قۇرلىق باسەكەسىندە 55 كيلو سالماق دارەجەسىندە ونەر كورسەتكەن ارلي چونتەي قوسسايىس قورىتىندىسى بويىنشا 255 (115+140) كيلو زىلتەمىردى ەڭسەرىپ, ازيا چەمپيونى اتاندى. 2019 جىلى قىتايدا وتكەن ازيا بىرىنشىلىگىندە 246 كيلومەن ءۇشىنشى ورىندى قاناعات تۇتقان قازاقستاندىق سپورتشى, مىنە, اراعا ەكى جىل سالىپ التىن جۇلدەگە قول جەتكىزدى. بۇل – 2012 جىلدان بەرى قازاقستان تۋى استىندا ونەر كورسەتىپ كەلە جاتقان چونتەيدىڭ ازيا بىرىنشىلىگىندەگى العاشقى التىن مەدالى. بۇعان دەيىن بىرنەشە ازيا جانە الەم چەمپيوناتتارىندا باق سىناعان ارلي جۇلدەلى ورىندارعا شاماسى جەتپەي, باپكەرلەردىڭ دە, جانكۇيەرلەردىڭ دە ءۇمىتىن اقتاي الماي كەلە جاتقان ەدى.
باسقا جارىستاردى بىلاي قويعاندا, ماماندار ءدال وسى سپورتشى 2016 جىلى ريودا وتكەن وليمپيا ويىندارىندا ەل قورجىنىنا جۇلدە سالادى دەپ قاتتى سەنگەن بولاتىن. وكىنىشكە قاراي, قولدا تۇرعان قولا مەدالعا سىنىق سۇيەم قالعاندا ءسۇرىنىپ, ءوزىنىڭ العاشقى وليمپياداسىن ءتورتىنشى ورىنمەن تۇيىندەگەن ەدى. دەسە دە كەيىنگى بەس جىلدىقتا بۇل سپورتشى ايتارلىقتاي ناتيجە كورسەتە باستادى. ماسەلەن, 2017 جىلى قىتايدا وتكەن جازعى ۋنيۆەرسيادادا قولا, 2018 جىلعى اشعاباتتاعى الەم بىرىنشىلىگىندە ەكىنشى ورىنعا تابان تىرەپ, كۇمىس جۇلدە ەنشىلەدى.
تاشكەنتتەگى ازيا چەمپيوناتىنىڭ وسى سالماقتاعى كۇمىس جۇلدەسى دە جەرلەسىمىزگە بۇيىردى. ارلي چونتەيدەن 11 كيلو كەم كوتەرگەن ابىلاي اۋەلحانوۆ 244 كيلو (108+136) ناتيجەمەن ەكىنشى ورىن يەلەندى. ءار جارىستا جوعارى ناتيجە كورسەتۋدى وزىنە مىندەت ەتىپ قوياتىن اۋەلحانوۆ بۇل جولى دا باس جۇلدەدەن ءۇمىتتى ەدى. ءتىپتى سەرپە كوتەرۋدە العاش 136 كيلونى كوتەرگەننەن كەيىن ەكىنشى مۇمكىندىگىنە 141 كيلوعا تاپسىرىس بەردى. بىراق بۇل سالماق جەرلەسىمىزگە باعىنبادى. سوڭعى مۇمكىندىگىندە تاۋەكەلگە بەل بۋىپ, 148 كيلو زىلتەمىردى كوتەرۋگە شەشىم قابىلدادى. ەگەر زىلتەمىر باعىنىپ جاتسا, ازيا چەمپيونى اتانادى, كوتەرە الماسا, كۇمىستى قاناعات تۇتاتادى. ويتكەنى ءۇشىنشى ورىندا تۇرعان سيريالىق سپورتشى 137 كيلومەن جارىستى اياقتاپ قويعان ەدى. ءۇشىنشى مۇمكىندىگىن كوتەرۋ ءۇشىن جارىس الاڭىنا شىققان جەرلەسىمىز 148 كيلونى باسىنان اسىرا كوتەرە المادى. ءسويتىپ ءوزىنىڭ ەرەسەكتەر اراسىنداعى العاشقى ازيا چەمپيوناتىندا كۇمىس مەدالعا قول جەتكىزدى.
بىلتىر عانا جاسوسپىرىمدەر اراسىنداعى الەم كۋبوگىندا توپ جارىپ, بيىلدان باستاپ ەرەسەكتەر اراسىنداعى ءدۇبىرلى دودالاردا بوي كورسەتە باستاعان قانداسىمىز ءۇشىن بۇل تاماشا ناتيجە دەۋىمىز كەرەك. ءبىر قىزىعى, وسىدان ءبىر اي بۇرىن ونلاين فورماتتا وتكەن ەل چەمپيوناتىنداعى ارلي مەن ابىلاي اراسىنداعى تارتىستا اۋەلحانوۆ جەڭىسكە جەتتى. سول جارىستا العاشقىسى – 253 (112+141), ەكىنشىسى 254 (108+146) كيلونى باعىندىرعان ەدى.
سونىمەن قاتار جارىستىڭ العاشقى كۇنىندە تاعى ەكى سپورتشىمىز باس جۇلدە ءۇشىن سىنعا تۇسكەن بولاتىن. وكىنىشكە قاراي, يگور سون (61 كگ) مەن ءزۇلفيا چينشانلو (55 كگ) جانكۇيەرلەر ءۇمىتىن اقتاي الماي, جۇلدەلى ورىنداردان قۇرالاقان قالدى. ەرلەر اراسىنداعى 55 كيلو سالماقتا 2019 جىلى تايلاندتا وتكەن الەم چەمپيوناتىنىڭ كۇمىس جۇلدەگەرى يگور سون بيىلعى ازيا چەمپيوناتىن ءتورتىنشى ورىنمەن اياقتادى. العاشقى جۇلقا كوتەرۋ باعدارلاماسىن تاپ-تاماشا باستاپ, 132 كيلومەن كىشى قولاعا قول جەتكىزگەن جەرلەسىمىزدىڭ سەرپە كوتەرۋدە جولى بولمادى. ءبىرىنشى مۇمكىندىگىندە 152 كيلونى وڭاي ەڭسەرگەنىمەن, قالعان ەكى مۇمكىندىگىندە دە 156 كيلو زىلتەمىردى باعىندىرا المادى. ەگەر وتانداسىمىز سوڭعى مۇمكىندىگىن ءتيىمدى پايدالانعاندا, بىردەن كۇمىس جۇلدەگە قول جەتكىزەتىن ەدى. بۇل سالماقتا ايگىلى قىتايلىق سپورتشى لي فابين توپ جاردى. قوسسايىس قورىتىندىسى بويىنشا ول 312 (142+170) كيلو زىلتەمىردى باعىندىردى.
ايەلدەر اراسىندا ءۇش دۇركىن الەم چەمپيونى, ەكى دۇركىن ازيا ويىندارىنىڭ كۇمىس جۇلدەگەرى دەگەن دارداي اتاعى بار جەرلەسىمىز ءزۇلفيا چينشانلو ازيا چەمپيوناتىندا بەسىنشى ورىن الدى. يگور سون سياقتى چينشانلو دا العاشقى جۇلقا كوتەرۋ باعدارلاماسىندا 92 كيلو زىلتەمىردى ەڭسەرىپ, كىشى قولا مەدال يەلەندى. سەرپە كوتەرۋدەگى ءبىرىنشى مۇمكىندىگىندە 118 كيلونى باعىندىرعانىمەن, قالعان ەكى مۇمكىندىگىندە 122 كيلونى ەڭسەرۋگە شاماسى جەتپەدى. ءسويتىپ 210 كيلومەن قۇرلىق باسەكەسىندە بەسىنشى ورىندى قاناعات تۇتتى. التىن جۇلدە 222 (98+124) كيلو كوتەرگەن قىتايلىق سپورتشى لياو ءتسيۋيۋننىڭ ەنشىسىندە كەتتى.
