قوعام • 07 ءساۋىر، 2021

«جانۋارلارعا جاۋاپكەرشىلىكپەن قاراۋ تۋرالى» زاڭ جوباسى قارالدى

16 رەت كورسەتىلدى

پرەزيدەنت اكىمشىلىگىنىڭ باستاماسىمەن «جا­نۋارلارعا جاۋاپكەرشىلىكپەن قاراۋ تۋرالى» زاڭ جوباسى تالقىلاندى. ءىس-شاراعا پرە­زيدەنت اكىمشىلىگى وكىلدەرى، پارلامەنت ءماجىلىسىنىڭ دەپۋتاتتارى، پرەمەر-مي­نيس­تر كەڭسەسىنىڭ، ەكولوگيا، گەولوگيا جانە تا­بيعي رەسۋرستار مينيسترلىگىنىڭ جانە باس­قا دا مەملەكەتتىك ورگاننىڭ وكىل­دەرى، زووبەل­سەندىلەر قاتىستى.

«بۇل مەملەكەت باسشىسىنىڭ تاپسىرماسى جانە ول پرەزيدەنت اكىمشىلىگىنىڭ ەرەكشە باقىلاۋىندا. ءبىزدىڭ مىندەتىمىز – جان-جاقتى پىسىقتالعان جانە ءتيىمدى جۇمىس ىستەيتىن زاڭ الۋ ءۇشىن تاپسىرمانى مەرزىمىندە جانە ساپالى ورىنداۋ»، دەپ اتاپ ءوتتى پرەزيدەنت اكىمشىلىگىنىڭ ستراتەگيالىق جوسپارلاۋ ءبولىمى مەڭگەرۋشىسىنىڭ ورىنباسارى ولجاس جوراەۆ.

كەڭەس بارىسىندا زاڭ جوباسىنىڭ داۋلى نورمالارى ەگجەي-تەگجەيلى قارالىپ، جانۋارلاردىڭ مارتەبەسى جانە ولاردى قورعاۋ شارالارى تال­قىلاندى. سونىمەن قاتار ىلەسپە زاڭ جوباسىن ىسكە اسىرۋ تۋرالى دا ءسوز بولدى. پارلامەنت ءماجىلىسىنىڭ دەپۋتاتتارى ەلدوس اباقانوۆ پەن ۆەرا كيم زاڭدى ۋاقتىلى قابىلداۋ ءۇشىن مينيسترلىكپەن، مەملەكەتتىك ورگاندارمەن جانە زووقورعاۋشىلارمەن تىعىز ءوزارا ءىس-قيمىل جاساۋعا ءازىر ەكەندىكتەرىن ءبىلدىردى.

تالقىلاۋ قورىتىندىسى بويىنشا ازاماتتىق سەكتور مەن مۇددەلى مەملەكەتتىك ورگانداردىڭ پىكىرىن ەسكەرە وتىرىپ، پارلامەنت ماجىلىسىندەگى جۇمىس توبى شەڭبەرىندە نەگىزگى جانە ىلەسپە زاڭ جوبالارى بويىنشا بىرلەسكەن جۇمىس جۇرگىزۋ ۇسىنىلدى.

ەسكە سالا كەتەيىك، مەملەكەت باسشى­سى قاسىم-جومارت توقاەۆتىڭ تاپ­­­سىر­­ما­سى بويىنشا ەكولوگيا، گەولوگيا جانە تابي­عي رەسۋرستار مينيسترلىگى زووبەل­سەن­دى­لەر­مەن، قو­عام وكىلدەرىمەن بىرلەسىپ «جا­نۋار­لارعا جا­ۋاپكەرشىلىكپەن قاراۋ تۋرالى» زاڭ جوباسىن ازىرلەدى. قۇجاتتا جا­نۋار­لارعا جاۋاپ­كەر­شى­لىكپەن قاراۋدى جانە ولار­عا ادام­گەرشىلىكپەن قاراۋدى قالىپتاستىرۋعا با­عىت­تالعان نورمالار بار.

 

 

سوڭعى جاڭالىقتار

ۇقساس جاڭالىقتار