الدىمەن بۇگىنگى احۋالدى تالداپ كورەلىك. ەپيدەميولوگتاردىڭ مالىمەتىنە قاراعاندا, «جاسىل ايماققا» تابان تىرەپ تۇرعان كۇننىڭ وزىندە وبلىس ورتالىعى مەن شورتاندى, استراحان, ءبىرجان سال اۋداندارىندا دەرت دەڭگەيى تومەندەگەن ەمەس. جامان ىندەتتى جۇقتىرۋ بارىسى ارشالى, تسەلينوگراد, شورتاندى جانە اقكول سياقتى نۇر-سۇلتان قالاسىنىڭ ىرگەسىندەگى اۋدانداردا كوبىرەك بايقالعان. سەبەبى جول اشىق بولعان سوڭ جەرگىلىكتى حالىقتىڭ «قىزىل ايماقتاعى» استانامەن ەكى ارادا ات ءىزىن سۋىتپاي, تىنىمسىز قاتىناپ جاتۋى.
سوڭعى تاۋلىكتەردەگى مالىمەتكە زەر سالساڭىز, وبلىستا زەرتحانادا راستالعان 15 370 جاعداي تىركەلگەندىگىن اڭعاراسىز. ياعني ەرەسەكتەر اراسىندا – 13 734, 14 جاسقا دەيىنگى بالالار اراسىندا 1 636 جاعداي تىركەلگەن. داۋاسىز دەرتتىڭ سالدارىنان 104 ادام ومىردەن ءوتتى. ورنى تولماس قايعى-قاسىرەت. 15 370 ناۋقاستىڭ 7 535 جاعدايى ەمحاناعا ءوزىنىڭ حابارلاسۋىمەن انىقتالعان. 5 734 ادام – اۋرۋ جۇقتىرعاندارمەن قارىم-قاتىناستا بولعاندار. وسى دەرەكتەن-اق دەرتتىڭ قانشالىقتى قورقىنىشتى ەكەنىن ەستىمەك تۇگىل, كۇندەلىكتى كوزدەرىمەن كورىپ جۇرسە دە, ساقتانۋ تالاپتارىن ورىنداماعانداردىڭ كوپتىگىن اڭعارۋعا بولادى. ناۋقاسقا شالدىققانداردىڭ تاعى ءبىر توبى, ياعني, 2 101-ءى پروفيلاكتيكالىق سكرينينگ كەزىندە انىقتالعان.
ەندىگى ءبىر وزەكتى ماسەلە – بالالاردى دەرت شەڭگەلىنەن امان الىپ قالۋ بولىپ تۇر. بۇگىنگى مەكتەپ وقۋشىلارى اراسىنداعى ەپيدەميالىق جاعدايعا توقتالساق, وقۋ جىلىنىڭ باسىنان زەرتحانالىق ساراپتامامەن راستالعان 991 COVID-19 جاعدايى تىركەلگەندىگىن ايتۋعا بولادى. ونىڭ 399-ى ءبىلىم وشاقتارىنا بارىپ, ال 592-ءسى قاشىقتان وقىعان وقۋشىلار. دەمەك, مەكتەپ قانا ەمەس, ۇيگە دە ەرەسەكتەردىڭ دەرتتى بايقاماي جۇقتىرىپ اكەلۋى از بولماي تۇر.
– ەپيدەميالىق جاعدايدىڭ ناشارلاۋىنا جول بەرمەۋ ماقساتىندا ءتورتىنشى توقسانداعى وقۋ پروتسەسى وزگەرىسسىز وتەدى, – دەيدى وبلىستىڭ باس سانيتارلىق دارىگەرى ايناگۇل مۋسينا.
قالايدا دەرتتىڭ الدىن الۋ شارالارىن تىڭعىلىقتى جۇرگىزگەن ءلازىم. قازىر وڭىردە ۆاكتسينالاۋدىڭ ەكىنشى كەزەڭى ءجۇرىپ جاتىر. 24 ۆاكتسينا ەگۋ ورىنى ۇيىمداستىرىلعان. ونداعى ۆاكتسينانى تاسىمالداۋ, ساقتاۋ جانە قولدانۋ ءجىتى باقىلاۋدا. ءبىرىنشى كومپونەنتپەن 1 298 ادام ۆاكتسينالانسا, ەكىنشى كومپونەنتتى 1 287 ادام قابىلداعان.
ادامداردىڭ بەيقامدىعى, وزدەرىنىڭ جانە اينالاداعى زامانداستارىنىڭ دەنساۋلىعىنا, ساقتىعىنا نەمقۇرايدى قاراۋى ءالى دە تىيىلاتىن ەمەس. وڭىردە «جامان تۇماۋدىڭ» قايتا باس كوتەرۋى وسىندا جاتقان ءتارىزدى. اعىمداعى جىلدىڭ ءبىرىنشى توقسانىنداعى مونيتورينگ بارىسىندا ءار ءتۇرلى مەنشىك نىساندارى 11 390 مارتە تەكسەرىلگەن. تەكسەرىس بارىسىندا 223-ىندە كارانتين شارالارىنىڭ ساقتالماعانى, جالپىعا ورتاق ءتارتىپتىڭ ورەسكەل بۇزىلعانى انىقتالعان. اۋرۋدىڭ وشاعى بولىپ وتىرعان جەر دە وسى ەمەس پە؟ ءتارتىپ بۇزعاندارعا 31 936 150 تەڭگە سوماسىندا 297 اكىمشىلىك ايىپپۇل سالىنعان. ماسەلەن, بۋراباي اۋدانىنداعى «تويحانا», «مەرەي» ءدامحانالارى 50 ادام قاتىسقان ۇيلەنۋ تويلارىن وتكىزسە, «ارزۋ» ءدامحاناسىندا تۋعان كۇن سالتاناتى اتاپ وتىلگەن. ال كوكشەتاۋ قالاسىنداعى «نۇر سۇلتان» مەيرامحاناسىندا قىز ۇزاتۋ تويى ۇيىمداستىرىلىپتى. ستەپنوگورسكىدەگى «ەحجوي» ءدامحاناسىندا دا شەكتەۋلەرگە قاراماستان, تۋعان كۇن كەشى تويلانعان. وعان قوسا, KonforHotel قوناقۇيىندە كاراوكە-باردىڭ جۇمىس ىستەپ تۇرعانى بەلگىلى بولعان. وسىنداي زاڭ بۇزۋشىلىقتار ءۇشىن 1 502 255 تەڭگە كولەمىندە 5 اكىمشىلىك ايىپپۇل سالىنعان. مۇنداي مىسالداردى كوپتەپ كەلتىرۋگە بولادى.
ءوڭىردىڭ باس سانيتار دارىگەرىنىڭ مالىمەتىنشە, جاڭا شتامداردىڭ پايدا بولۋىنا بايلانىستى رەسپۋبليكادا كوروناۆيرۋس ينفەكتسياسىنىڭ اينالىمداعى شتامدارى زەرتتەلۋدە. ياعني دۇنيەجۇزىلىك دەنساۋلىق ساقتاۋ ۇيىمىمەن بىرگە, COVID-19 شتامدارىن انىقتاۋعا ارنالعان ەكسپرەسس-پتر سكرينينگتىڭ جاڭا ءادىسى ەنگىزىلگەن. وبلىستاعى ون سىنامانىڭ بىرەۋى وڭ ناتيجە كورسەتكەن. وسىنداي زەرتتەۋ ناتيجەلەرى بويىنشا «بريتاندىق», «وڭتۇستىك افريكا», «برازيليالىق» شتامدارعا ءتان مۋتاتسيا ىقتيمالدىلىعى انىقتالىپ وتىر.
اۋرۋدىڭ الدىن الۋ ءۇشىن كارانتين شارالارىن كۇشەيتكەن دۇرىس ءتارىزدى. ءتارتىپ بولماعان جەردە ىندەتتىڭ جالعاسا بەرەتىندىگىن, ءورشي تۇسەتىندىگىن كوز كورىپ وتىر.
اقمولا وبلىسى
