ەلوردا ەلىمىزدەگى قۇرىلىسى قارقىندى جۇرگىزىلىپ جاتقان قالا بولعاندىقتان ەڭبەك نارىعىندا اسىرەسە قۇرىلىس سالاسىنىڭ ماماندارىنا سۇرانىس كوپ. اتاپ ايتقاندا پروراب, شەبەر, تاس قالاۋشى, ارماتۋراشى, ينجەنەر-سمەتاشى, بەتونشى, كران-ءماشينيستى, تقۇ ينجەنەرى, ءارتۇرلى جۇمىس ىستەۋشى جۇمىسشىلار قاجەت.
پرەزيدەنتتىڭ باستاماسىمەن وتكەن جىلى ەنگىزىلگەن «جۇمىسپەن قامتۋدىڭ جول كارتاسى» باعدارلاماسى بيىل دا جالعاسادى.
2021 جىلى نۇر-سۇلتان قالاسىندا 21 ينفراقۇرىلىمدىق جوبانى ىسكە اسىرۋ جوسپارلانىپ وتىر. جوبالاردى جۇزەگە اسىرۋ اياسىندا 1000-نان استام جاڭا جۇمىس ورنىن قۇرۋ كوزدەلگەن. ونىڭ 50%-ى جۇمىسپەن قامتۋ ورتالىعى ارقىلى جۇزەگە اسىرىلادى.
باس قالادا قوعامدىق تاماقتانۋ سالاسىنىڭ ماماندارى سۇرانىسى جوعارى جۇمىس ءتۇرىنىڭ كوشىن باستاپ تۇر. اسىرەسە, ناۋبايشى, اسپاز, ءتۇرلى تاعامدار تسەحىنا اسپاز, اس-ءۇي قىزمەتكەرىن ىزدەيتىندەر كوپ. ەلوردالىقتاردىڭ ءتاتتى تاعامداردى قولدانۋى ارتقان. كونديتەرگە سۇرانىس كوبەيگەن.
قازىرگى ەپيداحۋالعا بايلانىستى دەنساۋلىق سالاسىنىڭ قىزمەتكەرلەرىنىڭ جەتىسپەۋشىلىگى بايقالادى.
ەلەكتروندى ەڭبەك بيرجاسىنىڭ (www.enbek.kz) پورتالىنا 45 000-نان استام مەكەمە تىركەلگەن. قازىرگى ۋاقىتتا 1 039 مەكەمە جۇمىسشى ىزدەيدى. ول جەردە 7 064 بوس ورىن بار.
قازىر حالىقتى جۇمىسپەن قامتۋ ورتالىعى ارقىلى 120 ادام قىسقا مەرزىمدى كاسىپتىك وقۋلارعا جىبەرىلدى. جەكە كاسىپ باستايمىن دەگەن جاڭا بيزنەس يدەياسى بار جوبالارعا 61 مەملەكەتتىك گرانت بەرىلدى. «اتامەكەن» كاسىپكەرلەر پالاتاسىنىڭ كاسىپكەرلىك نەگىزدەرىن وقىتاتىن «باستاۋ بيزنەس» جوباسى بويىنشا 700 ادامعا جولداما بەرىلدى.
