بۇل ءبىرىنشى كەزەكتە شاھار كوشەلەرىنىڭ ميلليون تۇرعىن تۇراتىن قالا تالاپتارىنا ساي ەمەس ەكەندىگىن كورسەتەدى. وسى ولقىلىقتىڭ ورنىن تولتىرۋ ماقساتىندا بىلتىر قالا اكىمدىگى د.قوناەۆ-ت.رىسقۇلوۆ پەن بايدىبەك بي-ارعىنبەكوۆ كوشەلەرىنىڭ قيىلىسىندا جولايرىق قۇرىلىسىن سالۋدى جوسپارلاعان.
بىلتىر باستالعان د.قوناەۆ داڭعىلى مەن ت.رىسقۇلوۆ كوشەسىنىڭ قيىلىسىنداعى جولايرىق قۇرىلىسى كەستەگە سايكەس جۇرگىزىلىپ كەلەدى. نىساننىڭ ۇزىندىعى د.قوناەۆ داڭعىلى بويىنشا ءبىر شاقىرىمدى, ت.رىسقۇلوۆ كوشەسى بويىنشا 0,7 شاقىرىمدى قۇرايدى. جىل سوڭىنا دەيىن ەل يگىلىگىنە پايدالانۋعا بەرۋ جوسپارلانۋدا. بۇگىنگى تاڭدا مۇندا 3,3 شاقىرىم سۋ, گاز قۇبىرلارىنىڭ ورنىن اۋىستىرۋ, توننەل قازۋ, 60 مەتر تىرەۋ قابىرعالارىن قۇيۋ, 7 باعانا ورناتۋ جانە 75 قادا قۇيۋ جۇمىستارى ورىندالدى. سونىمەن قاتار اتالعان جولايرىقتا جەراستى وتكەلىنىڭ قۇرىلىسى جوسپارلانعان. قۇرىلىستىڭ جوبالاۋ-سمەتالىق قۇجاتتاماسىن ازىرلەۋ ءۇشىن قارجى قاراستىرىلىپ, مەملەكەتتىك ساتىپ الۋ كونكۋرسى جۇرگىزىلگەن. ءساۋىر ايىنداعى مالىمەت بويىنشا مۇندا 270 مەترگە جۋىق تىرەۋ قابىرعالارىن قۇيۋ, 4 سەكتسيا بويىنشا تىرەۋ قابىرعالارىنىڭ قالىبىن توقۋ, 1,92 شاقىرىمدى قۇرايتىن سۋ قۇبىرىن, 1,82 شاقىرىمدىق گاز قۇبىرىن, بايلانىس سىمدارىن ورناتۋ جۇمىستارى اياقتالدى. سونىمەن قاتار بيىل ءساۋىر ايىنىڭ سوڭىنا دەيىن 30 مىڭ تەكشە مەتر جەردەگى قۇرىلىس جۇمىستارىن اياقتاۋدى جوسپارلاپ وتىر. ناتيجەسىندە, جوباعا سايكەس ت.رىسقۇلوۆ كوشەسىنىڭ ەنى كەڭەيتىلىپ, كەدەرگىلى قورشاۋ ورناتۋ قاراستىرىلعان.
قازىرگى تاڭدا د.قوناەۆ داڭعىلى مەن ت.رىسقۇلوۆ كوشەسىنىڭ قيىلىسىنداعى جولايرىق قۇرىلىسىنىڭ ەكىنشى كەزەڭى قارقىن الۋدا. بيىل 20 قاڭتاردا ءىرى جولايرىق قۇرىلىسىنىڭ ەكىنشى كەزەڭى باستالعان بولاتىن. بۇل كەزەڭدە جول جابىنىن بۇزۋ, ينجەنەرلىك جەلىلەردى اۋىستىرۋ, تىرەۋ قابىرعالارىن بەتونداۋ, جول وتكەلىن جانە جول جامىلعىسىن سالۋ جۇمىستارى ورىندالاتىن بولادى. قۇرىلىسقا «Bazis Construction» جشس جاۋاپتى. قازىرگى ۋاقىتتا نىساندا گاز, سۋ قۇبىرى جانە ەلەكتر جەلىلەرىن اۋىستىرۋ, سونداي-اق توننەلدەگى تىرەۋ قابىرعالارىن قۇيۋ بويىنشا قۇرىلىس جۇمىستارى جۇرگىزىلۋدە. بۇگىنگە دەيىن 26,5 شاقىرىم ينجەنەرلىك جەلىلەردىڭ 3,4 شاقىرىمى نەمەسە 13 پايىزى اۋىستىرىلدى. ينفراقۇرىلىمدىق جەلىلەر جول توسەمىنەن بولەك ورنالاسادى. ەلەكتر جەلىسىنىڭ ون باعاناسىنىڭ جەتەۋى, قۇيىلۋى ءتيىس 105 قادانىڭ 75-ءى, بولاشاق تىرەۋ قابىرعالارىنىڭ 986 مەترىنىڭ 50 مەترى ورناتىلدى.
«مۇنداي نىسانداردى سالۋ ءاردايىم قيىن, ويتكەنى جۇمىستار ءىرى قالانىڭ حالىق تىعىز ورنالاسقان اۋدانىندا جۇرگىزىلۋدە. مۇندا جەر ۋچاسكەلەرىن الۋ, ينجەنەرلىك كوممۋنيكاتسيالاردى كوشىرۋ ماسەلەلەرىن شەشۋ قاجەت. سونداي-اق بايلانىس جەلىلەرىنىڭ تىعىزدىعى وتە جوعارى, تۇرعىن ۇيلەر جاقىن جەردە ورنالاسقان. وعان قوسا ەلەكتر اۋە جەلىسى – 110 كۆت. ونى اۋىستىرۋ كەرەك», دەدى قۇرىلىسقا جاۋاپتى ماماندار. ەكىنشى كەزەڭ قۇرىلىسىنىڭ باستالۋىمەن قوناەۆ داڭعىلىندا جاندوسوۆ كوشەسىنەن رىسقۇلوۆ كوشەسىنە دەيىن جانە بايدىبەك داڭعىلىندا رىسقۇلوۆ كوشەسىنەن دۋلاتي كوشەسىنە دەيىن قوزعالىس تولىعىمەن جابىلىپ, اشىق تيپتەگى توننەل بولىگىنىڭ قۇرىلىسى باستالادى.
ايتا كەتەرلىگى, بۇگىنگە دەيىن جوباعا بولىنگەن قارجىنىڭ 550 ملن تەڭگەسى يگەرىلگەن. 2021 جىلعا رەسپۋبليكالىق بيۋدجەتتەن 1 ملرد 100 ملن, جەرگىلىكتى بيۋدجەت ەسەبىنەن 543,7 ملن تەڭگە قارالعان.
شاھارداعى كولىك قوزعالىسىن رەتتەيتىن ەندىگى ءبىر جوبا – بايدىبەك بي-ارعىنبەكوۆ كوشەلەرىنىڭ قيىلىسىندا سالىناتىن جولايرىق قۇرىلىسى.
بايدىبەك بي-ارعىنبەكوۆ كوشەلەرىنىڭ قيىلىسىندا كولىك جولايرىعىن سالۋ قۇرىلىسىنىڭ 1-ءشى كەزەڭىنە جاۋاپتى مەردىگەر مەكەمە – «كازاحدورستروي» جشس. قۇرىلىس اۋماعىنىڭ ۇزىندىعى بايدىبەك بي داڭعىلى بويىنشا – 700, ارعىنبەكوۆ كوشەسى بويىنشا 921 مەتردى قۇرايدى.
قۇرىلىس 2020-2022 جىلدار ارالىعىنا جوسپارلانىپ, بيۋدجەتتەن جالپى 11,4 ملرد تەڭگە قارجى قاراستىرىلعان. ال وسى جىلعا قارالعانى – 200 ملن تەڭگە. وسىعان وراي جولايرىق تۇسەتىن ماڭداعى 61 جەر تەلىمىن قايتارۋ قاجەتتىگى تۋىنداپ وتىر.
– نەگىزگى جولدى جابۋعا دەيىن بيىل مامىر-قىركۇيەك ايلارى ارالىعىندا اعاشتاردى تامىرىمەن جۇلۋ, 3-4 سەزدەردەگى بايلانىس جەلىلەرىن قايتا جايلاستىرۋ, ارعىنبەكوۆ كوشەسىندەگى 3-ءشى سەزدەگى تىرەۋ قابىرعاسىن سالۋ جۇمىستارىن جۇرگىزۋ جوسپاردا. سونىمەن قاتار قازان-جەلتوقسان ايلارى ارالىعىندا ارعىنبەكوۆ كوشەسىنىڭ بويىنداعى 3-ءشى سەزدىڭ تىرەۋ قابىرعاسىن سالۋ, توننەل بويىنشا جەر قازۋ جۇمىستارىن جۇرگىزۋ كوزدەلۋدە.
اتالعان ەكى جوبا تولىق اياقتالعان جاعدايدا قالا ىشىندەگى كولىك كەپتەلىسى ازايىپ, تۇرعىندار كەپتەلىسكە ءتۇسىپ, ۋاقىتتان ۇتىلمايتىن بولادى, – دەيدى قالا اكىمىنىڭ ورىنباسارى ماقسۇت يساقوۆ.
شىمكەنت
