ءبىلىم • 12 ءساۋىر، 2021

دوكتورانتۋراعا ءتۇسۋ ەرەجەلەرىنە وزگەرتۋلەر ەنگىزىلدى

24 رەت كورسەتىلدى

2021 جىلى جوعارى وقۋ ورنىنان كەيىنگى ءبىلىم بەرۋ باعدارلامالارىنا ءتۇسۋ ەرەجەلەرىنە وزگەرتۋلەر ەنگىزىلدى. ەندى دوكتورانتۋراعا قابىلداۋ ەلەكتروندى فورماتتا جۇزەگە اسىرىلادى. بىلتىر بۇل ءتاسىل ماگيستراتۋراعا قابىلداۋ كەزىندە تيىمدىلىگىن كورسەتتى.

ءبىلىم جانە عىلىم مينيسترلىگى ءباسپاسوز قىز­مە­تىنىڭ مالىمەتى بويىنشا، بيىلدان باستاپ دوكتو­رانتۋراعا قابىلداۋ ەمتيحانى ەلەكتروندى فورماتتا جۇرگىزىلەتىن بولادى. ۇمىتكەرلەر كومپيۋتەردە وتىرىپ ەسسە جازادى، دوكتورانتۋرادا وقۋعا دا­يىن­دى­عىن راستاۋ ءۇشىن تەست تاپسىرادى جانە ءبىلىم بەرۋ باع­دارلاماسى توبىنىڭ بەيىنى بويىنشا ەمتيحان تاپ­سى­رادى.

«بيىل دوكتورانتۋراعا ءتۇسۋ ەرەجەلەرىنە بىرقاتار وزگە­رىس ەنگىزىلدى. دوكتورانتۋراعا قابىلداۋ ەمتيحانى العاش رەت تەستىلەۋ ورتالىقتارىنىڭ بازاسىندا دەر­بەس كومپيۋتەر ارقىلى ەلەكتروندى فورماتتا وتەدى. وتكەن جىلى بۇل ءتاسىل ماگيستراتۋراعا قابىلداۋ كە­زىندە قولدانىلعان بولاتىن. بۇل – قابىلداۋ ەمتيحاندارى تەك تەستىلەۋ فورماتىندا وتەدى دەگەن ءسوز ەمەس. بولاشاق دوكتورانتتار جوعارى وقۋ ورىندارى بەكىتكەن تاقىرىپتار بويىنشا ەسسە جازادى. قابىلداۋ ەمتيحانىنىڭ قورىتىندى باعاسى ەسسە، دوكتورانتۋرادا وقۋعا دايىندىق تەستى جانە بەيىندى ەمتيحان باعالارىنىڭ جيىنتىعى بولىپ تابىلادى»، دەدى بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ.

دوكتورانتۋراعا ءوتىنىش قابىلداۋ 3 شىلدەدە باستالىپ، 3 تامىزعا دەيىن جالعاسادى. دوكتورانتۋراعا ءتۇسۋ ەمتيحاندارى 4-20 تامىز ارالىعىندا وتەدى.

ماگيستراتۋراعا كەشەندى تەستىلەۋگە ءوتىنىش بعم ۇلتتىق تەستىلەۋ ورتالىعىنىڭ سايتى ارقىلى 1 ماۋسىم مەن 15 شىلدە ارالىعىندا قابىلدانادى. كەشەندى تەستىلەۋدىڭ قورىتىندىسى بويىنشا كۋالىك ەلەكتروندى تۇردە تەستىلەنۋشىنىڭ جەكە كابينەتى ارقىلى بەرىلەدى. ماگيستراتۋراعا كەشەندى تەستىلەۋ 20 شىلدەدە باستالىپ، 10 تامىزعا دەيىن جالعاسادى. اراب ءتىلى بو­يىنشا جانە شىعارماشىلىق ەمتيحاندار 16-25 شىلدە ارالىعىندا وتەدى.

ماگيستراتۋرا مەن دوكتورانتۋراعا قابىلداۋ 28 تامىزدا اياقتالادى.

سونىمەن قاتار Duolingo English Test 2021-2022 وقۋ جىلىنا ماگيستراتۋرا مەن دوكتورانتۋراعا ءتۇسۋ كەزىندە شەت ءتىلىن مەڭگەرگەنىن راستايتىن حالىقارالىق سەرتيفيكاتتار تىزىمىنەن شىعارىلادى.

شەت ءتىلىن مەڭگەرگەندىگىن راستايتىن سەرتيفيكات دوكتورانتۋراعا ءتۇسۋ ءۇشىن عانا مىندەتتى بولىپ تابىلاتىنىن اتاپ كەتكەن ءجون. ماگيستراتۋرانىڭ ءبىلىم بەرۋ باعدارلامالارىنا ءتۇسۋ ءۇشىن حالىقارالىق سەرتيفيكاتتاردى نەمەسە كەشەندى تەستىلەۋ بارىسىندا شەت تىلىنەن ەمتيحان تاپسىرۋعا بولادى.

 

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار