قوعام • 12 ءساۋىر، 2021

بۇگىن - قانىش ساتباەۆتىڭ تۋعانىنا 122 جىل

109 رەت كورسەتىلدى

بۇگىن بەلگىلى عالىم، پروفەسسور، قوعام قايراتكەرى قانىش ساتباەۆتىڭ تۋعانىنا 122 جىل تولدى، دەپ حابارلايدى Egemen.kz.

ساتباەۆ قانىش يمانتاي ۇلى (1899-1964) – قازاقستان گەولوگتارى عىلىمي مەكتەبىنىڭ نەگىزىن قالاۋشى، قازاقستاندىق مەتاللوگەنيا عىلىمىنىڭ نەگىزىن سالۋشى، گەولوگيا-مينەرالوگيا عىلىمدارىنىڭ دوكتورى، پروفەسسور، قازاقستان عىلىم اكادەمياسىن ۇيىمداستىرۋشىلاردىڭ ءبىرى ءارى تۇڭعىش پرەزيدەنتى، كسرو جانە قازاقستان عىلىم اكادەميالارىنىڭ اكادەميگى، تاجىكستان عىلىم اكادەمياسىنىڭ قۇرمەتتى مۇشەسى، قوعام قايراتكەرى، كسرو مەملەكەتتىك جانە لەنيندىك سىيلىقتارىنىڭ لاۋرەاتى. پاۆلودار وبلىسىنىڭ باياناۋىل اۋدانىندا تۋعان.

ساۋاتىن اۋىل مولداسىنان اشقان بولاشاق عالىم پاۆلودارداعى ورىس-قازاق مەكتەبىندە، سەمەي مۇعالىمدەر سەمينارياسىندا، تومسك تەحنولوگيا ينستيتۋتىنىڭ تاۋ-كەن فاكۋلتەتىندە ءبىلىم العان. مۇعالىمدەر سەمينارياسىندا ج.ايماۋىتوۆ، م.اۋەزوۆ سىندى كورنەكتى قايراتكەرلەرمەن بىرگە وقىعان.

«الاش» قوزعالىسى قايراتكەرلەرىنىڭ ءىس-ارەكەتىنە قولداۋ بىلدىرگەن. 1920-1941 جىلدارى باياناۋىلدا حالىق سۋدياسى، «اتباستۇستىمەت» ترەسى گەولوگيا ءبولىمىنىڭ، قارساقتاي مىس كومبيناتى گەولوگيالىق بارلاۋ ءبولىمىنىڭ باستىعى، كومبيناتتىڭ باس گەولوگى قىزمەتتەرىن اتقارعان.

1941-1952 جىلدارى كسرو عىلىم اكادەمياسى قازاق بولىمشەسىنىڭ قۇرامىنداعى گەولوگيا عىلىمدارى ينستيتۋتىنىڭ ديرەكتورى، كسرو عىلىم اكادەمياسىنىڭ قازاق بولىمشەسى تورالقاسى توراعاسىنىڭ ورىنباسارى، توراعاسى، قازاقستان عىلىم اكادەمياسىنىڭ پرەزيدەنتى بولعان. 1952 جىلى امىرشىلدىك جۇيەنىڭ تاراپىنان قىسىمعا ۇشىراپ، قىزمەتىنەن تومەندەتىلىپ، قازاق كسر گەولوگيا ينستيتۋتىنىڭ ديرەكتورى بولىپ تاعايىندالعان. 1955 جىلى قازاق كسر عىلىم اكادەمياسىنىڭ پرەزيدەنتى بولىپ قايتا سايلانىپ، ءومىرىنىڭ سوڭىنا دەيىن وسى قىزمەتتى اتقارعان.

سوڭعى جاڭالىقتار

ۇقساس جاڭالىقتار