شىعارماشىلىق شاڭىراعىندا قولعا الىنعان كورمەگە ءوز كەزەگىمەن جىل كولەمىندە وبلىستىڭ ون بەس اۋدانى قاتىسادى. سۋرەتشىلەرىمەن قاتار اقىندارى, انشىلەرى دە ونەر كورسەتەدى. تولاعاي تاۋىنىڭ بوكتەرىنەن كەلگەن كوكپەكتىلىكتەر «دالا ديدارى» اتتى كورمەگە بارىن سالدى. بەلگىلى ايتىسكەر اقىن فارحات مارات ۇلى جىردان شاشۋ شاشسا, «تولاعاي» سازدى حالىق اسپاپتار وركەسترىنىڭ ءانى اۋەلەدى.
ال مۋزەيدىڭ كەڭ زالىنا كوكپەكتىنىڭ كورىكتى تابيعاتى بەينەلەنگەن كارتينالار مەن قولونەر شەبەرلەرىنىڭ جاساعان بۇيىمدارى قويىلدى. اسىرەسە, سەرىكباي رىسۇمبەتوۆتىڭ «قىس», ەلميرا ىزعۇتتىنوۆانىڭ «تاڭ» اتتى پەيزاجدارى كوپشىلىكتىڭ نازارىن اۋداردى. وكسانا لۋتسكايا, جاننا جابەكوۆالاردىڭ جاساعان قولونەر بۇيىمدارىنا دا كەلگەن قوناقتار قىزىعا قارادى. كوپشىلىك دەيمىز, سانيتارلىق تالاپتارعا ساي شاقىرىلعان قوناقتاردىڭ سانى شەكتەۋلى ەدى. كورمەنى كەلىپ كورە الماعاندار ءۇشىن مۋزەي قىزمەتكەرلەرى الەۋمەتتىك جەلى ارقىلى ونلاين ەكسكۋرسيا ۇيىمداستىرادى.
– وبلىس ورتالىعىندا اۋدانداردىڭ كورمەسىن وتكىزۋ – وتە دۇرىس ءۇردىس. ويتكەنى ءوز اۋىلىنان ۇزاماي جۇرگەن ونەرلى جاستار كوپ. «الماس پىشاق قىن تۇبىندە جاتپايدى» دەمەكشى, بويىندا تالانتى بار قىز-جىگىتتەر رۋحاني ورتاعا كورىنۋى كەرەك. مەن كورمەلەرگە دارىندى جاستاردى ىزدەپ كەلەمىن. تالابى بولسا, كورگەن-بىلگەنىمدى ايتامىن, ۇيرەتەمىن, – دەيدى بەلگىلى سۋرەتشى قۇداش نۇرسادىقوۆ.
راس, الىس اۋىلداعى شىن تالانتتاردىڭ ونەرى ورگە ءجۇزسىن دەسەك, وسىنداي ءدۇبىرلى كورمەلەر ءجيى وتكىزىلىپ تۇرۋى كەرەك. كوكپەكتىدەن كەيىن شىعىس جۇرتى مامىر ايىندا كۇرشىم, التاي اۋداندارىنىڭ كورمەسىن تاماشالايدى.
شىعىس قازاقستان وبلىسى
