سونداي-اق كەلەسى اپتادا وڭتۇستىك كورەيانىڭ مۋلتيپليكاتسيالىق فيلمدەردى ناسيحاتتاۋ اگەنتتىگىنىڭ مىقتى انيماتورلارىمەن (Korean Manhwa Contents Agency) «مۋلتيپليكاتور ماماندىعىنىڭ ماڭىزى» تاقىرىبىندا موتيۆاتسيالىق ساباق وتكىزۋ جوسپارلانىپ وتىر.
ونىڭ الدىندا اقپارات جانە قوعامدىق دامۋ مينيسترلىگى مەن وڭتۇستىك كورەيانىڭ مۋلتيپليكاتسيالىق فيلمدەردى ناسيحاتتاۋ اگەنتتىگى اراسىندا وسى انيماتسيالىق مەكتەپتىڭ جۇمىسىنا بايلانىستى ونلاين كەزدەسۋ وتكەن بولاتىن. جيىنعا قاتىسقان كورەي اگەنتتىگىنىڭ پرەزيدەنتى شين دجونگ ءچولدىڭ ايتۋىنشا, ەرەكشە ءبىلىم الۋ قاجەتتىلىكتەرى بار بالالاردى انيماتسياعا باۋلۋ كورەيادا 10 جىل بۇرىن باستالدى. بۇگىندە كورەيادا وسىنداي 11 الەۋمەتتىك ورتالىق جۇمىس ىستەيتىنىن ايتتى. دەمەك قازاقستاندىق ماماندارعا بۇل باعىتتا ۇزدىك شەتەلدىك تاجىريبە الماسۋ مۇمكىندىگى تۋىنداپ وتىر.
ەسكە سالا كەتسەك, قازاقستان تاۋەلسىزدىگىنىڭ 30 جىلدىعىنا وراي قر اقدم باستاماسىمەن ىسكە قوسىلعان «Balapan» تەلەارناسىنىڭ جانىنداعى «ەرەكشە ءبىلىم الۋ قاجەتتىلىكتەرى بار بالالارعا ارنالعان انيماتسيا مەكتەبى» العاشقى ساباعىن 12 ناۋرىزدا باستاعان.
ەلىمىزدە تۇڭعىش رەت قولعا الىنىپ وتىرعان بۇل جوبانىڭ ماقساتى: ەرەكشە ءبىلىم الۋ قاجەتتىلىكتەرى بار بالالارعا ماماندىعىنا اينالاتىن كاسىپتى ۇيرەتۋ, الەۋمەتتىك بەيىمدەۋگە جاردەمدەسۋ جانە ولاردىڭ بوس ۋاقىتىن ءتيىمدى ۇيىمداستىرۋ.
- كۋرس باستالعالى بايقاعانىمىز – وقۋشىلاردىڭ انيماتسيا سالاسىن مەڭگەرىپ, ۇيرەنۋگە دەگەن ىنتا-ىقىلاسى زور. بالالاردىڭ وي-پىكىرىن اشىق بىلدىرە الاتىن وجەت, تالاپتى, ءبىلىمدى ءارى زەرەك ەكەندىگى ءتىپتى قۋانتادى, - دەيدى «Balapan» تەلەارناسىنىڭ ديرەكتورى ماقپال جۇماباي.
وسى رەتتە قر اقدم مەن «Balapan» تەلەارناسىنا ناتيجەلى كەلىسسوزدەر جۇرگىزۋگە اتسالىسقان قازاقستاننىڭ وڭتۇستىك كورەيا مەن جاپونياداعى ەلشىلىكتەرىنىڭ ەڭبەگىن اتاپ وتكەن ءجون.
