ونىڭ ايتۋىشا, ەڭبەك نارىعىنداعى سۇرانىسقا بايلانىستى وقىتۋ كۋرستارى ۇيىمداستىرىلاتىن بولادى.
«قاجەتتى ماماندىقتار اتلاسى جاسالدى. بۇگىندە ەلىمىزدە عانا ەمەس, باسقا مەملەكەتتەردە دە وزگەرىستەر بولىپ جاتىر. سەبەبى, ەڭبەك نارىعى وتە جىلجىمالى, جاھاندانۋ بار, كوپ جەرلەردە شەكارا جوق, وتانداستارىمىز شەتەلگە بارىپ جۇمىس ىستەۋدە, بىزگە دە شەتەلدەن كەلىپ جاتىر, پاندەميا كەزىندە شەكارا جابىلعاندىقتان ولاردىڭ سانى ازايدى. بىراق بولاشاقتا مۇنداي پروتسەستەر بولادى. بولاشاقتا قانداي ماماندىقتار جويىلادى, قانداي ماماندىقتار ترانسفورماتسياعا ۇشىرايدى, قانداي ماماندىقتار سۇرانىسقا يە بولادى, وسىنىڭ بارىنە ساراپتاما جۇرگىزىلدى», دەدى ە.ءبىرجانوۆ.
ونىڭ ايتۋىنشا, قازىر تسيفرلىق تەحنولوگيا بويىنشا جاڭا ماماندىقتار شىعىپ جاتىر. ال ەسەپشىلەر, ەڭبەكاقى سانايتىندار جويىلىپ بارا جاتقان ماماندىققا جاتادى. ويتكەنى, جاڭا تەحنولوگيالار ەنگىزىلىپ جاتىر, بۇل جۇمىس ورىندارى قىسقارىپ, ءبارى اۆتوماتتاندىرىلادى. بۇل ۆەدومستۆو وكىلى قازىر جاستارعا سۇرانىسقا يە ماماندىق بويىنشا ءبىلىم الۋعا كەڭەس بەردى.
