ەۋرازيالىق توپ (ERG) قۇرامىنداعى اقتوبە فەرروقورىتپا زاۋىتىنىڭ ءبىرىنشى جانە ەكىنشى تسەحتارىن قايتا قۇرۋعا باسا نازار اۋدارىلىپ وتىر. ول قاتتى قالدىقتار شىعارىندىسىن 30 پايىزعا ازايتۋعا مۇمكىندىك بەرەدى. بالقىتۋ تسەحتارىن قايتا قۇرۋدان بولەك, مۇندا تاعى ءبىر جوبا بار. ول – فەرروقورىتپا گازى پايدالانىلاتىن ۋتيليزاتسيالىق ەلەكتر ستانساسىنىڭ قۇرىلىسى. ونىڭ ەلەكتر ەنەرگياسىن ءوندىرۋ قۋاتى شامامەن 100 مۆت بولماق.
– بۇل جوبانىڭ ماڭىزدىلىعىنا نازار اۋدارعىم كەلەدى. اۋاعا شىعارىلاتىن گازداردى ءوندىرىستىڭ ەلەكتر ەنەرگياسىنا كادەگە جاراتۋ ارقىلى ءبىر وقپەن ەكى قوياندى اتۋعا بولادى. ياعني ەلەكتر ەنەرگياسىن ءوندىرۋ جانە گازدى پايدالانۋ تۇرعىسىنان. بۇل جوبانى ۇكىمەتتە قولدادىق. سوندىقتان ونى بارىنشا جىلدام ىسكە قوسۋ كەرەك, – دەدى اقتوبە فەرروقورىتپا زاۋىتىندا بولعان ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ.
«قازحروم» ترانسۇلتتىق كومپانياسى قالدىقتاردى قايتا وڭدەۋ باعدارلاماسىنا ەرەكشە كوڭىل ءبولىپ وتىر. 2019 جىلعى ءساتسىز تاجىريبەنى ەسكەرە وتىرىپ, كومپانيا قالدىقتاردى قايتا وڭدەيتىن بوگدە ۇيىمدارمەن بىرلەسە جۇمىس ىستەۋدەن باس تارتتى. وسىلايشا, ERG-ءدىڭ بارلىق كاسىپورنىندا قالىپتاساتىن قالدىقتارعا قاتىستى قىزمەتتەر تسيكلىن ۇسىنۋعا مامانداندىرىلعان ERG Recycling كومپانياسى قۇرىلعان بولاتىن. بۇگىندە ERG Recycling كومپانياسىنىڭ تىكەلەي قاتىسۋىمەن بىرقاتار قايتا وڭدەۋ جانە ەكولوگيالىق باعىتتاعى جوبالار ىسكە اسىرىلدى. 2021 جىلى اقتوبە فەرروقورىتپا زاۋىتىندا ىسكە قوسىلعان گاز تازارتۋداعى شاڭدى بريكەتتەۋدىڭ جوعارى تەحنولوگيالىق تسەحى – سونىڭ ايقىن دالەلى.
تسەح ايىنا 4 مىڭ تونناعا دەيىن جوعارى ساپالى حروم بريكەتتەرىن شىعارا الادى. كومپانيادا قاجەتتىلىكتەر تۋىنداعاندا ىلەسپە ءوندىرىس رەتىندە قۇرىلىس ماتەريالدارى (قابىرعا جانە ىرگەتاس بلوكتارى) شىعارىلادى. تۇراقتاندىرىلعان جانە قاتپارلى شلاكتاردى قايتا وڭدەۋ جۇمىستارىنان جىلىنا 200 مىڭ توننا ءونىم وندىرىلۋدە. 2019 جىلى باستالعان اقتوبە فەرروقورىتپا زاۋىتىنىڭ تازارتىلعان فەرروحرومىنىڭ قوردالانعان شلاكتارىن وڭدەۋ ءىسى جالعاستىرىلادى. بۇل – ستراتەگيالىق تاپسىرما. وڭدەۋ قارقىنىنا كەلەتىن بولساق, 2019 جىلى – 50 مىڭ توننا, 2020 جىلى 100 مىڭ توننا قالدىق وڭدەلگەن. 2021 جىلى قوسىمشا 150 مىڭ توننا وڭدەلمەك. ERG Recycling 2025 جىلعا قاراي جىلدىق كولەمىن 500 مىڭ تونناعا دەيىن ۇلعايتۋدى جوسپارلاپ وتىر. وسى جىلدىڭ وزىندە اقتوبە فەرروقورىتپا زاۋىتىندا شلاكتاردان مەتالدى تولىعىمەن الۋ جانە ودان ءارى بەتون ەرىتىندىلەرى تۇرىندە سۇرانىسقا يە قۇرىلىس ونىمدەرىن شىعاراتىن قايتا وڭدەۋ كەشەنىنىڭ ءبىرىنشى كەزەڭى ىسكە اسىرىلماق.
– «قازحروم» جابدىقتاردى مودەرنيزاتسيالاۋ, قالدىقتاردى وڭدەۋدەن بولەك, شىعىن كوزدەرىنە شولۋ جاساۋدىڭ اۆتوماتتاندىرىلعان جۇيەسىن ورناتىپ جاتىر. بۇل كەزەڭدە كەلىسىم جاسالىپ, جوبا الدىنداعى تەكسەرىس باستالدى. كومپانيانىڭ اقسۋ, اقتوبە جانە حرومتاۋ قالالارىنداعى فيليالدارىنىڭ سانيتارلىق-قورعاۋ ايماقتارى شەكارالارىندا باقىلاۋدىڭ اۆتوماتتاندىرىلعان جۇيەسىن ورناتۋ كوزدەلگەن. 2021 جىلدىڭ سوڭىندا اتالعان زاماناۋي جابدىقتى پايدالانۋعا بەرۋ جوسپاردا بار, – دەپ حابارلادى ەۋرازيالىق توپتىڭ ءباسپاسوز قىزمەتى.
«قازحروم» تۇك» اق پرەزيدەنتى ارمان ەسەنجولوۆتىڭ ايتۋىنشا, قورشاعان ورتاعا دەگەن قامقورلىق تەك وندىرىستىك قىزمەتپەن شەكتەلىپ قالماۋى كەرەك. بۇل رەتتە كومپانيا 2021 جىلى قورشاعان ورتاعا جۇكتەمەنى ازايتۋعا باعىتتالعان شارالاردى جۇزەگە اسىرۋ ءۇشىن ءوزىنىڭ بارلىق فيليالدارىنا (اقتوبە جانە اقسۋ فەرروقورىتپا زاۋىتتارى, ءدوڭ تاۋ-كەن بايىتۋ كومبيناتى, «قازمارگانەتس» كەن باسقارماسى) 20 ملرد تەڭگەدەن استام ينۆەستيتسيا قۇيۋدى جوسپارلاپ وتىر. ەكونوميكاداعى كۇردەلى كەزەڭگە قاراماستان, كومپانيا قورشاعان ورتانى قورعاۋ شارالارىنا ارنالعان شىعىنداردى ازايتپاي, كەرىسىنشە, ودان ءارى ۇلعايتۋدا. ماسەلەن, بىلتىر «قازحرومنىڭ» بارلىق فيليالدارى ءۇشىن شامامەن 11,5 ملرد تەڭگە بولىنگەن ەدى. ال 2021 جىلى 9 ملرد تەڭگەدەن استام قارجى ءبىر عانا اقتوبە فەرروقورىتپا زاۋىتىندا جۇمسالماق.
بيىل اقسۋ مەن اقتوبە فەرروقورىتپا زاۋىتتارى كەشەندى ەكولوگيالىق رۇقسات الدى. كومپانيا ەۋروپا مەن رەسەيدىڭ تاجىريبەسىن ەسكەرە وتىرىپ, ەڭ ءتيىمدى قولجەتىمدى تەحنولوگيالاردى ەنگىزۋدىڭ 2030 جىلعا دەيىنگى باعدارلاماسىن ازىرلەدى. ونى ىسكە اسىرۋعا شامامەن 48 ملرد تەڭگە بولىنەدى. ەندى ەكى زاۋىتتىڭ قورشاعان ورتاعا تيگىزەتىن جالپى اسەرى 40 پايىزعا دەيىن تومەندەيتىن بولادى.
