: ء«سىز نە ىستەيىن دەپ تۇرسىز؟ مۇنى ىستەۋ مۇمكىن ەمەس. جوق. قاجەت ەمەس! بولمايدى! بۇل قاۋىپتى!» دەدى. ولار ءبىزدى رايىمىزدان قايتارعىسى كەلىپ, قاتتى ۋايىمدادى. ەلگە ريزامىن, ءبىزدى جىلى قابىلداپ, قولدارىنان كەلگەنشە كومەكتەستى», دەدى ماريا.
