«اسا قامقور ەرەكشە مەيىرىمدى اللانىڭ اتىمەن باستايمىن! بارلىق ماقتاۋ اللاعا ءتان. ارداقتى پايعامبارىمىز مۇحاممەدكە اللانىڭ سالاۋاتى مەن سالەمى بولسىن!
قۇرمەتتى قاۋىم!
بارشاڭىزدى ون ەكى ايدىڭ سۇلتانى, قاسيەتتى رامازاننىڭ باستالاۋىمەن شىن جۇرەكتەن قۇتتىقتايمىن! وتباسىلارىڭىزعا باق پەن بەرەكە تىلەيمىن!
جاراتۋشى جاببار يەمىز ءاربىر ىزگى امالدىڭ ساۋابى ەسەلەنىپ جازىلاتىن بەرەكەلى ايدا ۇستاعان ورازامىزدى, جاساعان دۇعامىزدى, وقىعان نامازىمىزدى, ورىندى سەبەپتەرمەن اۋىز بەكىتە الماي قالعان جانداردىڭ بەرگەن ساداقالارىن قابىل ەتكەي!
رامازاندا اۋىز بەكىتكەن ءيسى مۇسىلمان بالاسى ءوزىن ءىشىپ-جەۋدەن عانا شەكتەمەي, جانى مەن ءتانىن جاماندىقتان ساقتاپ, ىزگىلىككە ۇمتىلادى. ءىس-ارەكەتىن مۇسىلمانعا ءتان ادەپ اياسىندا ورىنداۋعا تىرىسادى. ويتكەنى, رامازان – كەز كەلگەن ىزگى امالدى رياسىز نيەتپەن جاساۋعا تاربيەلەيتىن, ادامدى تاقۋالىققا ۇيرەتەتىن اي. اشتىق پەن شولگە ءتوزىپ, اللا رازىلىعىن الۋدى شىنايى نيەت ەتكەن ادامعا بەرىلەتىن سىي مەن قۇرمەت ەرەكشە بولماق.
اللا تاعالا قۇدسي-حاديستە: «اۋزى بەرىك ادام ءىشىپ-جەۋىن مەن ءۇشىن دوعاردى. ورازا – مەن جانە ق ۇلىمنىڭ اراسىنداعى عيبادات. وعان بەرىلەتىن سىيدى مەن عانا ولشەپ, مەن بەرەمىن. اۋزى بەرىك ق ۇلىمنىڭ اشتىق پەن شولدەۋ سەبەبىنەن شىققان اۋىز ءيىسى مەن ءۇشىن ميسك اتىرىنەن دە قايىرلى», دەگەن.
قادىرلى جاماعات!
بۇگىندە قازاقستان مۇسىلماندارى ءدىني باسقارماسى «يحسان ءىلىمىن» كەڭىنەن ناسيحاتتاپ كەلەدى. يحسان – پەندەنىڭ يمانىن بەكەمدەپ, قۇلشىلىققا دەگەن قۇلشىنىسىن ارتتىراتىن, ادامگەرشىلىككە ءتان يگى قاسيەتتەردى كەمەلدەندىرە تۇسەتىن, ءار امالدى كوركەم تۇردە ورىنداۋعا ۇيرەتەتىن رۋحاني ءىلىم. وسى رەتتە رۋحاني كەمەلدەنۋ ايى – رامازاندا بارىنشا ادەپسىز ارەكەت پەن قاتە-كەمشىلىكتەن ارىلىپ, تۇلابويىمىزدا كوركەم مىنەز قۇندىلىقتارىن قالىپتاستىرۋعا تىرىسقانىمىز ابزال.
اللا تاعالا جەر بەتىنەن جۇقپالى ىندەتتى جويىپ, ادامزاتتى قاۋىپ-قاتەردەن امان ەتكەي. ءامين!», دەلىنگەن قۇتتىقتاۋدا.
