قازاق ادەبيەتىندە ايرىقشا ورنى بار جازۋشىنىڭ پروزالىق شىعارمالارىندا نەگىزىنەن جەتپىسىنشى, سەكسەنىنشى جىلدارداعى ەل تىرشىلىگى سۋرەتتەلىپ, قوعامدىق احۋال كورىنىستەرىندەگى قاراپايىم تۇرمىستىق ەپيزودتاردىڭ وزىنەن ۇلكەن الەۋمەتتىك ماسەلەلەر ۇتىمدى جەتكىزىلەدى. ال اتاقتى «تار كەزەڭ» رومانى ۇلت تاريحىنداعى ۇلى تۇلعالاردىڭ ءبىرى سىرىم دات ۇلى تۋرالى جازىلعانى بەلگىلى.
– قازاقتىڭ كورنەكتى جازۋشىسى قاجىعالي مۇحانبەتقالي ۇلى اعامىزدىڭ اتىنا وقۋ زالىنىڭ اشىلعانى ءبىزدى وتە قۋانتىپ وتىر. بۇل – ۇلتتىق اكادەميالىق كىتاپحانانىڭ ءبىزدىڭ قالامگەرلەرىمىزگە كورسەتىپ جاتقان قۇرمەتى. كىتاپحانادا كلاسسيك ءابىش كەكىلباەۆتىڭ, عالىم, ادەبيەتتانۋشى تۇرسىنبەك كاكىشەۆتىڭ, جازۋشى دۇكەنباي دوسجاننىڭ, ادەبيەتتانۋشى مىرزاتاي جولداسبەكوۆتىڭ وقۋ زالى بار. قازاق رۋحانياتىنا, سونىڭ ىشىندە ادەبيەتىمىزگە زور ۇلەس قوسقان ازاماتتاردىڭ ەسىمى بەرىلگەن كابينەتتەر اشىلىپ جاتىر. بۇل تەك مۋزەي رەتىندە ەسىگى جابىق تۇراتىن وقۋ زالدارى ەمەس, سىرتتان كەلگەن وقىرمانداردىڭ بارلىعى وزدەرىنە كەرەك كىتاپتى قاراپ, بىلىمگە, عىلىمعا دەن قويۋعا جاعداي جاسالعان دۇنيە, – دەدى قازاقستان جازۋشىلار وداعى نۇر-سۇلتان قالالىق فيليالىنىڭ ديرەكتورى, اقىن داۋلەتكەرەي كاپ ۇلى. جازۋشىنىڭ جۇبايى سۇلۋحانىم فاتيحاقىزى ءوزىنىڭ جارى تۋرالى ەستەلىكتەرمەن ءبولىسىپ, قاجىعالي مۇحانبەتقالي ۇلىنىڭ اتىنا اشىلىپ جاتقان وقۋ زالى ءۇشىن ۇلتتىق اكادەميالىق كىتاپحاناعا زور ريزاشىلىق ءبىلدىردى.
جيىنعا جازۋشىنىڭ جاقىن دوسى, جازۋشى, مەملەكەتتىك سىيلىقتىڭ لاۋرەاتى تولەن ابدىك, پۋبليتسيست وراز قاۋعاباي, فيلولوگيا عىلىمدارىنىڭ كانديداتى قايرات ساق, «التىن قازىنا» قوعامدىق بىرلەستىگىنىڭ توراعاسى ەربول بەيىلحان جانە وزگە دە جاستار قاتىستى.
