ناۋرىز ايىندا نۇر-سۇلتان قالاسىنداعى ترانسفۋزيولوگيا عىلىمي-وندىرىستىك ورتالىعىنىڭ (تعوو) بازاسىندا حالىقارالىق IX عىلىمي-پراكتيكالىق كونفەرەنتسيا وتكەن بولاتىن. رەسەي, ۋكراينا, بەلارۋس, قىرعىزستان, تاجىكستان, وزبەكستاننىڭ ترانسفۋزيالىق مەديتسينا سالاسىنداعى ماماندارى ونلاين رەجىمىندە قاتىسقان كونفەرەنتسيادا ءسوز بولعان دۇنيەلەر قان قۇرامىنا بوككەن تالاي سىر مەن مۇمكىندىكتەردى ورتاعا سالدى.
نەگىزگى ماقساتى قان قىزمەتىن جانە دەنساۋلىق ساقتاۋدىڭ ىرگەلەس سالالارىن دامىتۋدىڭ وزەكتى ماسەلەلەرىن تالقىلاۋ بولعان جيىندا مينسك قالاسىنداعى ترانسفۋزيولوگيا جانە مەديتسينالىق بيوتەحنولوگيالار رەسپۋبليكالىق عىلىمي-پراكتيكالىق ورتالىعىنىڭ ديرەكتورى, مەديتسينا عىلىمدارىنىڭ كانديداتى ف.كارپەنكو ەلىندەگى قان قىزمەتىنىڭ جەتىستىكتەرى تۋرالى بايانداما جاسادى. ونىڭ دونورلىق قاننان الىناتىن شيكىزاتتى وڭدەۋ تاجىريبەسى جونىندەگى حابارلاماسى تىڭداۋشىلاردىڭ ايتارلىقتاي قىزىعۋشىلىعىن تۋدىردى. ويتكەنى بەلارۋس ەلىندەگى قان قىزمەتى ۇيىمدارى ءداستۇرلى ونىمدەر – البۋمين, يممۋنوگلوبۋليندەر الۋمەن شەكتەلىپ, تاپتاۋرىن جولمەن جۇرە بەرمەي, جاسۋشالىق تەحنولوگيالار نەگىزىندە جاسالعان جاڭا ونىمدەردى شىعارۋدى قولعا الىپتى. پاتسيەنتتەردى ەمدەۋدە جانە اسەمدىك پەن ارلەۋگە قاجەت كوسمەتولوگيادا قولدانىلاتىن بۇل جاڭا ونىمدەر قان سىرىنىڭ تاعى ءبىر پاراعىن اشقانداي.
ەلىمىزدىڭ ترانسفۋزيولوگيا سالاسى قارقىندى دامۋ ۇستىندە. وتاندىق ترانسفۋزيولوگتار پاتسيەنتتەردى ەمدەۋدە قاندى قۇيۋدان تىس ونىڭ كومپونەنتتەرىنە ديففەرەنتسيالانعان تەراپيا ۇسىنىپ, ترانسپلانتولوگيانى العا جىلجىتۋدا شەشۋشى ءرول اتقارىپ جۇرگەنىن بۇرىن دا جازعان بولاتىنبىز. ەلوردادا ارنايى ەكونوميكالىق ايماق جاعدايىندا ۇيىمداستىرىلعان قان قىزمەتى ءۇشىن مەديتسينالىق ماقساتتاعى بۇيىمداردى ءوندىرۋ تاجىريبەسى تۋرالى حابارلاما مامانداردىڭ ەرەكشە قىزىعۋشىلىعىن تۋدىردى.
«Eira Med» جشس باس ديرەكتورى م.ابدىحاليەۆا زاۋىتتىڭ وندىرىستىك الاڭىندا دونورلىق قان مەن ونىڭ كومپونەنتتەرىن دايىنداۋ ءۇشىن پوليمەرلىك كونتەينەرلەر مەن ستەريلدى ەرىتىندىلەر شىعارۋ جولعا قويىلعانىن, سونداي-اق تسيتافەرەز جانە دونورلىق قان كومپونەنتتەرىندەگى پاتوگەندەردى يناكتيۆاتسيالاۋ جۇيەلەرىن ءوندىرۋ باستالعانىن حابارلادى. بۇل راسىندا دا ەلەڭدەتەرلىك دۇنيە. ترانسفۋزيولوگيا عىلىمي-وندىرىستىك ورتالىعىنىڭ باسقارما ءتورايىمى س.ءابدىراحمانوۆا وسى رەتتە ىشكى نارىققا شىعارىلاتىن مەديتسينالىق ماقساتتاعى بۇيىمدار كونسترۋكتسيالارىن جوبالاۋ كەزىندە وتاندىق تۇتىنۋشىنىڭ قاجەتتىلىكتەرى ەسكەرىلگەنىن نازارعا سالىپ ءوتتى.
سونداي-اق مەديتسينا عىلىمىنىڭ دوكتورى, رەسەيلىك پروفەسسور ە.جيبۋرتتىڭ ترانسفۋزيالىق عىلىم جانە پراكتيكا سالاسىنداعى الەمدىك جەتىستىكتەرى تۋرالى بايانداماسى قان تىلسىمىنىڭ ءالى تالاي مۇمكىندىگى اشىلاتىنىنان حابار بەردى.
سەكتسيالىق كەڭەستەر بارىسىندا وتاندىق جانە شەتەلدىك سپيكەرلەر وتەۋسىز ەرىكتى دونورلىقتى دامىتۋ, كلينيكالىق ترانسفۋزيولوگيا جانە قان قىزمەتىندەگى زەرتحانالىق دياگنوستيكا ماسەلەلەرىنە ارنالعان باياندامالارىن ۇسىنىپ, قان مەن ونىڭ كومپونەنتتەرىنىڭ وتەۋسىز ەرىكتى دونورلىعىن دامىتۋ پروبلەمالارى, ونىڭ ىشىندە كوۆيدتىك ينفەكتسيا رەكونۆالەستسەنتتەرىنىڭ يممۋندىق پلازماسىن دونورلىققا تارتۋ ەرەكشەلىكتەرى, سونداي-اق دونورلىق قان مەن ونىڭ كومپونەنتتەرىن دايىنداۋدىڭ ۇتىمدى تاسىلدەرىن ءسوز ەتتى.
ترانسفۋزيولوگيا عىلىمي-وندىرىستىك ورتالىعىنىڭ ماماندارى ونلاين جيىن بارىسىندا اموتوسالەن جانە ۋفو وڭدەلگەن كونۆالەستسەنتتىك پلازماداعى SARS-CoV-2 انتيدەنەلەرىنىڭ كونتسەنتراتسياسىنىڭ وزگەرىستەرىن زەرتتەۋ, يممۋندىق پلازما دونورلارىنداعى انتيدەنەلەردى انىقتاۋدىڭ تاجىريبەسىن دە ورتاعا سالدى. سونداي-اق COVID-19 ناۋقاستارىندا SARS-CoV-2 ۆيرۋسىنىڭ ساقتالۋ ديناميكاسىن زەرتتەۋ تۋرالى جۇمىستارى دا نازار اۋدارارلىق. وتاندىق مامانداردىڭ ونكولوگيالىق اۋرۋلارعا ۇشىراعان بالالارعا قان مەن ونىڭ كومپونەنتتەرىن قۇيۋ كەزىندەگى ترانسفۋزيالىق تەراپيانىڭ تاكتيكاسىنا, گەموترانسفۋزيالاردىڭ قولايسىز سالدارىن جىكتەۋ جانە ونى مەديتسينالىق ۇيىمداردا انىقتاۋ مەن ەسەپكە الۋ ماسەلەلەرىمەن ورتاقتاسقانى جيىن ءمانىن اشا تۇسسە, كوروناۆيرۋس ينفەكتسياسىن ەمدەۋ ءۇشىن يممۋندىق پلازمانى پايدالانۋ كەزىندە الىنعان تاجىريبەلەرىمەن ءبولىسۋى شەتەلدىك ترانسفۋزيولوگتاردى دا ءتانتى ەتكەنىن ايتا كەتكەن ءلازىم.
جوعارىدا ايتقانداي, قاننىڭ زەرتتەلەتىن سىرلارى مەن قىرلارى سانسىز كورىنەدى. ءبىزدىڭ زەرتتەۋشىلەر قان قىزمەتىندەگى كوروناۆيرۋس ينفەكتسياسى ماركەرلەرىنىڭ جانە گەموترانسفۋزيالىق ينفەكتسيالار ماركەرلەرىنىڭ زەرتحانالىق دياگنوستيكاسىنا, سونداي-اق يممۋنوگەماتولوگيانىڭ كەيبىر اسپەكتىلەرىنە بايلانىستى بىرنەشە بايانداما جاسادى. كونفەرەنتسيا شەڭبەرىندە ROCHE Diagnostics ماماندارى كورسەتەتىن گەموترانسفۋزيالىق ينفەكتسيالاردى دياگنوستيكالاۋعا ارنالعان زەرتحانالىق جابدىقتارعا سەرۆيستىك قىزمەت كورسەتۋ ماسەلەلەرىن تالقىلاۋ بويىنشا ساتتەليتيندىك كەڭەس وتكىزىلدى. ROCHE DIAGNOSTICS كومپانياسىنىڭ قولداۋىمەن ۇيىمداستىرىلعان كەڭەسكە قازاقستان رەسپۋبليكاسىنىڭ بارلىق قان قىزمەتى ۇيىمدارىنىڭ ترانسفۋزيالىق ينفەكتسيالار زەرتحانالارىنىڭ مەڭگەرۋشىلەرى قاتىستى.
