اتامىزدىڭ تاقياسىن مۇراجايعا, 2015 جىلى قىزىلوردا قالاسىندا وتكەن ۇلتتىق مۋزەيگە سىي تارتۋ ءىس-شاراسى اياسىندا بالاسى سەيىتبەك تاپسىرعان. سونىمەن بىرگە ول كىسى اكەسىنىڭ قولىنىڭ تابى قالعان كەتپەنىنىڭ باسى مەن وراعىن دا وتكىزىپتى.
بۇگىندە ەرەن ەڭبەگىمەن ەلگە ۇلگى بولعان تۇلعانىڭ ومىردەگى ونەگەلى جولىن اعا بۋىن وكىلدەرى جاقسى بىلگەنىمەن كەيىنگى جاستار ونشا بىلمەيدى. وعان ەندى ءتۇرلى سەبەپ تە بار. سوندا دا داڭقى كۇرىش وسىرۋمەن جالپاق جۇرتقا جايىلعان ىبىراي اتامىزدىڭ ءجونى بولەك. ول كىسى 1944 جىلى كۇرىشتىڭ ءار گەكتارىنان 110 تسەنتنەر, 1945 جىلى 156 تسەنتنەر كۇرىش السا, ال 1947 جىلى وزىنە بەكىتىلىپ بەرىلگەن تاجىريبە ۋچاسكەسىنىڭ ءار گەكتارىنان 172 تسەنتنەردەن ءونىم الىپ, الەمدىك رەكورد جاسادى. 1949 جىلى وسى ەڭبەگى جوعارى باعالانىپ, سوتسياليستىك ەڭبەك ەرى اتاعىن الدى. سونداي-اق ەڭبەك مايتالمانى سوعىس كەزىندە وتان قورعاۋ قورىنا ارناپ تانك كولونناسىن جاساۋعا 150 مىڭ سوم قارجى بەردى.
ىبىراي جاقاەۆ رەسپۋبليكادا العاش بولىپ كۇرىش ەگىسىن جوڭىشقا اتىزىنا ورنالاستىرعان. ونىڭ اشقان جاڭالىعى وندىرىسكە ەنگىزىلىپ, ول ءادىس «جاقاەۆ اگروتەحنيكاسى» دەپ اتالدى. 1971 جىلى اتامىز كەۋدەسىنە ەكىنشى التىن جۇلدىزىن تاقتى. مۇنداي جوعارى دارەجەلى اتاقتى قاتارىنان ەكى رەت العاندار ەلىمىزدە سيرەك. سول ماراپاتتى تاپسىرار كەزدە قاريا: ء«بىر رەت الدىم عوي, ەكىنشى رەت نە كەرەگى بار ەدى, ونان دا اناۋ كۇرىش ەگىپ جۇرگەندەرگە بەرمەدىڭدەر مە؟!» دەپ باسشىلارعا ايتىپتى دەگەن ءسوز بار. جالپى ول كىسى ومىردە وتە قاراپايىم, يماندى ادام بولعان دەيدى. ەگەر دە ۇلتتىق مۋزەيگە جولىڭىز ءتۇسىپ جاتسا, ىبىراي اتامىزدىڭ تاقياسىن كورۋگە بولادى...
ازامات ەسەنجول,
«Egemen Qazaqstan»
