بىلاي قاراساڭىز, شىنىمەن تۇتاس ءبىر ءداۋىر اياقتالدى. ويتكەنى اعايىندى فيدەل مەن راۋل كاسترولار 60 جىلعا جۋىق ۋاقىت لاۋازىمدى قىزمەتتەردە بولدى. ولار رەۆوليۋتسيادان كەيىن ەلدە ماركس پەن لەنين يدەياسىنا نەگىزدەلگەن اۆتوريتارلى سوتسياليزم ورناتىپ, ۇلكەن رەفورمالار جاسادى.
راۋل كاسترو كۋبانى 12 جىل باسقارىپتى. 90 جاسقا تاياعان ساياساتكەر زەينەتكە شىعامىن دەدى. ەندى كوممۋنيستىك پارتيانىڭ تىزگىنى ەل پرەزيدەنتى ميگەل دياس-كانەلگە وتەدى. ساراپشىلار بۇل جاڭالىقتى ەستي سالا, ەلدى ەكونوميكالىق داعدارىس كۇتىپ تۇر دەگەن بولجام جاسادى. داعدارىستان بولەك, نارازىلىقتاردىڭ دا اۋىلى الىس ەمەس سياقتى. ويتكەنى حالىق ساياسي باعىتتىڭ وزگەرمەي جاتقانىن اۋەلدەن ايتىپ كەلەدى.
راۋل كاسترو پارتيا باسىنا 2000-جىلداردىڭ باسىندا كەلدى. اعاسى فيدەل 1997 جىلى ءىنىسى راۋلدى ورىنباسارى رەتىندە تانىستىرىپ قويعان-دى. ىنىسىنە قاتىستى جوسپارى دا, ءۇمىتى دە زور فيدەل كاسترو ونىڭ قاي قىزمەتتە بولسىن جاقسى ناتيجە كورسەتەتىنىنە سەنىمدى ەدى. ال راۋل 50 جىل بويى پرەمەر-مينيستر قىزمەتىندە ءجۇرىپ, كوبىنە اعاسىنىڭ «كولەڭكەسىندە» قالىپ قوياتىن.
راۋل كاسترو مانسابىندا بىرقاتار جاقسى جەتىستىككە جەتتى. كۋبانىڭ الەمدىك نارىققا كىرۋى دە راۋلدىڭ اتىمەن بايلانىستى. ودان بولەك, بىرنەشە مەملەكەتتىك باعدارلاما قولعا الىنىپ, اۋىلشارۋاشىلىق, ءوندىرىس پاركتەرىنىڭ جۇمىسى جولعا قويىلدى, جەكە جانە مەملەكەتتىك بازارلار ىسكە قوسىلدى.
دەگەنمەن حالىق «كولەڭكەلى» ەكونوميكا ءۇشىن ونىڭ بيلىگىنە قارسى سىن ايتتى. ەلدە اقش-تىڭ اسەرى كۇشەيە ءتۇسىپ, ارال ەسىرتكى تاسۋ ءۇشىن كوپىر رەتىندە پايدالانىلدى دەگەن پىكىر بار. وعان ءبىر كەزدەرى جاڭبىردان كەيىنگى ساڭىراۋقۇلاقتاي قاپتاعان گاۆاناداعى كازينو مەن قوناقۇيلەر دالەل دەيدى.
