– دەنساۋلىق ساقتاۋ مينيسترلىگىنىڭ 2021 جىلدىڭ 12 ساۋىردەگى اقپاراتىنا سايكەس جاپپاي ۆاكتسينالاۋ باستالعاننان بەرى 300 مىڭنان استام قازاقستاندىقتار كوروناۆيرۋسقا قارسى ەكپە العان, – دەدى «كدل وليمپ» جشس باس ديرەكتورى ەرلان سۇلەيمەنوۆ. – ەندى پاتسيەنتتەردى «ەكپە قانشالىقتى ءتيىمدى بولدى؟», «ۆاكتسينادان كەيىن يممۋنيتەت قالىپتاستى ما؟» دەگەن سۇراقتار مازالايدى. بۇل ساۋالدارعا جاۋاپ بەرۋ ءۇشىن ءبىز جاڭا تەست ەنگىزىپ وتىرمىز. ول پوستۆاكتسينالىق انتيدەنەلەردىڭ بار-جوعىن انىقتاۋعا مۇمكىندىك بەرەدى. تەست «كوروناۆيرۋستىڭ S-اقۋىزىنا قارسى G يممۋنوگلوبۋليندەرىن انىقتايتىن يممۋنوفەرمەنتتىك تالداۋ» دەپ اتالادى.
ەكپە سالعاننان كەيىن اعزا كوروناۆيرۋستىڭ S-اقۋىزىنا قارسى انتيدەنەلەر قالىپتاستىرىپ, يممۋندىق جاۋاپ بەرەدى. جيىنتىق انتيدەنەلەردى انىقتاۋعا باعىتتالعان ەلەكتروحەميليۋمينەستسەنتسيا (ەحل) ادىسىمەن جاسالاتىن ادەتتەگى تالداۋ ۆاكتسينانىڭ تيىمدىلىگىن قاداعالاۋعا كەلمەيدى, سەبەبى ول S-اقۋىزىنا قارسى انتيدەنەلەردى كورسەتپەيدى. جيىنتىق انتيدەنەلەردى تەكسەرەتىن تالداۋ كوروناۆيرۋسپەن اۋىرعانداردا N-اقۋىزىنا قارسى انتيدەنەلەردى انىقتايدى. سوندىقتان پوستۆاكتسينالىق انتيدەنەلەردى انىقتاۋعا ارنالعان بولەك جاڭا تالداۋدى ەنگىزۋ قاجەتتىلىگى تۋىندادى.
«وليمپ» كلينيكالىق-دياگنوستيكالىق زەرتحانالار جەلىسى جاڭا زەرتتەۋدى ەلىمىزدىڭ بارلىق ايماعىندا جاسايدى. پوستۆاكتسينالىق انتيدەنەلەردى انىقتايتىن تالداۋدى ەكپەنىڭ ءبىرىنشى دوزاسىن العاننان كەيىن 42 كۇن وتكەندە, ياعني 6 اپتادان سوڭ تاپسىرۋ قاجەت. ونىمەن قوسا, «وليمپ» زەرتحانالارى كوروناۆيرۋسپەن, ونىڭ ىشىندە سيمپتومسىز تۇرىمەن اۋىرعاندار ءۇشىن جيىنتىق انتيدەنەلەردى تەكسەرۋ بويىنشا زەرتتەۋ جاساۋدى جالعاستىرۋدا. بۇل تالداۋ دا جاپپاي ۆاكتسينالاۋ باستالعاننان بەرى اسا وزەكتى بولىپ وتىر. سەبەبى ءبىر مەزەتتە بارلىق حالىقتى ۆاكتسينالاۋعا مۇمكىندىك جەتكىلىكسىز بولعاندىقتان, ەڭ الدىمەن انتيدەنەلەرى جوق ادامدارعا ەكپە سالۋ قاجەت. انتيدەنەلەرى بار پاتسيەنتتەر ازىرگە قورعانىشقا يە, سوندىقتان ولارعا ەكپەنى كەيىنىرەك, انتيدەنەلەرى ازايعاندا سالۋعا بولادى. قولدا بار قورلاردى ءتيىمدى پايدالانۋ ۇجىمدىق يممۋنيتەتتى تەزىرەك قالىپتاستىرۋعا سەپتىگىن تيگىزەدى.
