«18 ساۋىردە شار وزەنىندە بالىقتاردىڭ قىرىلعاندىعى تۋرالى اقپارات كەلىپ ءتۇستى. اتالعان سۋ قويماسى «اقتايلاق» شارۋا قوجالىعىنىڭ قاراماعىنا بەكىتىلگەن. سول جەرگە كەلىپ جەتكەن ماماندار ءولى بالىقتاردىڭ جاعالاۋدان 800 مەتردەي قاشىقتىقتا جاتقانىن كوردى. قىرىلعان بالىقتىڭ جالپى سالماعى – 450 كەلى. كوزبەن شولۋ كەزىندە بالىقتارعا قانداي دا ءبىر زاقىم كەلگەنى انىقتالعان جوق», دەلىنگەن حابارلامادا.
زايسان-ەرتىس وبلىسارالىق باسسەيندىك بالىق شارۋاشىلىعى ينسپەكتسياسىنىڭ مالىمەتىنشە وزەندەگى سۋ دەڭگەيى ايتارلىقتاي تومەندەپ كەتكەن. وزەننىڭ ورتالىق بولىگىندە سۋ تەرەڭدىگى 80 سانتيمەتر عانا. الدىن الا مالىمەت بويىنشا بالىقتىڭ قىرىلۋىنا سۋ قويماسىنىڭ تاياز جەرلەرىنىڭ قاتۋى سەبەپ بولۋى مۇمكىن.
