مەديتسينا • 11 ءساۋىر، 2021

بورالداي اۋرۋحاناسىنىڭ دارىگەرلەرى انتىنا بەرىك

51 رەت كورسەتىلدى

ءوڭىر تۇرعىندارىنىڭ مەديتسينالىق قىزمەت الۋعا قول جەتىمدىلىگىن ارتتىرۋ ماقساتىندا الماتى وبلىسىندا اۋىز تولتىرىپ ايتارلىقتاي جۇمىس ىستەلىپ جاتىر، دەپ حابارلايدى Egemen.kz

بۇگىندە ايماقتا 235 دارىگەرلىك امبۋلاتوريا، 104 فەلدشەرلىك-اكۋشەرلىك پۋنكتى جانە 220 مەديتسينا بەكەتى بار.

جالپى، تۇرعىندارىنىڭ 80 پايىزعا جۋىعى اۋىلدى مەكەندەيتىن ايماق ءۇشىن بۇل كورسەتكىش جاقسى بولعانىمەن، ماسەلەنى تولىق شەشە المايدى ەكەن. ياعني، وبلىستاعى 2 ملن جاننىڭ باسىنا شاققاندا العاشقى مەديتسينا كومەگىن كورسەتەتىن ورىنداردىڭ تاپشىلىعىن جويۋ ءۇشىن ءالى دە ءبىراز ۋاقىت كەرەك. ال اتقارۋشى بيلىكتىڭ سۇرانىسقا يە ەلدى مەكەندەردەگى ەمحانالاردىڭ جۇمىسىن جاندارۋعا كۇش سالىپ-اق كەلەدى. ال قازىرگىدەي پاندەميا جاعدايىندا اق جەلەڭدى ابزال جانداردىڭ جۇمىسىنا دەگەن قۇرمەت مەن سىن دا ارتتاىنى ءسوزسىز. جەتىسۋلىق دارىگەرلەر وسى تالاپ ۇدەسىنەن شىعىپ وتىر دەۋگە تولىق نەگىز بار.

مىسالى، جۇقپالى ىندەتپەن كۇرەس جاعدايىندا قالتقىسىز قىزمەت كورسەتىپ وتىرعان مەديتسينا مەكەمەسىنىڭ ءبىرى – ىلە اۋدانىنا قاراستى بورالداي كەنتىندەگى اۋداندىق اۋرۋحانا. بۇل مەكەمە بورالداي كەنتى، ۆودنيك، كازتسيك، كومسومول، چاپاي، مەجدۋرەچەنسك اۋىلدارىنىڭ تۇرعىندارىنا مەديتسينالىق قىزمەت كورسەتىپ وتىرعان ءارى وتەگەن باتىر كەنتىندەگى ورتالىق اۋرۋحانادان كەيىنگى اۋداندىق اۋرۋحانا مارتەبەسىنە يە ەكەن. قازىر مۇندا ستاتسيونار ءبولىمى، كۇندىزگى ستاتسيونار ءبولىمى، قابىلداۋ ءبولىمى، ونكولوگ-مامولوگ، ەندوكرينولوگ، ستوماتولوگ، حيرۋرگ، گينەكولوگ، نەۆراپاتولوگ، رەنتگەنولوگ، وكۋليست، ۋدز كابينەتى، پسيحولوگ، الەۋمەتتىك قىزمەتتەر ماماندارى، ۋچاسكەلىك جالپى تاجىريبەلىك دارىگەرلەر ءبولىمى جۇمىس جاسايدى. اۋرۋحاناداعى زامان تالابىنا ساي الىنعان لاپاروسكوپيا اپپاراتى تۇرعىنداردىڭ دەرتىن ءدوپ باسىپ انىقتاپ، دەرتىنە شيپا بولىپ تۇرعانىنا ناۋقاستار ءدان ريزا.

«لاپاروسكوپيالىق تەحنولوگيا دەگەنىمىز ناۋقاستىڭ ىشكى اعزاسىنا وتانى تىلىك جاساماي ەمدەيتىن حيرۋرگيانىڭ جاڭا ءادىسى. وسى تاسىلمەن ءارتۇرلى وتالار جاسالىنۋدا. بۇل جۇمىستى ءوز ءىسىنىڭ مامانى، اۋرۋحانانىڭ حيرۋرگيا ءبولىمىنىڭ مەڭگەرۋشىسى نۇربول نۇرجانوۆ قولعا العان. دارىگەر-حيرۋرگ وتا جاساۋدى ءوزى جۇرگىزەدى. سونداي-اق، ەمحانادا ۋلترادىبىستىق زەرتتەۋ، ءسۇت بەزدەرىنىڭ رەنتگەنولوگيالىق زەرتتەۋى، ءسۇت بەزدەرىنىڭ پۋنكتسيوندىق بيوپسياسىن زەرتتەۋگە ارنالعان ماموگرافيا اپپاراتى الىندى.بۇل اپپاراتپەن 40 جاس پەن 70 جاس ارالىعىنداعى ايەلدەردى ءسۇت بەزىنىڭ قاتەرلى ىسىگىنىڭ الدىن الۋ ماقساتىندا تەكسەرۋ جۇرگىزەدى»، دەيدى بورالداي كەنتىندەگى اۋداندىق اۋرۋحانانىڭ باس دارىگەرى، «دەنساۋلىق ساقتاۋ ءىسىنىڭ ۇزدىگى» داريعا سادىكوۆا.

بورالدايداعى بۇل اۋرۋحانادا 75 دارىگەر، 125 مەدبيكە جۇمىس ىستەيدى ەكەن. بۇگىندە كوروناۆيرۋس ىندەتىنىڭ تارالۋى اسقىنعان سايىن دارىگەرلەردىڭ كاسىبي قىزمەتىنە سۇرانىس ارتىپ، جاۋاپكەرشىلىك جۇگى ەسەلەي تۇسكەن.

ال اۋرۋحانادا ەڭبەگىمەن ەل العىسىنا بولەنىپ جۇرگەن اق جەلەڭدى ابزال جاندار كوپ. مىسالعا، دارىگەر-تەراپەۆت الما ايداربەكوۆا، لابوراتوريا ءبولىمىنىڭ مەڭگەرۋشىسى ارداق وسپانقۇلوۆا، جالپى تاجىريبەلى دارىگەرلەر ءبولىمىنىڭ مەڭگەرۋشىسى سامال اقىباەۆا مەن بالالار دارىگەرى ءۇلبيبى احمەتاليەۆا سىندى دارىگەرگەرلەردى اتاپ ايتۋعا بولادى.

«بورالداي اۋداندىق اۋرۋحاناسىنىڭ قىزمەتكەرلەرى دە جۇقپالى ىندەت جاپپاي تارالعان كەزەڭنەن بەرى، ياعني، بىلتىرعى ناۋرىز ايىنان باستاپ اسقان جاۋاپكەرشىلىكپەن جۇمىس ىستەپ كەلەدى. اۋرۋحانا بازاسىندا ون توسەكتىك پروۆيزورلىق بولىمشەسى اشىلىپ، ول قازىرگى ۋاقىتقا دەيىن جۇمىس ىستەپ تۇر. ساقتىق شارالارى قاتاڭ تۇردە ساقتالىپ، بارلىق قىزمەتكەرلەر جەكە قورعانىس كيىمدەرىمەن قامتاماسىز ەتىلگەن. دارىگەرلەر مەن مەدبيكەلەر وسىنداي قيىن ساتتە وزدەرىنىڭ ەڭبەكتەرىن شىڭداپ، ۇلكەن تاجىريبە جيناقتادى»، دەيدى باس دارىگەر داريعا بالتابەكقىزى.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار