ايماقتار • 11 ءساۋىر، 2021

«كيىك جاپپاي قىرىلىپ جاتىر»..

54 رەت كورسەتىلدى

«سولتۇستىك قازاقستاندا كيىك جاپپاي قىرىلىپ جاتىر» دەپ دۇرلىكتىرگەن حاباردى وتاندىق باق-تا جەردەن جەتى قويان تاپقانداي جاريالاپ، جۇرتتىڭ ءبارىن ەلەڭ ەتكىزدى. ءبىز وسى حاباردى انىقتاماق بولىپ، سولتۇستىك قازاقستاننىڭ ءتيىستى قىزمەتتەرىنە جۇگىندىك.

راس، كيىكتىڭ ءالى تولىق جەتىلمەگەن بىلتىرعى لاقتارى تويا تاماق جەمەگەندىكتەن كوكتەمگە السىرەپ شىعىپ، ونىڭ ۇستىنە قازىر قار استىنان جەمازىق تابا الماي، ءبىرلى-جارىم ءولىپ جاتىر ەكەن. بۇل ۋاقىتتا جەردىڭ قارى كەتىپ، جول اياعى كەڭىپ، كيىكتىڭ تۇمسىعى بىلتىرعى قاۋعا تيۋگە ءتيىستى ەدى. بىراق بيىلعى قالىڭ قار كەتە قويماي، ونىڭ ۇستىنە ءبىر ەرىپ، ءبىر قاتىپ، تۇياعى ءالسىز جاندىكتەر كوكتايعاقتى جارا الماعاندىقتان، ازىق تابا الماي جاتىر ەكەن. كەيدە بايعۇستار قالىڭ قارى كەتكەن جولدىڭ جيەگىنە دەيىن كەلىپ، استىنان بىلتىرعى قاۋدى تۇرتەتىن كورىنەدى. وندايدا كەيبىر ساناسىز جۇرگىنشىلەر قىزىقتاپ، ولاردى نە اتىپ الىپ نەمەسە سوعىپ كەتەتىن كورىنەدى.

«كيىك جاپپاي قىرىلىپ جاتىر» دەگەن داقپىرتتىڭ انىق-قانىعىن ءبىز ورمان شارۋاشىلىعى جانە جانۋارلار الەمى اۋماقتىق ينسپەكتسياسىنان بىلدىك.  بىزگە وسى قىزمەتتىڭ ءبولىم باستىعى ولەگ بەسپالوۆ بىلاي دەپ جاۋاپ بەردى: «كيىك جاپپاي قىرىلىپ جاتىر دەگەن پىكىرلەر شىندىققا جاناسپايدى. ەگەر ونداي بولسا، ءبىز توتەنشە جاعداي جاريالار ەدىك. ءبىرلى-جارىم ءولىپ جاتقاندار قار استىنداعى ازىققا جەتە الماي، اشتان ءولىپ جاتقاندار. سونىمەن بىرگە جول اپاتىنا ۇشىراپ جاتقاندار دا بار. ونىڭ ۇستىنە قاڭعىرعان يتتەردىڭ قۋعىنىنا ءتۇسىپ جاتقاندار دا ۇشىراسىپ قالادى. اڭ-قۇستىڭ كوكتەم كەزىندە ءولىپ جاتۋى ءبىزدىڭ ۇيرەنگەن كورىنىسىمىز. قىستان السىرەپ شىققان كوپتەگەن اڭ-قۇس ازىق-ت ۇلىك از بولعان سوڭ ءولىپ قالادى. ءبىز ءوز تاراپىمىزدان ولارعا ءشوپ، جەم شاشىپ جاتىرمىز. 30 ناۋرىزعا دەيىنگى مالىمەت بويىنشا اڭشىلىق شارۋاشىلىقتارى 600 تونناداي ءشوپ، 714 توننا جەم، 774 توننا جەم قالدىقتارىن شاشتى. سونىمەن بىرگە 236 توننا بۋىلعان جاپىراق (ۆەنيك) شاشىلدى. 14 تونناداي تۇز جايىلدى»، دەدى بىزگە و.بەسپالوۆ.

شىنىندا، كيىكتىڭ قىرىلۋى ەشقانداي اپاتتىڭ سەبەبىنەن ەمەس. جوعارىدا ايتقانىمىزداي ونىڭ باستى سەبەبى – بۇل ۋاقىتتا ءالى دە كەتپەي سىرەسىپ جاتىپ العان قالىڭ قار. جەر دە ءالى قاتىپ جاتىر، سۋدى سىڭىرە قويمايدى. سوندىقتان اپى كىرىپ، كۇپى شىققانداي لاۋلاتۋدىڭ قاجەتى جوق دەپ سانايمىز.

 

سولتۇستىك قازاقستان وبلىسى  

 

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار