پارلامەنت • 14 ءساۋىر، 2021

ءماجىلىس ەاەو تۋرالى شارت اياسىندا جاڭا راتيفيكاتسيالىق زاڭ جوبالارىن ماقۇلدادى

14 رەت كورسەتىلدى

ءماجىلىس سپيكەرى نۇرلان نىعماتۋليننىڭ توراعالىعىمەن جالپى وتىرىستا، پالاتا دەپۋتاتتارى بىرقاتار جاڭا راتيفيكاتسيالىق زاڭ جوباسىن ماقۇلدادى، دەپ حابارلايدى Egemen.kzء ماجىلىستىڭ ءباسپاسوز قىزمەتىنە سىلتەمە جاساپ.

اتاپ ايتقاندا، ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋىنا بايلانىستى ەاەو قۇقىعىنا كىرەتىن جەكەلەگەن حالىقارالىق شارتتاردى جانە ەاەو ورگاندارىنىڭ اكتىلەرىن قولدانۋى جونىندەگى جاعدايلار مەن وتپەلى ەرەجەلەر تۋرالى 2015 جىلعى 8 مامىرداعى حاتتاماعا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوباسى ماقۇلداندى. 

قۇجات قىرعىز رەسپۋبليكاسى ءۇشىن وتپەلى كەزەڭدى ەۋرازيالىق ەكونوميكالىق وداقتىڭ بىرىڭعاي كەدەندىك تاريفتەرىن تولىق يمپلەمەنتاتسيالاۋعا دەيىن ۇزارتۋ جونىندەگى ۋاقدالاستىقتاردى ىسكە اسىرۋعا باعىتتالعان. سونىمەن قاتار، ءۇشىنشى ەلدەردەن اكەلىنەتىن كەيبىر تاۋارلارعا قاتىستى قىرعىز رەسپۋبليكاسى قولداناتىن كەدەندىك-تاريفتىك رەتتەۋ سالاسىنا تۇزەتۋلەر ەنگىزۋ قامتىلعان.

وسى رەتتە، ءماجىلىس توراعاسى نۇرلان نىعماتۋلين حالىقارالىق شارتتاردى راتيفيكاتسيالاۋ راسىمدەرىنىڭ مەرزىمدەرى كەيبىر مينيسترلىكتەر تاراپىنان جۇيەلى تۇردە بۇزىلاتىنىنا نازار اۋداردى. مىسالى، ەۋرازيالىق ەكونوميكالىق وداق شەڭبەرىندە وسى ماڭىزدى راتيفيكاتسيانى كەلىسۋدىڭ مەملەكەتىشىلىك راسىمدەرىن وتكىزۋ ءبىر جىلدام استام ۋاقىتقا سوزىلعان.

- پاندەميا مينيسترلىكتەر جۇمىسىنىڭ قارقىنىن، ساپاسىن جانە جاۋاپكەرشىلىگىن تومەندەتۋگە سەبەپ بولماۋعا ءتيىس. بۇل جەردە باستى ماسەلە، قۇزىرلى مينيسترلىكتەر مەن قۇرىلىمداردىڭ بىرلەسكەن جۇمىسىنا بايلانىستى. جالپى ايتقاندا، حالىقارالىق كەلىسىمدەردى ۋاقىتىلى راتيفيكاتسيالاۋ ينتەگراتسيالىق پروتسەستەر ءۇشىن وتە ماڭىزدى، - دەدى نۇرلان نىعماتۋلين.

بۇگىنگى وتىرىستا پالاتا ەۋرازيالىق ەكونوميكالىق وداق تۋرالى شارتقا ارمەنيانىڭ قوسىلۋى تۋرالى 2014 جىلعى 10 قازانداعى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوباسىن ماقۇلدادى.  

حاتتاما ارمەنيا رەسپۋبليكاسى ءۇشىن وتپەلى كەزەڭدى ەۋرازيالىق ەكونوميكالىق وداقتىڭ بىرىڭعاي كەدەندىك تاريفتەرىن تولىق يمپلەمەنتاتسيالاۋعا دەيىن ۇزارتۋ جونىندەگى ۋاقدالاستىقتاردى ىسكە اسىرۋعا باعىتتالعان.

سونداي-اق بۇگىن پالاتا دەپۋتاتتارى جەر قاتىناستارى ماسەلەلەرى بويىنشا زاڭ جوباسىن ەكىنشى وقىلىمدا ماقۇلدادى.

زاڭ جوباسىن قاراۋ بارىسىندا دەپۋتاتتار زاڭ جوباسىن ەنگىزۋ ماقساتىن كۇشەيتۋگە باعىتتالعان تۇزەتۋلەر ەنگىزدى. اتاپ ايتقاندا، شەتەلدىك ازاماتتار مەن زاڭدى تۇلعالار، شەتەلدىك قاتىسۋ ۇلەسى بار بىرلەسكەن كاسىپورىندار زاڭدى تۇلعا قاتىسۋشىلارىنىڭ قۇرامىنا كىرگەن جاعدايدا، سونداي-اق زاڭدى تۇلعا قاتىسۋشىسىنىڭ قازاقستان رەسپۋبليكاسىنىڭ ازاماتتىعى توقتاتىلعان كەزدە اۋىل شارۋاشىلىعى جەرلەرىن يەلىكتەن شىعارۋ راسىمدەرى كوزدەلگەن.

بۇعان قوسا، قازاقستان رەسپۋبليكاسىنىڭ قولدانىستاعى زاڭناماسىنا سايكەس كەلتىرۋگە باعىتتالعان رەداكتسيالىق-ناقتىلاۋ سيپاتىنداعى تۇزەتۋلەر قابىلداندى، سونداي-اق زاڭ جوباسىنىڭ ەرەجەلەرى ءبىر-بىرىمەن ۇيلەسكەن. 

وتىرىس سوڭىندا ءماجىلىس دەپۋتاتتارى مەملەكەتتىك ورگاندار باسشىلارىنا دەپۋتاتتىق ساۋالدار جولدادى. ولار: ا.راۋ، ۆ.كيم، ا.ميليۋتين، ە. سمايلوۆ، د.تۇرعانوۆ، س.رەشەتنيكوۆ، ج. احمەتبەكوۆ، ق.يسا، ب.تىلەۋحان، ە.ەرۋباەۆ، ب.رامانقۇلوۆ، ع.ەلەۋوۆ، ب.بۇلاروۆ، ا.ليننيك.

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار