قوعام • 15 ءساۋىر، 2021

ەكپە الۋ پۋنكتى مەشىتتە دە اشىلدى

26 رەت كورسەتىلدى

دارىگەرلەردىڭ پىكىرىنشە، حالىقتى كوروناۆيرۋس ينفەكتسيا­سىنان ۆاكتسينا مەن ۇجىمدىق يممۋنيتەت عانا ساقتايدى. ال جالپى يممۋنيتەت قالىپتاسۋ ءۇشىن كەم دەگەندە ەرەسەك ازاماتتاردىڭ 60 پايىزى ەكپە الۋ كەرەك. سوندىقتان دا شىعىس قازاقستان وبلىسىنىڭ تۇرعىندارىن رەسەيلىك سپۋتنيك V پرەپاراتىمەن جاپپاي ۆاكتسينالاۋ باستالدى.

سۋرەتتى تۇسىرگەن ەرلان ومار، «ەQ»

وڭىردە ءۇش اي بويى كوروناۆيرۋس ىندەتىن جۇقتىرىپ الۋ قاۋپى جوعارى سالادا جۇمىس ىس­تەيتىن سالا ماماندارى ەگىلدى. ولار­دىڭ قاتارىندا مەديتسينا قىزمەتكەرلەرى، قۇقىق قورعاۋ جانە كۇش قۇرىلىمدارىنىڭ قىز­مەتكەرلەرى، پەداگوگتەر بار. بۇگىنگى تاڭدا جالپى 17،5 مىڭنان استام تۇرعىن كورو­نا­ۆيرۋسقا قارسى ەكپە الدى.

ەندىگى كەزەكتە وبلىس تۇر­عىن­دارىن جاپپاي ۆاكتسينا­لاۋ باس­تالادى. شىعىس قازاق­ستاندا قازىر­دىڭ وزىندە 136 ەگۋ پۋنكتى اشىل­دى. ونىڭ 48-ءى وب­لىس­ كاسىپورىندارىندا، 72-ءسى مەدي­تسينالىق مەكەمەلەردە ور­نالاسقان. ەندى دەنساۋلىعىن ويلاعان كەز كەلگەن ازامات ەرىكتى تۇردە سovid-19 ۆيرۋسىنا قارسى ەكپە جاساتا الادى. ەكپە الۋعا بولاتىن ەمحانالار مەن اۋرۋحانالار تىزىمىنە وسكەمەن مەن سەمەيدىڭ 40-تان استام مەديتسينا مەكەمەسى ەنگەن. سونداي-اق، ايماقتىڭ باسقا قالالارى مەن اۋداندارىنداعى 25 مەديتسينالىق مەكەمەسىنەن ەگۋ پۋنكتى اشىلدى. ماسەلەن، وسكەمەن قالاسىنىڭ تۇرعىن­دارى ەكپە الۋ ءۇشىن №1، №2 قا­لا­لىق ەمحانالارعا، انا مەن بالا ورتالىعى، «دەن­ساۋ­لىق» دارىگەرلىك امبۋلاتوريا­سى، «اۆياتسەننا» وتباسىلىق دەن­ساۋ­لىق ورتالىعى سىندى مەكەمەلەرگە جۇگىنە الادى.

ال سەمەيدە ەگۋ كابينەتتەرى №1، №2، №3، №4، №6، №7، №8 قالالىق ەمحانالارىندا جۇ­مىس ىستەيدى. ودان بولەك، №3 كون­سۋل­تاتيۆتىك-دياگ­نوس­تي­كا­لىق ەم­حانادا، №5 دارىگەرلىك ام­بۋ­لاتوريادا، سەمەي تەمىر جول اۋرۋحاناسىندا، №12 العاشقى مەديتسينالىق-سانيتارلىق كومەك كورسەتۋ ورتالىعىندا، «جو­لامان» وتباسىلىق دارىگەر­لىك امبۋلاتورياسىندا، ء«ادىل-ەم» ەمحاناسىندا ۆاكتسينا جاساۋ پۋنكتەرى اشىلدى.

وبلىستا حالىقتىڭ ەكپەنى ەش كەدەرگىسىز الۋ ءۇشىن بارىنشا جاعداي جاسالىپ-اق جاتىر. اي­تا كەتسەك، 8 ساۋىردەن باستاپ ەلەك­تروندى ۇكىمەت پورتالىندا ونلاين رەجىمدە ۆاكتسينالاۋعا جازىلۋ قىزمەتى ىسكە قوسىلدى. قاجەت بولسا، بۇل سايت ارقىلى ەگۋ پۋنكتەرى تۋرالى قوسىمشا اقپارات الۋعا دا مۇمكىندىك بار.

وسكەمەندەگى №1 قالالىق ەمحانانىڭ جالپى پراكتيكا دارىگەرى گۇلنار ءشارىپوۆانىڭ اي­تۋىنشا، ەگۋدى ارنايى وقۋ­دان وتكەن مەدبيكەلەر جۇر­گىزەدى. پرەپارات قاجەتتى تەمپەرا­تۋراداعى تەرموكونتەينەردە ساق­تالادى. ەگۋ الدىندا جارتى ساعات بۇرىن شىعارىلىپ، پاتسيەنتتىڭ كوزىنشە اشىلادى.

– ۆاكتسينا الۋعا نيەت بىل­دىرگەن ازاماتتىڭ دەن­ساۋ­لىعىنا شاعى­مى، سوزىلمالى اۋرۋلاردىڭ اسقى­نۋلارى بولماۋى ءتيىس. ەگۋ الدىندا تەراپەۆت قىسىم مەن تەمپەراتۋرانى ولشەيدى. وسى ۋاقىتقا دەيىن ەكپە العان ەشكىم شاعىمدانا قويعان جوق. ونى سەنىممەن ايتىپ وتىرعانىم، ءۇش كۇن بويى قوڭىراۋ شالىپ، ەكپە العان پاتسيەنتتىڭ قالىن سۇراپ وتىرامىز. 21 كۇننەن كەيىن ۆاكتسينالاۋدىڭ ەكىنشى كەزەڭى وتەدى. ال ءۇش كۇننەن سوڭ پاتسيەنت ۆاكتسينالاۋدان وتكەنىن كۋالاندىراتىن ەلەكتروندى پاسپورت الادى، – دەيدى دارىگەر گۇلنار ءشارىپوۆا.

دارىگەرلەر ايتقانداي، ۆي­رۋس­تىڭ تارالۋىن ۆاكتسينا عانا توق­تاتا الادى. بۇل الەمدىك پراك­­تيكادا دالەلدەنىپ جاتىر. سون­­دىقتان كەرى زيانى بار دەپ، ەكپەدەن قاشۋدىڭ قاجەتى جوق سياقتى. جۋىقتا ەكپە العان سەمەيلىك ەرجان رايحانوۆ egov.kz. پور­­تالى ارقىلى تىركەلىپ بارىپ العىزعانىن ايتتى.

– ءوز ەركىممەن پورتالعا تىر­كەلدىم. ويتكەنى ارالاسىپ-قۇرا­لاسىپ جۇرگەن قارت تۋىستارىم بار، ال ءوزىم كوپشىلىكپەن جۇمىس ىستەيمىن. قاۋىپتىڭ الدىن الۋ ءۇشىن ەكپە الۋعا شەشىم قابىل­دادىم. ەgov.kz پورتالىندا كۇنى مەن ۋاقىتىن بەلگىلەدى. ەش كەزەكسىز، ەش كەدەرگىسىز ەكپەم­دى الدىم. ودان كەيىن جارتى ساعاتتاي دارى­گەردىڭ قاداعا­لاۋ­ىندا بولدىم. قازىر الاڭسىز­بىن، – دەيدى ەرجان رايحانوۆ.

الداعى ۋاقىتتا شىعىس قا­زاق­ستانعا ۆاكتسينانىڭ تاعى 94 مىڭ كومپونەنتى كەلەدى. وسى تۇستا ايتا كەتەرلىگى، ەكپە الۋ – ۇستاعان ورازانى بۇزبايدى. ءتىپتى وسكەمەندەگى وبلىستىق «حاليفا التاي» مەشىتىندە ەگۋ پۋنكتى دە اشىلدى. ول ءۇشىن وبلىستىڭ باس مەملەكەتتىك سانيتارلىق دارىگەرى قانات تۋرديەۆ ورتالىق مەشىتتىڭ باس يمامى ەرمەك قاجى مۇقاتايمەن كەزدەسىپ، ەكى جاق ءوزارا ىنتىماقتاستىق تۋرالى مەموراندۋمعا قول قويدى.

– مەموراندۋمنىڭ ماقساتى – ەكى جاق بىرلەسە وتىرىپ، ەلدەگى ىندەتتىڭ تارالۋىنىڭ الدىن الۋ. دەنساۋلىق – اللانىڭ ادامزاتقا بەرگەن اماناتى. سوندىقتان ءبىز ءوزىمىزدىڭ دەنساۋلىعىمىز ءۇشىن، جاقىندارىمىز ءۇشىن ۆاكتسينا الۋىمىز كەرەك. ەندى وسىدان بىلاي مەشىتتە ارنايى ۆاكتسينالاۋ پۋنكتتەرى جۇمىس ىستەيتىن بولادى. كەيبىر ورازا ۇستاعان جاماعات «ۆاكتسينا الۋ ورازانى بۇزباي ما؟» دەپ سۇرايدى. جوق، بۇزبايدى. قازاقستان مۇسىلماندارى ءدىني باسقارماسىنىڭ تالقىلاۋىمەن ورازا ۇستاعان ادام ۆاكتسينا الۋىنا بولادى دەگەن شەشىم قابىلداندى. شاريعاتتا ۆاكتسينانىڭ ورازاعا ەش كەدەرگىسى جوق. سوندىقتان دەنساۋ­لى­عى­مىزدى باستى ورىنعا قويا وتىرىپ، بارلىق جاماعاتتى ىندەت­كە قارسى ۆاكتسينا الۋعا شاقى­رامىن، – دەدى «حاليفا التاي» مەشىتىنىڭ باس يمامى ەرمەك مۇقاتاي. 

 

شىعىس قازاقستان وبلىسى

 

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار