ەۋروپا چەمپيوناتىنا جولداما الدى

سپورت • 08 ءساۋىر، 2021

ەۋروپا چەمپيوناتىنا جولداما الدى

12 رەت كورسەتىلدى

فۋتزالدان قازاقستان ۇلتتىق قۇراماسى 2022 جىلى نيدەرلاندتا وتەتىن ەۋروپا چەمپيوناتىنىڭ ىرىكتەۋ كەزەڭى اياسىندا سىرت الاڭدا ماجارستان فۋتزالشىلارىن ۇتىپ، مەرزىمىنەن بۇرىن قۇرلىق دوداسىنا جولداما جەڭىپ الدى. بۇل – قازاقستان قۇراماسىنىڭ ءوز تاريحىندا ءۇشىنشى مارتە ەۋروپا چەمپيوناتىنا شىعۋى.

ءالي بيتورە

بۋداپەشتتە وتكەن ويىن كاكا باپتايتىن قازاقستان فۋتزالشىلارى ءۇشىن ىرىكتەۋ كەزەڭىندەگى كەزەكتى ماتچ بولعانىمەن، مەرزىمىنەن بۇرىن ەۋروپا چەمپيوناتىنىڭ فينالدىق كەزەڭىنە شىعۋ ماسەلەسىن شەشىپ تاستايتىن تاماشا مۇمكىندىك ەدى. وسىنداي ماڭىزدى باسەكەنى سىرت الاڭدا وتكىزگەنىنە قاراماستان، جەرلەستەرىمىز ماجارستان قۇراماسىنىڭ تاس-تالقانىن شىعارىپ، العا قويعان ماقساتىنا جەتتى.

اماليا ستەربينسكي اتىنداعى سپورت كەشەنىندە وتكەن كەزدەسۋدىڭ ءبىرىنشى كەزەڭىندە قازاقستان قۇراماسىنان شىڭعىس ەسەنامانوۆ، ازات ۆاليۋللين جانە تاينان قارسىلاستار قاقپاسىن ءدال كوزدەسە، يمرە نود ءوز قاقپاسىنا گول سوعىپ، اۆتوگولدىڭ اۆتورى اتاندى. ەكىنشى كەزەڭدە دە كاكا جەتەكشىلىك ەتكەن ءبىزدىڭ كوماندا ءوز قارقىنىن باسەڭدەتكەن جوق. ماتچ سوڭىنا دەيىن ءبىزدىڭ جىگىتتەر ماجارستان قۇراماسىنىڭ قاقپاسىنا تاعى ەكى گول سوقتى. بۇل گولداردى دۋگلاس جۋنيور مەن البەرت اقبالىقوۆ سالدى. ويىننىڭ 24-مينۋتىندا الماتىنىڭ «قايرات» فۋتزال كلۋبىندا ەكس-ويىنشىسى زولتان دورت الاڭ يەلەرىنىڭ جالعىز گولىن سوقتى. قورىتىندى ەسەپ – 6:1. قازاقستان قۇراماسىنىڭ پايداسىنا.

وسىلايشا، سىرت الاڭدا ماجارستاندى ءىرى ەسەپپەن جەڭگەن قازاقستان قۇراماسى ءتورت كەزدەسۋدەن كەيىن 12 ۇپاي جيناپ، ءوز توبىندا ءبىرىنشى ورىن الدى. وسى جەڭىس ارقىلى اسىندا وتانداستارىمىز «ەۋرو-2022» دوداسىنىڭ جولداماسىنا يەلىك ەتتى.

ەۋروپا چەمپيوناتىنا ىرىكتەۋ كەزەڭى اياسىنداعى ەكى قۇراما اراسىنداعى العاشقى كەزدەسۋ 2020 جىلدىڭ 11 جەلتوقسانىندا نۇر-سۇلتاندا ءوتىپ، وندا قازاقستان قۇراماسى قارت قۇرلىقتان كەلگەن قارسىلاستارىنىڭ قاقپاسىنا جاۋاپسىز بەس گول سوعىپ، ءىرى ەسەپپەن جەڭگەن ەدى. بۇل باسەكەدە ەل قۇراماسىنان ارنولد كناۋب، داۋرەن نۇرعوجين، البەرت اقبالىقوۆ، داۋرەن تۇرساعۇلوۆ مەرگەندىگىمەن كوزگە تۇسكەن بولاتىن.

جەرلەستەرىمىز كەيىنگى ەكى كەزدەسۋىن ناۋرىز ايىندا بەلارۋس قۇراماسىمەن وتكىزدى. العاش ەلورداداعى جاقسىلىق ۇشكەمپىروۆ اتىنداعى جەكپە-جەك سارايىندا وتكەن باسەكەدە جەرلەستەرىمىز قارسىلاستارىنان 5:2 ەسەبىمەن ايلاسىن اسىرسا، اراعا ءبىر اپتا سالىپ مينسكىدە ۇيىمداستىرىلعان ماتچتا قازاقستان قۇراماسى 6:1 ناتيجەسىمەن باسىم ءتۇستى.

ەندى قازاقستان فۋتزالشىلارى توپتىق كەزەڭدەگى سوڭعى ويىنىن نۇر-سۇلتان قالاسىندا 9 جانە 11 ءساۋىر كۇندەرى يزرايلمەن وتكىزەدى. نەگىزى ءاۋ باستا ءبىرىنشى ويىن 28 قاڭتاردا ءيزرايلدىڭ ريشون-لە-تسيون قالاسىندا ءوتۋى ءتيىس ەدى. الايدا ەپيدەميالىق جاعدايعا بايلانىستى ماتچ كەيىنگە شەگەرىلگەن بولاتىن. كەيىننەن ۋەفا شەشىمى بويىنشا ەكى ويىن دا نۇر-سۇلتاندا وتەتىن بولىپ بەكىتىلدى. يزرايلمەن وتەتىن ماتچ قازاقستان قۇراماسىنا ەش ماڭىزى جوق ويىن بولسا دا، باس باپكەر الاڭعا تەك جەڭىس ءۇشىن، جانكۇيەرلەردى قۋانتۋ ءۇشىن شىعامىز دەپ وتىر.

جالپى، 2022 جىلى وتەتىن ەۋروپا چەمپيوناتىنىڭ ىرىكتەۋ كەزەڭى بيىل العاش رەت جاڭا فورماتتا ءوتىپ جاتىر. اتاپ ايتار بولساق، ىرىكتەۋ سايىسىندا 32 ەلدىڭ قۇراماسى ءتورت-تورتتەن سەگىز توپقا ءبولىنىپ، «ۇيدە» جانە «تۇزدە» جۇيەسى بويىنشا ءوزارا شەبەرلىك بايقاسۋدا. ەرەجەگە سايكەس ءار توپتا كوش باستاعان ۇلتتىق قۇرامالار قارت قۇرلىقتىڭ باستى جارىسىنىڭ جولداماسىنا بىردەن يەلىك ەتەدى. ەكىنشى ورىن العاندار اراسىندا ەڭ كوپ ۇپاي جيناعان التى كوماندا دا ەۋروپا چەمپيوناتىنا قاتىسادى. قالعان ءبىر كوماندا قوسىمشا كەزدەسۋ ارقىلى انىقتالادى. جارىس قوجايىنى سانالاتىن نيدەرلاند قۇراماسىن قوسا ەسەپتەگەندە، كەلەسى جىلعى دوپ دوداسىنا 16 قۇراما قاتىسادى.

ءدال قازىرگى جاعداي بويىنشا ءوز توپتارىندا ءبىرىنشى ورىن يەلەنگەن ازەربايجان، بوسنيا جانە گەرتسەگوۆينا، يسپانيا، يتاليا، قازاقستان، نيدەرلاند، رەسەي جانە حورۆاتيا قۇرامالارى ەۋروپا چەمپيوناتىنا جولداما الىپ قويعان. ال ەۋروپا چەمپيوناتى 2022 جىلدىڭ 19 قاڭتارى مەن 6 اقپانى ارالىعىندا نيدەرلاندتىڭ امستەردام جانە گرونينگەن قالالارىندا وتەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز