گالەرەيا – «استانا» حالىقارالىق ۋنيۆەرسيتەتىنىڭ ارنايى جوباسى. اتالعان ۋنيۆەرسيتەتتىڭ جوعارى ونەر جانە ديزاين مەكتەبىنىڭ دەكانى سايات بايمۇرات ۇلى بىزگە كورمە ورتالىعىن تانىستىرا ءجۇرىپ, ۇلتتىق مەكتەپ قالىپتاستىرۋداعى اعا بۋىن سۋرەتشىلەرىمىزدىڭ ءورىستى ونەگەسى جايىندا اڭگىمەلەپ بەردى. ونىڭ ايتۋىنشا, كورمە اشۋداعى ماقسات – رۋحاني جانە ۇلتتىق بىرەگەيلىكتى نىعايتۋ, تاريحي مۇرالاردى ساقتاۋ جانە جاھاندىق مادەني كەڭىستىكتىڭ وزگەرۋ جاعدايىندا ۇلتتىق بەينەلەۋ ونەرىن دامىتۋ. كورمەگە تاۋەلسىزدىك كەزەڭى الدىندا وزىندىك ىزدەنىسىمەن ۋاقىت جارشىسىنا اينالعان سۋرەتشىلەر ورال تاڭسىقباەۆ, ساليحيتدين ايتباەۆ, الپىسباي قازىعۇلوۆ, كاميل مۋللاشەۆ, ءابدىراشيت سىدىحانوۆ, گۇلميرا تەلعوزيەۆا, زەينەكۇل ءتۇسىپوۆ, ابرام چەركاسسكي, ابرام شارايدەنوۆتىڭ جۇمىستارى قويىلعان.
ء«بىزدىڭ قورىمىزدا قازاقستان بەينەلەۋ ونەرىنىڭ اتاقتى سۋرەتشىلەرىنىڭ جۇمىستارى ساقتاۋلى. اراسىندا ۇلتتىق مۋزەيدە جوق قۇندى جادىگەرلەر دە بار. كورىپ تۇرعانىڭىزداي, كاميل مۋللاشەۆتىڭ قازان قالاسىنا قويىلۋى ءتيىس «سۇيىنبيكە» ءمۇسىنىنىڭ شاعىن كوشىرمەسى دە وسىندا تۇر. جالپى, «استانا» حالىقارالىق ۋنيۆەرسيتەتىنىڭ قۇرامىندا جەتى جوعارى مەكتەپ بار. سونىڭ ءبىرى وسى ونەر جانە ديزاين جوعارى مەكتەبى شىعارماشىل, ءورشىل تالاپكەرلەرگە جان-جاقتى قولداۋ كورسەتىپ كەلەدى», دەيدى سايات بايمۇرات ۇلى. ونىڭ ايتۋىنشا, قازاقستان بەينەلەۋ ونەرىن قولداۋ جانە ناسيحاتتاۋ, وتاندىق شەبەرلەر مەن تالانتتى جاستاردى قازىرگى الەمنىڭ شىعارماشىلىق ونەر پروتسەستەرىنە تارتۋ – گالەرەيا جۇمىسىنىڭ نەگىزگى مىندەتتەرى. سونداي-اق «استانا» حالىقارالىق ۋنيۆەرسيتەتىنىڭ (AIU) برەند-امباسسادورى NOMAD ەتنوتوبىنىڭ ارتىستەرى ولجاس قۇرمانبەك پەن ايقىن سەيتەكوۆتىڭ Dimash Qudaibergen Team جوباسىنىڭ سوليستەرى ەكەنىن دە ۋنيۆەرسيتەت ماقتانىش تۇتاتىنىن اتاپ ءوتتى.
ءبىز گالەرەيادا ءوتىپ جاتقان مۋزەي كورمەسىن ارالاي ءجۇرىپ, دۇنيەجۇزىلىك ونەر تاريحىندا ماڭىزدى ۇلەس رەتىندە قارالاتىن شىعىس كىلەمدەرىنىڭ ەكسپوزيتسياسىنا كۋا بولدىق. مۇنداعى ءتۇرلى كەسكىندەمەلىك بەينەسىمەن ەرەكشەلەنەتىن كىلەمدەر ءار كەزەڭدەگى ءوندىرىس نارىعىنان حابار بەرەدى. بۇل – جوعارى مەكتەپ باستاماسىمەن قۇرىلعان ۇلكەن كورمە كەشەنى سانالاتىن شىعىس مۋزەيىنىڭ كەزەكتى جوباسى. «شىعىس مۋزەيىنىڭ تاعى ءبىر جوباسى – كىلەمدەر. ءار كەزەڭگە تيەسىلى قازاق, تۇرىكمەن, ازەربايجان كىلەمدەرى جيناقتالىپ جاتىر. بايقاساڭىز, ەۋروپا, اقش ەلدەرىندە شىعىس مۋزەيى دەگەن ارنايى مۇراجاي بار. ال ونداي شىعىستىق مادەنيەتتەن حابار بەرەتىن مۋزەي ءوزىمىزدىڭ ورتالىق ازيادا جوق. كەلەشەكتە ۇلتتىق دۇنيەلەردى قالىپقا كەلتىرۋدى, ەكسپەديتسيا ۇيىمداستىرا وتىرىپ مۋزەي قورىن كەڭەيتۋدى ويلاستىرىپ وتىرمىز», دەيدى سايات بايمۇرات ۇلى.
بيىل شىعىس مۋزەيى مەن ÚRKER ارت-گالەرەياسى قورى بويىنشا ارنايى جيناق شىعارىلماق. سونداي-اق مۋزەيدە نۋميزماتيكانىڭ ۇلكەن قورى, شىعىستىڭ تاريحي كارتالارى, شىعىس ونەرى جايىندا سىر شەرتەتىن سيرەك باسىلىمدار ساقتالعان. مۋزەي كوللەكتسياسىنىڭ ءبىراز بولىگىن شەبەرلەر سىيعا تارتقان 100-دەن استام جادىگەرلەر قۇرايدى. تامىرىن تەرەڭنەن الاتىن زەرگەرلىك ونەر شەبەرلەرى شالقار سەكەنوۆ, بەرىك ءالىباي, نۇردامبەك بەكبولاتتىڭ توپتاماسىن دا وسى قاتاردان كورە الاسىز.
اتالعان مەكتەپتىڭ تاعى ءبىر تاعىلىمدى جوباسى – بالالار كوركەمسۋرەت ستۋدياسى. پارلامەنت سەناتىنىڭ توراعاسى ماۋلەن اشىمباەۆ, پرەمەر-ءمينيستردىڭ ورىنباسارى ەرالى توعجانوۆ باس بولىپ اشىلعان ورتالىق بالالاردى كوركەمدىك-ەستەتيكالىق دامۋعا جەتەلەي وتىرىپ, تاجىريبەلى ۇستازدار الدىنان ساندىك-قولدانبالى ونەر, كەسكىندەمە, گرافيكا جانە ءمۇسىن ونەرى جايىندا ءدارىس الۋعا مۇمكىندىك بەرەدى.
«استانا» حالىقارالىق ۋنيۆەرسيتەتىندە «ديزاين» باعدارلاماسى بويىنشا وقىتىلاتىن تانىمال ساۋلەت جانە ينتەرەر ديزاينى, گرافيكالىق ديزاين, ۆەب-ديزاين ماماندىقتارى نارىقتىق ەكونوميكاداعى كوپتەگەن باعىتتى قامتيدى. بۇل ماماندىق بويىنشا وقۋدىڭ باستى ارتىقشىلىعى كاميل مۋللاشەۆ, جۇماقىن قايرامباەۆ, قازبەك اجىبەك شەبەرحاناسىنان ءتالىم الۋعا مۇمكىندىك بەرەدى.
قاي زاماندا دا ونەر ۇلكەن قامقورلىقتى قاجەت ەتكەندىگىن ەسكەرسەك, بۇگىنگى ۋاقىت شەڭبەرىندە ۋنيۆەرسيتەت بەرگەن مۇمكىندىك نەگىزىندە كورگەنى مەن تۇيگەنى مول, تاجىريبەسى تولىققان اعا بۋىن عيبراتىن كەلەشەك جاستارعا جەتكىزۋدىڭ ماڭىزى زور.
